ക്ഷാമബത്തയും ക്ഷാമ ആശ്വാസവും ഈ വർഷം ഇല്ല; ഒരു ഗഡു കിട്ടാൻ 2025 വരെ കാത്തിരിക്കണം! കടുത്ത നിലപാടിൽ കെ.എൻ. ബാലഗോപാൽ

ക്ഷാമബത്തയും ക്ഷാമ ആശ്വാസവും ഈ വർഷം ഇല്ല. മുഖ്യമന്ത്രിയുടെ നിയമസഭയിലെ പ്രഖ്യാപനത്തിൻ്റെ പശ്ചാത്തലത്തിൽ 3 ശതമാനം ക്ഷാമബത്ത നൽകാൻ നീക്കം ഉണ്ടായിരുന്നു. 2021 ജൂലൈയിലെ ലഭിക്കേണ്ട 3 ശതമാനം ക്ഷാമബത്ത നൽകാനായിരുന്നു നീക്കം ഉണ്ടായിരുന്നത്. എന്നാൽ ഇത് ഈ വർഷം കൊടുക്കണ്ട എന്ന തീരുമാനത്തിലാണ് ധനവകുപ്പ്.

ഒരു സാമ്പത്തിക വർഷം 2 ഗഡു ക്ഷാമബത്ത നൽകും എന്നായിരുന്നു മുഖ്യമന്ത്രിയുടെ ചട്ടം 300 പ്രകാരമുള്ള നിയമസഭയിലെ പ്രസ്താവന. ജൂലൈ 10 നായിരുന്നു മുഖ്യമന്ത്രിയുടെ നിയമസഭയിലെ പ്രസ്താവന. ഈ സാമ്പത്തിക വർഷം ഒരു ഗഡു നൽകിയിട്ടുണ്ട്. അതുകൊണ്ട് തന്നെ 2025 മാർച്ച് 31 നുള്ളിൽ ഒരു ഗഡു ക്ഷാമബത്ത കൂടി പ്രഖ്യാപിച്ചാൽ മതിയാകും എന്നാണ് ധനവകുപ്പിൻ്റെ നിലപാട്. ഡിസംബർ വരെ കടം എടുക്കാൻ ശേഷിക്കുന്നത് ഇനി 8000 കോടി മാത്രമാണ്.

ഈ വർഷം പെൻഷൻ പരിഷ്കരണ കുടിശികയുടെ നാലാം ഗഡു കൊടുക്കാനുണ്ട്. 600 കോടി രൂപ ഇതിന് വേണം. ക്ഷാമബത്ത ഫയൽ അനക്കണ്ട എന്നാണ് ധനമന്ത്രി ബാലഗോപാൽ ഉന്നത ഉദ്യോഗസ്ഥരോട് നിർദ്ദേശിച്ചിരിക്കുന്നത്. ധന ( പി.ആർ. യു) വകുപ്പിൽ നിന്നാണ് ക്ഷാമബത്തയും ക്ഷാമ ആശ്വാസവും ലഭിക്കേണ്ട ഉത്തരവ് ഇറങ്ങേണ്ടത്. ധനമന്ത്രിയുടെ ഉഗ്ര ശാസനം ഉള്ളതുകൊണ്ട് ക്ഷാമബത്ത ഫയൽ ഈ വകുപ്പിൽ ഉറക്കത്തിലാണ്.

ജനുവരിയിയും ജൂലൈയിലും ആണ് ക്ഷാമബത്തയും ക്ഷാമ ആശ്വാസവും കേന്ദ്രം പ്രഖ്യാപിക്കുന്നത്. ജൂലൈ 1 മുതൽ ലഭിക്കേണ്ട ക്ഷാമബത്ത കേന്ദ്രം അടുത്ത മാസം പ്രഖ്യാപിക്കും. ഇതോടെ കേരളത്തിൽ 7 ഗഡു ഡി.എ കുടിശികയാവും. 2025 ജനുവരിയിലെ ക്ഷാമബത്ത പ്രഖ്യാപനം കൂടിയാകുമ്പോൾ 8 ഗഡുവായി കുടിശിക ഉയരും. ഈ വർഷം ഡി.എ പ്രഖ്യാപിക്കില്ലെന്ന ധനവകുപ്പിൻ്റെ വാശി മൂലം 8 ഗഡു കുടിശിക ഉള്ളപ്പോഴായിരിക്കും സംസ്ഥാന സർക്കാർ ജീവനക്കാർക്കും പെൻഷൻകാർക്കും ഒരു ഗഡു ലഭിക്കുന്നത്.

ഫലത്തിൽ 7 ഗഡു ക്ഷാമബത്തയും ക്ഷാമ ആശ്വാസവും കുടിശികയായി ഈ സർക്കാരിൻ്റെ കാലത്ത് തുടരും. ക്ഷാമബത്തയും മറ്റ് കുടിശികകളും സംബന്ധിച്ച് ചട്ടം 300 പ്രകാരം മുഖ്യമന്ത്രി നടത്തിയ പ്രസ്താവന: 1. ഒരു സാമ്പത്തിക വർഷം 2 ഗഡു ക്ഷാമബത്ത നൽകും . 2. നിലവിലുള്ള ക്ഷാമബത്ത കുടിശികയും ശമ്പള പരിഷ്കരണ കുടിശികയും അനുവദിക്കുന്നത് സംബന്ധിച്ച് പ്രത്യേക ഉത്തരവ് ഇറക്കും.