രത്തൻ ടാറ്റയുടെ പിൻഗാമി നോയൽ : ടാറ്റ ട്രസ്റ്റിന്റെ തലപ്പത്തേക്ക്

ടാറ്റ ട്രസ്റ്റ് ചെയർമാനായി നോയൽ ടാറ്റയെ തിരഞ്ഞെടുത്തു. മഹാ വ്യവസായി രത്തൻ ടാറ്റയുടെ വിയോഗത്തെ തുടർന്ന് അദ്ദേഹത്തിന്റെ അർദ്ധ സഹോദരനായ നോയലിനെ ചെയർമാനായി തിരഞ്ഞെടുക്കകയായിരുന്നു. രത്തൻ ടാറ്റയുടെ പിൻഗാമി ആരാകുമെന്ന ചോദ്യങ്ങൾ നേരത്തെ ഉയർന്നു വന്നിരുന്നു. ഇതിന്റെ പശ്ചാത്തലത്തിലാണ് തീരുമാനം. ഗ്രൂപ്പിന്റെ പിന്തുടർച്ച സംബന്ധിച്ച കാര്യങ്ങൾ ചർച്ച ചെയ്യാൻ ഇന്ന് യോഗം വിളിച്ചിരുന്നു.

നിലവിൽ സർ ദോറാബ്ജി ടാറ്റ ട്രസ്റ്റിൻ്റെയും സർ രത്തൻ ടാറ്റ ട്രസ്റ്റിൻ്റെയും പ്രധാന ട്രസ്റ്റിയാണ് നോയൽ ടാറ്റ. ഇനി മുതൽ ടാറ്റ ഗ്രൂപ്പിൻ്റെ പ്രൈമറി ഹോൾഡിംഗ് കമ്പനിയായ ടാറ്റ സൺസിൻ്റെ നിയന്ത്രണ ഓഹരി കൈവശമുള്ള ട്രസ്റ്റുകളെ അദ്ദേഹം നയിക്കും. ടാറ്റ സാമ്രാജ്യത്തിൻ്റെ ജീവകാരുണ്യ വിഭാഗത്തിൽ രത്തൻ ടാറ്റയുടെ വിയോഗം ഒരു പ്രധാന നേതൃത്വ വിടവായി അവശേഷിക്കുന്നുണ്ട് . ഇത് നികത്താനും കൂടിയാണ് നോയൽ ടാറ്റയെ തന്നെ ചെയർമാനായി നിയമിച്ചിരിക്കുന്നത്. തൻ്റെ മരണത്തിന് മുമ്പ് രത്തൻ ടാറ്റ, ടാറ്റ ട്രസ്റ്റുകളുടെ നേതൃത്വത്തിലേക്ക് ഒരു പിൻഗാമിയെ പ്രഖ്യാപിച്ചിരുന്നില്ല, ഇത് ട്രസ്റ്റുകളുടെ ഭാവി ഭരണത്തെക്കുറിച്ചുള്ള ഊഹാപോഹങ്ങൾക്ക് കാരണമായി. അതേസമയം, ടാറ്റ ട്രസ്റ്റുകളുമായുള്ള നോയൽ ടാറ്റയുടെ അടുത്ത പങ്കാളിത്തവും കമ്പനിയിലെ അദ്ദേഹത്തിൻ്റെ വിപുലമായ അനുഭവവും കണക്കിലെടുത്താണ് നീക്കം.

നിലവിൽ ട്രെൻ്റ്, വോൾട്ടാസ് ലിമിറ്റഡ് , ടാറ്റ ഇൻ്റർനാഷണൽ, ടാറ്റ ഇൻവെസ്റ്റ്‌മെൻ്റ് കോർപ്പറേഷൻ എന്നിവയുടെ ചെയർമാനാണ് അദ്ദേഹം . 2019-ൽ സർ രത്തൻ ടാറ്റ ട്രസ്റ്റ് ബോർഡിൽ നിയമിതനായ അദ്ദേഹം ക്രമേണ ഗ്രൂപ്പിനുള്ളിൽ കൂടുതൽ പ്രധാന വേഷങ്ങൾ ഏറ്റെടുത്തു. 2018ൽ ടൈറ്റൻ കമ്പനിയുടെ വൈസ് ചെയർമാനും 2022ൽ ടാറ്റ സ്റ്റീൽ വൈസ് ചെയർമാനുമായി.

2010 മുതൽ 2021 വരെ ടാറ്റ ഇൻ്റർനാഷണൽ ലിമിറ്റഡിലെ സിഇഒ ആയി സേവനമനുഷ്ഠിച്ച നോയൽ ടാറ്റയുടെ നേതൃത്വത്തിൽ കമ്പനിയുടെ വരുമാനം 500 മില്യണിൽ നിന്ന് 3 ബില്യൺ ഡോളറായി ഉയർന്നു. ടാറ്റ സ്റ്റീൽ, വോൾട്ടാസ് തുടങ്ങിയ പ്രമുഖ ടാറ്റ കമ്പനികളുടെ ബോർഡുകളിൽ അദ്ദേഹം സേവനം തുടരുന്നു.