ന്യൂ ഡൽഹി: മ്യാൻമറുമായുള്ള അതിർത്തി വേലികെട്ടി അടയ്ക്കാൻ ഇന്ത്യ. 31,000 കോടി രൂപ മുടക്കി 1,643 കിലോമീറ്റർ നീളത്തിലാകും വേലികെട്ടി അടയ്ക്കുക. അനധികൃത ആയുധക്കടത്തിന്‍റെയും മയക്കുമരുന്ന് കടത്തിന്‍റെയും പേരില്‍ കുപ്രസിദ്ധി നേടിയ അതിര്‍ത്തിയാണ് ഇന്ത്യ വേലികെട്ടി അടയ്ക്കുക. ഈ അതിർത്തിയാണ് മണിപ്പൂരിലെ കലാപത്തിൻറെ മൂലകാരണം എന്ന് അമിത് ഷാ പറഞ്ഞു.
മ്യാൻമർ ഇന്ത്യ അതിർത്തിയിൽ 30 കിലോമീറ്റർ ചുറ്റളവിൽ വേലികെട്ടൽ പൂർത്തിയായതായും കേന്ദ്ര ആഭ്യന്തരമന്ത്രി അമിത് ഷാ വ്യക്തമാക്കി. സുരക്ഷ സംബന്ധിച്ച മന്ത്രിസഭാ സമിതി വേലികെട്ടൽ പദ്ധതിക്ക് തത്വത്തില്‍ അംഗീകാരം നല്‍കി.
ഇന്ത്യയിലേയും മ്യാൻമറിലെയും അതിര്‍ത്തി പ്രദേശങ്ങളിലെ ജനങ്ങള്‍ക്ക് രേഖകളൊന്നുമില്ലാതെ അതിര്‍ത്തിയില്‍ ഇരുവശത്തേക്കും 16 കിലോമീറ്റര്‍ വരെ സഞ്ചരിക്കാന്‍ അനുമതി നല്‍കിയിരുന്ന ഇന്ത്യ-മ്യാൻമർ ഫ്രീ മൂവ്‌മെന്‍റ് റെജിം (എഫ്എംആര്‍) കേന്ദ്രസര്‍ക്കാര്‍ റദ്ദാക്കിയിരുന്നു. ഇന്ത്യയുടെ 2018-ലെ ആക്ട് ഈസ്റ്റ് നയം പ്രകാരമായിരുന്നു ഇത് റദ്ദാക്കിയത്.
അതിര്‍ത്തിയില്‍ വേലിക്കൊപ്പം റോഡുകളും ഇന്ത്യ നിര്‍മ്മിക്കും. മണിപ്പുര്‍, മിസോറാം, നാഗാലാന്‍ഡ്, അരുണാചല്‍ പ്രദേശ് എന്നീ സംസ്ഥാനങ്ങളുമായാണ് മ്യാൻമറിന് അതിര്‍ത്തിയുള്ളത്.
