മൊബൈൽ നിരക്ക് വർധന; ജിയോയുൾപ്പെടയുള്ള സ്വകാര്യ ടെലികോം കമ്പനികൾക്ക് തിരിച്ചടി; ബിഎസ്എൻഎല്ലിന് കോളടിച്ചു

മൊബൈൽ സേവന രംഗത്ത് മുൻ നിരയിൽ നിൽക്കുന്ന സ്വകാര്യ ടെലികോം കമ്പനികളെ പിന്നിലാക്കി പൊതുമേഖലാ ടെലികോം സേവന ദാതാക്കളായ ബിഎസ്എൻ എല്ലിന്റെ അതിവേഗ മുന്നേറ്റം. ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) യുടെ കണക്കുകൾ പ്രകാരം ബിഎസ്എൻഎൽ ജൂലൈയിൽ 2.9 ദശലക്ഷം ഉപയോക്താക്കളെ ചേർത്തു. ഇതോടെ ജൂലൈയിൽ ദേശീയ തലത്തിൽ ഉപയോക്താക്കളെ വർധിപ്പിച്ചത് ബിഎസ്എൻഎല്ലാണ്.

സ്വകാര്യകമ്പനികൾ നിരക്കുകൾ വർധിപ്പിച്ചപ്പോൾ ബിഎസ്എൻഎൽ നിരക്കുകളിൽ മാറ്റമില്ലാതെ തുടരുകയാണ്. ബിഎസ്എൻഎൽ എൻട്രി ലെവൽ പ്ലാനുകൾ ഉപയോഗിക്കുന്ന നിരവധി ഉപയോക്താക്കൾ റിലയൻസ് ജിയോ, ഭാരതി എയർടെൽ, വോഡഫോൺ ഐഡിയ (Vi) എന്നിവയിൽ നിന്ന് മാറിയതായി വിദഗ്ധർ ചൂണ്ടിക്കാണിച്ചു.

അതേസമയം, ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) നൽകിയ കണക്കുകൾ പ്രകാരം ജൂണിൽ ബിഎസ്എൻഎല്ലിന് 0.74 ദശലക്ഷം ഉപയോക്താക്കളെ നഷ്ടപ്പെട്ടിരുന്നുവെങ്കിലും ജൂലൈയിൽ അതിനെ നികത്തികൊണ്ട് 2.9 ദശലക്ഷം ഉപയോക്താക്കളെ ചേർക്കുകയായിരുന്നു .

കഴിഞ്ഞ ദിവസം പുറത്തുവിട്ട ഡാറ്റ പ്രകാരം ജൂണിൽ 1.91 മില്യൺ നേടിയതിന് പിന്നാലെ ജിയോയ്ക്ക് ജൂലൈയിൽ 0.7 ദശലക്ഷം ഉപയോക്താക്കളെ നഷ്ടപ്പെട്ടു. ഏറ്റവും കൂടുതൽ ഉപയോക്താക്കൾ വിട്ടുമാറിയത് എയർടെലിലാണ്.ജൂണിൽ 1.25 മില്യൺ ഉപയോക്താക്കളെ ചേർത്തതിന് പിന്നാലെ ജൂലൈയിൽ എയർടെലിന്1.69 മില്യൺ ഉപയോക്ക്താക്കൾ നഷ്ടമായി.

അതേസമയം, സാമ്പത്തിക മാന്ദ്യത നേരിടുന്ന വോഡഫോൺ ഐഡിയയ്ക്ക് 1.41 ദശലക്ഷം ഉപയോക്താക്കളെ നഷ്ടപ്പെട്ടു. ഇതോടെ കഴിഞ്ഞ രണ്ട് വർഷം തുടർച്ചയായി സ്വകാര്യ ടെലികോം മേഖലയിൽ, ജൂൺ വരെ കൂടുതൽ ഉപയോക്താക്കളെ നഷ്‌ടപ്പെട്ടു. മൊത്തം 0.86 ദശലക്ഷം ഉപയോക്താക്കളെയാണ് നഷ്‌ടപ്പെട്ടതെന്ന് കണക്കുകൾ വ്യക്തമാക്കുന്നു.

നിരക്ക് വർധന സിം ഏകീകരണത്തിനും സബ്‌സ്‌ക്രിപ്‌ഷൻ റദ്ദാക്കലിനും കാരണമായെന്ന് റിപ്പോർട്ടുകൾ
പറയുന്നു. കഴിഞ്ഞ മൂന്ന് മാസങ്ങളിൽ 1.58 ദശലക്ഷവും 2 ദശലക്ഷവും 1.47 ദശലക്ഷവും വർദ്ധിച്ചതിന് ശേഷം ജൂലൈയിൽ ഇന്ത്യയിലെ മൊത്തത്തിലുള്ള മൊബൈൽ ഫോൺ കണക്ഷനുകളുടെ എണ്ണം 0.92 ദശലക്ഷമായി കുറഞ്ഞു.

ജൂണിൽ 11.84 ദശലക്ഷത്തിൽ നിന്ന് 13.68 ദശലക്ഷം വരിക്കാർ മൊബൈൽ നമ്പർ പോർട്ടബിലിറ്റിക്ക് (എംഎൻപി) അപേക്ഷ സമർപ്പിച്ചതായി ട്രായ് ഡാറ്റ വെളിപ്പെടുത്തുന്നു.

ഏറ്റവും പുതിയ കൂട്ടിച്ചേർക്കലുകൾ ഉണ്ടായിരുന്നിട്ടും, 2024-ൻ്റെ തുടക്കത്തെ അപേക്ഷിച്ച് ജൂലൈ അവസാനത്തോടെ ബിഎസ്എൻഎൽ-ന് 3.26 ദശലക്ഷം ഉപയോക്താക്കളുടെ എണ്ണം കുറവായിരുന്നു. അടുത്ത വർഷം പകുതിയോടെ 100,000 ടവറുകളുമായി രാജ്യമൊട്ടാകെ 4G നെറ്റ്‌വർക്ക് പുറത്തിറക്കാനാണ് സ്ഥാപനം ഇപ്പോൾ ലക്ഷ്യമിടുന്നത്. .

ഡൽഹി, മുംബൈ, കൊൽക്കത്ത, ചെന്നൈ എന്നീ നാല് മെട്രോ നഗരങ്ങളിലും ടെലികോം 4ജി സൈറ്റുകൾ സ്ഥാപിച്ചിരുന്നു. അഹമ്മദാബാദ്, ഹൈദരാബാദ്, ജയ്പൂർ, ലഖ്‌നൗ, റായ്പൂർ, ചണ്ഡീഗഡ് തുടങ്ങി ഒട്ടുമിക്ക സംസ്ഥാന തലസ്ഥാനങ്ങളിലും സൈറ്റുകൾ സജീവമാണെന്ന് ബിഎസ്എൻഎൽ അധികൃതർ അറിയിച്ചു.

എന്നാൽ ബിഎസ്എൻഎൽ ജൂലൈയിൽ പുറത്തിറക്കിയ പുതിയ 4G പ്ലാനുകളും മറ്റുള്ളവരെക്കാൾ മുൻതൂക്കം നൽകിയിരിക്കാം. പുതിയ ഉപയോക്താക്കൾക്ക് 28 ദിവസത്തേക്ക് അൺലിമിറ്റഡ് വോയ്‌സ് കോളുകൾ, 1 ജിബി പ്രതിദിന 4ജി ഡാറ്റ എന്നിവയ്‌ക്കൊപ്പം 108 രൂപ പ്ലാൻ ലഭിക്കും.

അതേസമയം, എയർടെലിന്റെ ഏറ്റവും നിരക്ക് കുറഞ്ഞ പ്രതിമാസ പ്ലാനിന് 199 രൂപയാണ്. കൂടാതെ 9 ജിബി, 6 ജിബി, 3 ജിബി അധിക 4ജി ഡാറ്റ വാഗ്ദാനം ചെയ്യുന്ന ജിയോയുടെ ഏറ്റവും കുറഞ്ഞ പ്രതിമാസ പ്ലാനുകൾക്ക് യഥാക്രമം 151 രൂപ, 101 രൂപ, 51 രൂപ എന്നിങ്ങനെയാണ് നിരക്ക് .

നിരക്ക് വർദ്ധന

30 മാസത്തെ റെക്കോർഡ് തകർത്തുകൊണ്ട്, ഇന്ത്യയിലെ ടെലികോം മേഖലയിൽ മൂന്ന് സ്വകാര്യ മേഖലയിലെ ടെലികോം കമ്പനികൾ ജൂലൈ 3-4 മുതൽ നിരക്കുകൾ ഉയർത്തി. ജൂൺ അവസാനത്തോടെ, ഭാരതി എയർടെലും വോഡഫോൺ ഐഡിയയും മൊബൈൽ നിരക്കുകളിൽ 21 ശതമാനം വരെ വർദ്ധനവ് പ്രഖ്യാപിച്ചപ്പോൾ ജിയോ 12-25 ശതമാനം വർദ്ധനവ് നടപ്പാക്കി.

ടെലികോം കമ്പനികൾക്കിടയിൽ, എയർടെൽ നിരക്കുകൾ ഒരു ചെറിയ തോതിൽ ഉയർത്തിയപ്പോൾ, അതിൻ്റെ 2G വരിക്കാരുടെ സബ്‌സ്‌ക്രിപ്ഷനെ ബാധിച്ചു. ജിയോ ആ വിഭാഗത്തെ തൊട്ടിട്ടില്ല . 28 ദിവസം മുതൽ ഒരു വർഷം വരെ നീളുന്ന അൺലിമിറ്റഡ് ഡാറ്റ പ്ലാനുകളിൽ വിഐ ശ്രദ്ധ കേന്ദ്രീകരിച്ചു.

വിപണിയുടെ ഭൂരിഭാഗവും ഏകീകൃതമായതിനാൽ നിരക്ക് വർദ്ധനയ്ക്ക് ശേഷം ഉപഭോക്താവ് പ്രതിസന്ധിയിലാവുമെന്ന് നേരത്തെ വിദഗ്ധർ പ്രവചിച്ചിരുന്നു.