മാന്നാർ ആലുംമൂട്ടിൽ താമരപ്പള്ളി വീട്ടിൽ ജയന്തിയെ (39) കൊലപ്പെടുത്തിയ കേസിൽ പ്രതിയായ ഭർത്താവ് കുട്ടികൃഷ്ണന് (60) മാവേലിക്കര അഡീഷണൽ ജില്ലാ സെഷൻസ് കോടതി (ഒന്ന്) വധശിക്ഷ വിധിച്ചു.
2004 ഏപ്രിൽ 2-ന് പകൽ മൂന്നോടെയാണ് ഈ ഞെട്ടിക്കുന്ന സംഭവം ഉണ്ടായത്. ഒന്നര വയസ്സുള്ള മകളുടെ മുന്നിൽ വച്ച് കറിക്കത്തി, ഉളി, ചുറ്റിക എന്നിവ ഉപയോഗിച്ച് ജയന്തിയെ കൊലപ്പെടുത്തിയെന്നാണ് പ്രോസിക്യൂഷൻ കേസ്. ഭാര്യയെ സംശയിച്ച കുട്ടികൃഷ്ണൻ ഈ ക്രൂരകൃത്യം ചെയ്തതായി അന്വേഷണത്തിൽ തെളിഞ്ഞു.
കൊലപാതകം നടത്തിയ ദിവസം തന്നെ കുട്ടികൃഷ്ണൻ മാന്നാർ പോലീസ് സ്റ്റേഷനിൽ എത്തി ഭാര്യ മരിച്ച വിവരം അറിയിച്ചിരുന്നു. എന്നാൽ പിന്നീട് നടത്തിയ അന്വേഷണത്തിൽ കുറ്റകൃത്യം ചെയ്തത് അയാളാണെന്ന് തെളിഞ്ഞു. ജാമ്യത്തിൽ പുറത്തിറങ്ങിയ പ്രതിയെ 2023-ലാണ് വീണ്ടും പിടികൂടിയത്.
ഒന്നര വയസ്സുള്ള കുഞ്ഞിന്റെ മുന്നിൽ വച്ച് അമ്മയെ അതിക്രൂരമായി കൊലപ്പെടുത്തിയ പ്രതി ശിക്ഷയിൽ ഇളവ് അർഹിക്കുന്നില്ലെന്ന് പബ്ലിക് പ്രോസിക്യൂട്ടർ പി.വി. സന്തോഷ് കുമാർ വാദിച്ചു. എന്നാൽ പ്രതിഭാഗം പ്രായം കൂടിയതും ആരുടേയും തുണയില്ലാത്തതും പരിഗണിച്ച് ശിക്ഷയിൽ ഇളവ് നൽകണമെന്ന് ആവശ്യപ്പെട്ടു.
വിവാഹശേഷം മാന്നാർ ആലുംമൂട് ജംഗ്ഷന് സമീപം വീട് വാങ്ങി ജയന്തിയുമൊത്ത് താമസിക്കുകയായിരുന്നു കുട്ടികൃഷ്ണൻ. ഭാര്യയെ സംശയിച്ച കുട്ടികൃഷ്ണൻ മാരകായുധങ്ങൾ ഉപയോഗിച്ച് കൊലപ്പെടുത്തുകയായിരുന്നു. കൊല നടത്തി തൊട്ടടുത്ത ദിവസം രാവിലെ കുഞ്ഞുമായി മാന്നാർ പോലീസ് സ്റ്റേഷനിലെത്തി കുറ്റം സമ്മതിക്കുമ്പോഴാണ് കൃത്യം പുറത്തറിഞ്ഞത്. തുടർന്ന് അറസ്റ്റിലായ കുട്ടികൃഷ്ണൻ പിന്നീട് ജാമ്യത്തിൽ പുറത്തിറങ്ങുകയും മുങ്ങുകയുമായിരുന്നു. ഇതോടെ കേസില്‍ വിചാരണ വൈകി.
