ന്യൂഡൽഹി: മേഘാലയയിൽ മധുവിധുവിനിടെ ഇൻഡോർ സ്വദേശിയായ ഭർത്താവ് രാജാ രഘുവംശിയെ കൊലപ്പെടുത്തിയ കേസിൽ പ്രതിയെന്ന് സംശയിക്കുന്ന ഭാര്യ സോനം രഘുവംശി പൊലീസിൽ കീഴടങ്ങി. സമ്മർദ്ദത്തെ തുടർന്നാണ് സോനം കീഴടങ്ങിയതെന്ന് പോലീസ് അറിയിച്ചു.
ജൂൺ 2-ന് ഈസ്റ്റ് ഖാസി ഹിൽസിലെ വെയ്‌സാവ്‌ഡോങ് വെള്ളച്ചാട്ടത്തിന് സമീപമുള്ള കൊക്കയിൽ നിന്ന് രാജയുടെ മൃതദേഹം കണ്ടെത്തിയതിനെ തുടർന്ന് കാണാതായ സോനത്തെ ഉത്തർപ്രദേശിലെ ഗാസിപുർ ജില്ലയിൽ നിന്നാണ് പോലീസ് കസ്റ്റഡിയിലെടുത്തത്. ഞായറാഴ്ച രാത്രിയോടെ നന്ദ്ഗഞ്ച് പോലീസ് സ്റ്റേഷനിലെത്തിയാണ് സോനം കീഴടങ്ങിയത്.
“ശക്തമായ സമ്മർദ്ദത്തെ തുടർന്ന് സോനം കഴിഞ്ഞ രാത്രി കീഴടങ്ങി. ഇതോടെ കേസിൽ അറസ്റ്റിലായവരുടെ എണ്ണം നാലായി. ഒരാളെക്കൂടി പിടികൂടാനുണ്ട്. സോനത്തെ മേഘാലയയിൽ എത്തിച്ച് കോടതിയിൽ ഹാജരാക്കും,” ഇൻസ്‌പെക്ടർ ജനറൽ ഓഫ് പോലീസ് (ലോ ആൻഡ് ഓർഡർ) ഡാൾട്ടൻ പി മറാക്ക് വാർത്താ ഏജൻസിയായ ഐഎഎൻഎസിനോട് പറഞ്ഞു.
സോനം ഉൾപ്പെടെ നാല് പേരാണ് കേസിൽ ഇതുവരെ അറസ്റ്റിലായത്. ഉത്തർപ്രദേശിൽ നിന്നും മധ്യപ്രദേശിലെ ഇൻഡോറിൽ നിന്നുമായി മൂന്ന് പേരെ നേരത്തെ പിടികൂടിയിരുന്നു. വാടകക്കൊലയാളികളെ ഉപയോഗിച്ച് സോനം ഭർത്താവിനെ കൊലപ്പെടുത്തിയെന്നാണ് പോലീസിൻ്റെ നിഗമനം. പ്രത്യേക അന്വേഷണ സംഘമാണ് (എസ്ഐടി) കേസ് അന്വേഷിക്കുന്നത്.
കുറ്റം നിഷേധിച്ച് സോനത്തിന്റെ കുടുംബം
അതേസമയം, സോനത്തിനെതിരായ കൊലപാതക ആരോപണം അവളുടെ കുടുംബം ശക്തമായി നിഷേധിച്ചു. തൻ്റെ മകൾ നിരപരാധിയാണെന്നും സിബിഐ അന്വേഷണം വേണമെന്നും സോനത്തിന്റെ പിതാവ് ദേവി സിംഗ് ആവശ്യപ്പെട്ടു.
“എൻ്റെ മകൾ നിരപരാധിയാണ്, അവൾക്കത് ചെയ്യാൻ കഴിയില്ല. ഇരു കുടുംബങ്ങളുടെയും സമ്മതത്തോടെയാണ് അവർ വിവാഹിതരായത്. മേഘാലയ സർക്കാർ തുടക്കം മുതലേ കള്ളം പറയുകയാണ്. എൻ്റെ മകൾ കഴിഞ്ഞ രാത്രി ഗാസിപുരിലെ ഒരു ധാബയിലെത്തി സഹോദരനെ വിളിച്ചു. അവിടെയെത്തിയ പോലീസ് അവളെ കസ്റ്റഡിയിലെടുക്കുകയായിരുന്നു. മേഘാലയ പോലീസ് കള്ളക്കഥകൾ ചമയ്ക്കുകയാണ്. സിബിഐ അന്വേഷണം വരട്ടെ, സത്യം പുറത്തുവരും,” അദ്ദേഹം പറഞ്ഞു.
സംഭവങ്ങളുടെ നാൾവഴി
- മെയ് 21: ദമ്പതികൾ ഷില്ലോംഗിലെ ബാലാജി ഗസ്റ്റ് ഹൗസിൽ മുറിയെടുത്തു.
- മെയ് 22: സ്കൂട്ടർ വാടകയ്‌ക്കെടുത്ത് പ്രമുഖ വിനോദസഞ്ചാര കേന്ദ്രമായ ചിറാപുഞ്ചിയിലേക്ക് (സോഹ്‌റ) യാത്ര തിരിച്ചു. വൈകുന്നേരത്തോടെ നോൺഗ്രിയാറ്റ് ഗ്രാമത്തിലെ ഷിപ്പാറ ഹോംസ്റ്റേയിൽ മുറിയെടുത്തു.
- മെയ് 23: രാവിലെ 6 മണിയോടെ ഹോംസ്റ്റേയിൽ നിന്ന് ഇറങ്ങി. പിന്നീട് ഇവരെ മൂന്ന് അപരിചിതരായ പുരുഷന്മാർക്കൊപ്പം കണ്ടതായി ഒരു ടൂറിസ്റ്റ് ഗൈഡ് പോലീസിന് മൊഴി നൽകി. ഇതാണ് ദമ്പതികളെ അവസാനമായി ഒരുമിച്ച് കണ്ടത്.
- മെയ് 24: ഇവർ ഉപേക്ഷിച്ച സ്കൂട്ടർ സോഹ്‌റാറിം ഗ്രാമത്തിൽ നിന്ന് കണ്ടെത്തി.
- ജൂൺ 2: വെയ്‌സാവ്‌ഡോങ് വെള്ളച്ചാട്ടത്തിന് താഴെയുള്ള കൊക്കയിൽ നിന്ന് രാജയുടെ അഴുകിയ മൃതദേഹം കണ്ടെത്തി.
- ജൂൺ 7: മധ്യപ്രദേശിൽ നിന്നും ഉത്തർപ്രദേശിൽ നിന്നുമായി മൂന്ന് പേർ അറസ്റ്റിൽ.
- ജൂൺ 8: സോനത്തെ ഗാസിപുരിൽ നിന്ന് കണ്ടെത്തി, പോലീസ് സ്റ്റേഷനിൽ കീഴടങ്ങി.
ദമ്പതികൾ ഷില്ലോംഗിൽ എത്തിയതിൻ്റെയും ചിറാപുഞ്ചിയിലേക്ക് യാത്ര തിരിച്ചതിൻ്റെയും സിസിടിവി ദൃശ്യങ്ങൾ അന്വേഷണ സംഘം ശേഖരിച്ചിട്ടുണ്ട്. സ്കൂട്ടറിലെ ജിപിഎസ് ഡാറ്റ പരിശോധിച്ചതിൽ നിന്നും ദമ്പതികൾക്കൊപ്പം മറ്റ് ചിലരും ഉണ്ടായിരുന്നതായി പോലീസിന് സൂചന ലഭിച്ചിട്ടുണ്ട്.
