ഇന്ത്യയിലെ ഏറ്റവും വലിയ മാധ്യമ സംരംഭങ്ങളിലൊന്നായ നെറ്റ്‌വർക്ക് 18-ന്റെയും ഡിജിറ്റൽ പ്ലാറ്റ്‌ഫോമുകൾ, വിനോദ ചാനലുകൾ, കണ്ടന്റ് സ്ട്രീമിംഗ് പ്ലാറ്റ്‌ഫോമുകൾ എന്നിവയുടെയും ഉടമയായ മുകേഷ് അംബാനി, എന്റർടെയിൻമെന്റ് വിപണിയുടെയും ഡിജിറ്റൽ സാങ്കേതികവിദ്യകളുടെയും സംയോജനം തന്ത്രപരവും സാമ്പത്തികവുമായ അവസരങ്ങൾ സൃഷ്ടിച്ചിട്ടുണ്ടെന്ന് പറഞ്ഞു.
“ഇന്ത്യയുടെ മാധ്യമ വിനോദ വ്യവസായത്തിന് ഇന്ന് 28 ബില്യൺ ഡോളർ വിലമതിക്കുന്നു. അടുത്ത ദശകത്തിൽ ഇത് 100 ബില്യൺ ഡോളറിലധികം വളരും.” മുംബൈയിൽ നടന്ന WAVES 2025 കോൺഫറൻസിന്റെ ഉദ്ഘാടന വേളയിൽ സംസാരിക്കവെയാണ് അദ്ദേഹം ഇക്കാര്യം പറഞ്ഞത്. “ഈ വളർച്ച സംരംഭകത്വത്തെ പ്രോത്സാഹിപ്പിക്കുകയും ദശലക്ഷക്കണക്കിന് തൊഴിലവസരങ്ങൾ സൃഷ്ടിക്കുകയും വിവിധ മേഖലകളിൽ ഒരു ചലനമുണ്ടാക്കുകയും ചെയ്യും,” അദ്ദേഹം പറഞ്ഞു.
ഇന്ത്യ ഒരു മുൻനിര ഡിജിറ്റൽ രാഷ്ട്രമായി മാറിയെന്നും എന്റർടൈൻമെന്റ് മേഖലയുടെയും ഡിജിറ്റൽ സാങ്കേതികവിദ്യകളുടെയും സംയോജനം ഇന്ത്യക്ക് മാത്രമുള്ള പ്രത്യേകതയാണെന്നും അദ്ദേഹം കൂട്ടിച്ചേർത്തു.
“വിനോദത്തിന്റെയും സാംസ്കാരികാനുഭവത്തിന്റെയും സ്വാധീനവും വ്യാപ്തിയും സങ്കൽപ്പിക്കാൻ പോലും കഴിയാത്തത്ര രീതിയിൽ ഇത് വർദ്ധിപ്പിച്ചു. AI-യുടെയും ഇമ്മേഴ്‌സീവ് സാങ്കേതികവിദ്യകളുടെയും ഉപകരണങ്ങൾക്ക് നമ്മുടെ കഥകളെ എന്നത്തേക്കാളും ആകർഷകമാക്കാൻ കഴിയും. കൂടാതെ ഭാഷകൾ, രാജ്യങ്ങൾ, സംസ്കാരങ്ങൾ എന്നിവയിലുടനീളമുള്ള പ്രേക്ഷകരിലേക്ക് തൽക്ഷണം എത്തിക്കാനും സാധിക്കും.”
ആർട്ടിഫിഷ്യല്‍ സാങ്കേതിക വിദ്യ ഉപയോഗിച്ച് ഇന്ത്യയിലെ അതിസമർത്ഥരായ യുവ കണ്ടന്റ് ക്രിയേറ്റർമാർ ആഗോള വിനോദ വ്യവസായത്തെ ബ്ലോക്ക്ബസ്റ്ററുകളിലൂടെ ഭരിക്കുമെന്ന് അംബാനി അഭിപ്രായപ്പെട്ടു. “വർദ്ധിച്ചുവരുന്ന പ്രക്ഷുബ്ധവും അനിശ്ചിതത്വങ്ങൾ നിറഞ്ഞതുമായ ലോകത്ത്, നമ്മുടെ കഥകൾ ഒന്നിപ്പിക്കാനും പ്രചോദിപ്പിക്കാനും സമ്പന്നമാക്കാനും കഴിയുന്ന ശക്തിയിലൂടെ മികച്ച ഭാവിക്കുള്ള പ്രതീക്ഷ നൽകുന്നു,” അദ്ദേഹം പറഞ്ഞു. ഇന്ത്യയുടെ വിനോദ സാംസ്കാരിക വ്യവസായം വെറുമൊരു മൃദുശക്തി മാത്രമല്ല, അതൊരു യഥാർത്ഥ ശക്തിയാണ്.
“5,000 വർഷത്തിലേറെ പഴക്കമുള്ള നമ്മുടെ പൈതൃകത്തിൽ രാമായണം, മഹാഭാരതം മുതൽ വിവിധ ഭാഷകളിലെ നാടോടിക്കഥകളും ക്ലാസിക്കുകളും വരെയുള്ള അനശ്വരമായ കഥകളുടെ വലിയ നിധി ശേഖരം നമുക്കുണ്ട്. സാഹോദര്യം, അനുകമ്പ, ധൈര്യം, സ്നേഹം, സൗന്ദര്യം, പ്രകൃതിയോടുള്ള കരുതൽ തുടങ്ങിയ സാർവത്രിക മാനുഷിക മൂല്യങ്ങളെ അവ ആഘോഷിക്കുന്നതിനാൽ അവ ലോകമെമ്പാടുമുള്ള ആളുകളുടെ ഹൃദയങ്ങളെ സ്പർശിക്കുന്നു,” അദ്ദേഹം പറഞ്ഞു.
“ഇന്ത്യയുടെ കഥപറച്ചിൽ ശക്തിക്ക് തുല്യമായി ഒരു രാഷ്ട്രത്തിനും വരാൻ കഴിയില്ല. അതിനാൽ വലിയ ആത്മവിശ്വാസത്തോടെയും സർഗ്ഗാത്മകതയോടെയും ഒരു വിഭജിക്കപ്പെട്ട ലോകത്തെ സുഖപ്പെടുത്താൻ നമ്മുടെ കഥകൾ ആഗോളതലത്തിൽ എത്തിക്കാം.” ആധുനിക സാങ്കേതികവിദ്യകളുടെ ശക്തിയോടെ പുരാതന ഇന്ത്യ അഭൂതപൂർവമായ നവോത്ഥാനം അനുഭവിക്കുകയാണെന്ന് അദ്ദേഹം പറഞ്ഞു.
പഹൽഗാമിലെ സമീപകാല ഭീകരാക്രമണത്തെക്കുറിച്ച് പരാമർശിച്ച അംബാനി, പ്രധാനമന്ത്രി നരേന്ദ്ര മോദിയുടെ സാന്നിധ്യം “പ്രതീക്ഷ, ഐക്യം, തളരാത്ത ദൃഢനിശ്ചയം” എന്നിവയുടെ ശക്തമായ സന്ദേശം നൽകുന്നുവെന്ന് പറഞ്ഞു. “ഇവിടെ ഒത്തുകൂടിയ നാമെല്ലാവരും ഇരകളുടെ കുടുംബങ്ങൾക്ക് ഹൃദയം നിറഞ്ഞ അനുശോചനം അർപ്പിക്കുന്നു,” അദ്ദേഹം പറഞ്ഞു. “മോദിജി, സമാധാനത്തിനും നീതിക്കും മാനവികതയ്ക്കും എതിരായ ശത്രുക്കൾക്കെതിരായ ഈ പോരാട്ടത്തിൽ 145 കോടി ഇന്ത്യക്കാരുടെ പൂർണ്ണ പിന്തുണ നിങ്ങൾക്കുണ്ട്. അവരുടെ പരാജയം ഉറപ്പാണ്. ഇന്ത്യയുടെ വിജയവും സുനിശ്ചിതമാണ്.”
സമ്മേളനത്തെക്കുറിച്ച് സംസാരിക്കവെ, 90 രാജ്യങ്ങളിൽ നിന്നുള്ള പ്രതിനിധികളും 10,000 പ്രതിനിധികളും WAVES 2025-ൽ പങ്കെടുക്കുന്നുണ്ടെന്ന് അദ്ദേഹം പറഞ്ഞു. “ഇതാണ് നയാ ഭാരതത്തിൻ്റെ ജോഷ് – ന്യൂ ഇന്ത്യയുടെ സ്പിരിറ്റ്. അതിൻ്റെ സ്വപ്നങ്ങളിൽ ധീരതയുണ്ട്. അതിൻ്റെ നടത്തിപ്പിൽ വേഗതയുണ്ട്. ആഗോള നിലവാരം മറികടക്കാൻ ദൃഢനിശ്ചയമുണ്ട്.”
