വീണ്ടും മിസൈൽ പരീക്ഷണവുമായി ഉത്തരകൊറിയ

സീയൂൾ: യുഎൻ ഉപരോധങ്ങൾ ലംഘിച്ച് ഉത്തരകൊറിയ വീണ്ടും ഭൂഖണ്ഡാന്തര ബാലിസ്റ്റിക് മിസൈൽ (ഐസിബിഎം) പരീക്ഷിച്ചു. ഉത്തരകൊറിയയുടെ കിഴക്കൻ തീരത്ത് നിന്ന് ദക്ഷിണ കൊറിയയുടെ കിഴക്കൻ കടലിലേക്കാണ് മിസൈൽ തൊടുത്തുവിട്ടത്. ടോക്കിയോയും വിക്ഷേപണം സ്ഥിരീകരിച്ചു.

കഴിഞ്ഞ ദിവസവും ഉത്തരകൊറിയ ഭൂഖണ്ഡാന്തര ബാലിസ്റ്റിക് മിസൈൽ പരീക്ഷിച്ചിരുന്നു. ദൂരപരിധി ഏറ്റവും കൂടിയ മിസൈലാണ് തൊടുത്തുവിട്ടത്. കുത്തനെ മേലോട്ടു വിട്ട മിസൈൽ 86 മിനിറ്റുകൊണ്ട് 7,000 കിലോമീറ്റർ ഉയരത്തിലെത്തി. ചരിച്ചുവിട്ടാൽ ഈ മിസൈലിന് ഇതിൻറെ പലമടങ്ങു ദൂരം സഞ്ചരിക്കാനാകും. ശത്രുവിനു നേർക്ക് ആയുധം പ്രയോഗിക്കാൻ മടിക്കില്ലെന്നു വ്യക്തമാക്കുന്നതാണു പരീക്ഷണമെന്ന് വിക്ഷേപണത്തിന് പിന്നാലെ ഉത്തരകൊറിയൻ നേതാവ് കിം ജോംഗ് ഉൻ പറഞ്ഞു. യുഎൻ രക്ഷാസമിതി പ്രമേയങ്ങളുടെ നഗ്‌നമായ ലംഘനമാണു പരീക്ഷണമെന്ന് യുഎസ് പ്രതികരിച്ചു.

മിസൈലുകൾ ഏകദേശം 400 കിലോമീറ്റർ (250 മൈൽ) പറന്നതായി ദക്ഷിണ കൊറിയയുടെ ജോയിന്റ് ചീഫ് ഓഫ് സ്റ്റാഫ് പറഞ്ഞു, എന്നാൽ എത്ര എണ്ണം തൊടുത്തുവിട്ടുവെന്ന് വ്യക്തമാക്കിയിട്ടില്ല. ജപ്പാന്റെ എക്സ്‌ക്ലൂസീവ് ഇക്കണോമിക് സോണിന് പുറത്തുള്ള സമുദ്രത്തിലാണ് ഇവ പതിച്ചതെന്നും നാശനഷ്ടങ്ങൾ ഉടനടി റിപ്പോർട്ട് ചെയ്തിട്ടില്ലെന്നും ജപ്പാൻ പ്രധാനമന്ത്രി ഷിഗെരു ഇഷിബ പറഞ്ഞു.

ഉത്തരകൊറിയൻ നേതാവ് കിം ജോങ് ഉന്നിന്റെ മേൽനോട്ടത്തിൽ യു.എസ്. മെയിൻലാൻഡിൽ എത്താൻ രൂപകൽപ്പന ചെയ്ത രാജ്യത്തിന്റെ ഏറ്റവും പുതിയ ഭൂഖണ്ഡാന്തര ബാലിസ്റ്റിക് മിസൈലിന്റെ പരീക്ഷണം നടത്തി ദിവസങ്ങൾക്ക് ശേഷമാണ് പുതിയ വിക്ഷേപണം നടന്നത്. ഇതിന് മറുപടിയായി, ഞായറാഴ്ച ദക്ഷിണ കൊറിയയും ജപ്പാനുമായി നടത്തിയ ത്രിരാഷ്ട്ര ശക്തിപ്രകടനത്തിൽ അമേരിക്ക ഒരു ദീർഘദൂര ബി-1 ബി ബോംബർ രംഗത്തിറങ്ങിയിരുന്നു. അമേരിക്കൻ മിസൈൽ പ്രദർശനത്തെ ഉത്തരകൊറിയൻ ഭരണാധികാരിയുടെ സഹോദരി അപലപിച്ചിരുന്നു. ഉത്തര കൊറിയയുടെ എതിരാളികൾ ‘ആക്രമണാത്മകവും സാഹസികവുമായ സൈനിക ഭീഷണികൾ’ ഉപയോഗിച്ച് പിരിമുറുക്കം ഉയർത്തുന്നുവെന്നായിരുന്നു ആരോപണം.

യുഎസ് പ്രസിഡന്റ് തിരഞ്ഞെടുപ്പിന് സമീപ ദീവസങ്ങളിൽ ഉത്തരകൊറിയ സൈനിക പ്രദർശനം നടത്താൻ സാധ്യതയുണ്ടെന്ന് ദക്ഷിണ കൊറിയൻ ഉദ്യോഗസ്ഥർ പറഞ്ഞു. ഏഴാമത്തെ ആണവ പരീക്ഷണത്തിനുള്ള ഒരുക്കങ്ങൾ ഉത്തരകൊറിയ പൂർത്തിയാക്കിയതായി ദക്ഷിണ കൊറിയയുടെ സൈനിക രഹസ്യാന്വേഷണ ഏജൻസി കഴിഞ്ഞ ആഴ്ച അറിയിച്ചിരുന്നു.

പുതിയ യുഎസ് പ്രസിഡന്റ് തിരഞ്ഞെടുക്കപ്പെട്ടതിന് ശേഷം ഉപരോധം ഒഴിവാക്കൽ പോലുള്ള ഇളവുകൾ നേടുന്നതിന് വിപുലീകരിച്ച ആണവായുധ ശേഖരം പ്രയോജനപ്പെടുത്താൻ ഉത്തര കൊറിയ ശ്രമിക്കുന്നതായാണ് അന്തരാഷ്ട്ര നിരീക്ഷകർ ചൂണ്ടിക്കാട്ടുന്നത്. അമേരിക്കൻ പ്രസിഡന്റ് സ്ഥാനത്തേക്ക് ഡൊണാൾഡ് ട്രംപിനെയാണ് കിം ജോങ് ഉൻ ആഗ്രഹിക്കുന്നത്. ട്രംപ് യുഎസ് പ്രസിഡന്റായിരുന്നപ്പോൾ പലവിധ കരാറുകളിൽ ഇരു രാജ്യങ്ങളും ഏർപ്പെട്ടിരുന്നു. അത്തരമൊരു സാഹചര്യം ആവർത്തിക്കുന്നതിനാണ് ഉത്തര കൊറിയ ആഗ്രഹിക്കുന്നത്. ഇതിലേക്ക് ശ്രദ്ധ എത്തിക്കുകയാണ് ഉത്തരകൊറിയയുടെ അടിക്കടിയുള്ള മിസൈൽ പരീക്ഷണമെന്ന് വിലയിരുത്തുന്നുമുണ്ട്.

എന്നാൽ, ഇത്തരം മിസൈൽ പരീക്ഷണങ്ങളെ ഭയക്കേണ്ട സാഹചര്യമില്ലെന്ന് കരുതുന്നവരുമുണ്ട്. ഒക്ടോബർ 31 ന് താൻ പരീക്ഷിച്ച ഹ്വാസോംഗ്-19 ‘ലോകത്തിലെ ഏറ്റവും ശക്തമായ’ ഭൂഖണ്ഡാതര മിസൈലാണെന്ന് (ICBM) ആണെന്ന് ഉത്തര കൊറിയ അവകാശപ്പെട്ടിരുന്നു. , എന്നാൽ ഖര-ഇന്ധന മിസൈൽ യുദ്ധത്തിൽ ഉപയോഗപ്രദമാകാത്തത്ര വലുതാണെന്ന് വിദഗ്ധർ പറയുന്നു. അന്തരീക്ഷ പുനഃപ്രവേശനത്തിന്റെ കഠിനമായ സാഹചര്യങ്ങളെ വാർഹെഡ് അതിജീവിക്കുന്നുവെന്ന് ഉറപ്പാക്കുക പോലുള്ള ഐസിബിഎം നിർമ്മിക്കുന്നതിനുള്ള ചില നിർണായക സാങ്കേതിക വിദ്യകൾ ഉത്തരകൊറിയ ഇതുവരെ നേടിയിട്ടില്ലെന്നാണ് ഇവരുടെ നിരീക്ഷണം.

വ്ളാഡിമിർ പുടിന്റെ യുദ്ധത്തെ പിന്തുണയ്ക്കാൻ റഷ്യക്ക് ആയുധങ്ങളും സൈനികരും നൽകുമ്പോൾ, കിം തന്റെ വിപുലീകരിക്കുന്ന ആണവായുധങ്ങളും മിസൈൽ പദ്ധതികളും ആവർത്തിച്ച് പുറത്തെടുത്തതോടെ ഇരു കൊറിയകളും തമ്മിലുള്ള സംഘർഷസാധ്യത ഏറിയിരിക്കുകയാണ്.