നിയമസഭയിലേക്ക് ബിജെപിയുടെ മാസ്റ്റർ പ്ലാൻ; നേമത്ത് രാജീവ്, വർക്കലയിൽ സുരേന്ദ്രൻ, വട്ടിയൂർക്കാവിൽ മുരളിക്കെതിരെ പത്മജ !

തിരുവനന്തപുരം: വരാനിരിക്കുന്ന നിയമസഭാ തിരഞ്ഞെടുപ്പിൽ കേരളത്തിൽ താമര വിരിയിക്കാൻ പുതിയ തന്ത്രങ്ങൾ മെനഞ്ഞ് ബിജെപി. കഴിഞ്ഞ തവണ കൈവിട്ടുപോയ നേമം മണ്ഡലം തിരിച്ചുപിടിക്കാൻ സംസ്ഥാന അധ്യക്ഷൻ രാജീവ് ചന്ദ്രശേഖർ തന്നെ കളത്തിലിറങ്ങിയേക്കും. ഇതോടെ, ആർഎസ്എസ് നേമത്തേക്ക് പരിഗണിച്ചിരുന്ന കുമ്മനം രാജശേഖരനെ ആറന്മുളയിലേക്ക് മാറ്റാനും സാധ്യത തെളിഞ്ഞു.

തദ്ദേശ തിരഞ്ഞെടുപ്പിന് പിന്നാലെ വരുന്ന നിയമസഭാ തിരഞ്ഞെടുപ്പിനായി വലിയ ഒരുക്കങ്ങളാണ് ബിജെപി നടത്തുന്നത്. നേരത്തെ തയ്യാറെടുപ്പുകൾ തുടങ്ങിയാൽ ‘പൂട്ടിയ’ നേമം അക്കൗണ്ട് വീണ്ടും തുറക്കാനാകുമെന്നാണ് പാർട്ടിയുടെ പ്രതീക്ഷ. സംസ്ഥാന അധ്യക്ഷന്റെ നേതൃത്വത്തിൽ ഇതിനകം തന്നെ ഒരു സാധ്യതാ സ്ഥാനാർത്ഥി പട്ടിക തയ്യാറാക്കിയിട്ടുണ്ട്.

ഗവർണർ സ്ഥാനം രാജിവെച്ച് നേമത്ത് മത്സരിക്കാനെത്തിയ കുമ്മനത്തിന് ഇത്തവണ അവിടെ വിജയസാധ്യത കുറവാണെന്നാണ് പാർട്ടിയുടെ വിലയിരുത്തൽ. ഈ സാഹചര്യത്തിലാണ് ഏറ്റവും വിജയസാധ്യതയുള്ള സ്ഥാനാർത്ഥിയായി രാജീവ് ചന്ദ്രശേഖറെ നേമത്ത് പരിഗണിക്കുന്നത്.

വട്ടിയൂർക്കാവിലെ സഹോദര പോരാട്ടം

തിരുവനന്തപുരം ജില്ലയിലെ മറ്റൊരു നിർണായക മണ്ഡലമായ വട്ടിയൂർക്കാവിൽ വൻ രാഷ്ട്രീയപോരാട്ടത്തിനാണ് ബിജെപി കോപ്പുകൂട്ടുന്നത്. യുഡിഎഫ് സ്ഥാനാർത്ഥിയായി കെ മുരളീധരൻ മത്സരിക്കുകയാണെങ്കിൽ, അദ്ദേഹത്തിന്റെ സഹോദരിയും അടുത്തിടെ ബിജെപിയിൽ ചേർന്ന നേതാവുമായ പത്മജ വേണുഗോപാലിനെ എതിർ സ്ഥാനാർത്ഥിയായി രംഗത്തിറക്കാനാണ് നീക്കം. ഒരു കുടുംബത്തിൽ നിന്നുള്ള സഹോദരങ്ങളുടെ പോരാട്ടത്തിലൂടെ മണ്ഡലം പിടിക്കാമെന്ന് പാർട്ടി കണക്കുകൂട്ടുന്നു. എന്നാൽ, കെ മുരളീധരൻ മത്സരിക്കുന്നില്ലെങ്കിൽ പത്മജ വേണുഗോപാൽ തൃശ്ശൂർ മണ്ഡലത്തിൽ നിന്ന് ജനവിധി തേടും.

പ്രമുഖർക്കായി പുതിയ തട്ടകങ്ങൾ

കഴിഞ്ഞ തവണ കോന്നിയിലും മഞ്ചേശ്വരത്തും മത്സരിച്ച മുൻ സംസ്ഥാന അധ്യക്ഷൻ കെ സുരേന്ദ്രൻ ഇത്തവണ ശിവഗിരി ഉൾപ്പെടുന്ന വർക്കല മണ്ഡലത്തിൽ സ്ഥാനാർത്ഥിയാകുമെന്നാണ് സൂചന. കഴക്കൂട്ടം മണ്ഡലത്തിൽ മുൻ കേന്ദ്രമന്ത്രി വി മുരളീധരനാണ് പ്രഥമ പരിഗണന. എന്നാൽ, രാജീവ് ചന്ദ്രശേഖറുമായുള്ള വിഭാഗീയത സീറ്റ് വിഭജനത്തിൽ പ്രതിഫലിച്ചാൽ സംസ്ഥാന ജനറൽ സെക്രട്ടറി എസ് സുരേഷിന് നറുക്ക് വീണേക്കാം.

മിസോറാം ഗവർണർ സ്ഥാനം ഒഴിഞ്ഞ പി എസ് ശ്രീധരൻ പിള്ളയ്ക്കായി ചെങ്ങന്നൂർ മണ്ഡലം ഒരുങ്ങുന്നു. കഴിഞ്ഞ തവണ കഴക്കൂട്ടത്ത് മത്സരിച്ച ശോഭ സുരേന്ദ്രനെ തൃശ്ശൂരിലെ പുതുകാട് മണ്ഡലത്തിലേക്കാണ് പരിഗണിക്കുന്നത്. സുരേഷ് ഗോപി ലോക്‌സഭയിലേക്ക് വിജയിച്ചപ്പോൾ പുതുകാട് ഉൾപ്പെടെ ആറ് നിയമസഭാ മണ്ഡലങ്ങളിൽ ബിജെപിക്ക് ലീഡ് ലഭിച്ചിരുന്നു.

മറ്റു പ്രമുഖ സ്ഥാനാർത്ഥികൾ

• തിരുവനന്തപുരം സെൻട്രൽ: വി വി രാജേഷ്
• കാട്ടാക്കട: പി കെ കൃഷ്ണദാസ്
• തിരുവല്ല: എ എൻ അനൂപ് ആന്റണി
• പൂഞ്ഞാർ: പി സി ജോർജ്
• പാലാ: ഷോൺ ജോർജ്
• കോഴിക്കോട് നോർത്ത്: എം ടി രമേശ്
• കണ്ണൂർ: സി കെ പത്മനാഭൻ

സഖ്യകക്ഷികളും ന്യൂനപക്ഷ മുഖങ്ങളും

സഖ്യകക്ഷിയായ ബിഡിജെഎസിനായി തുഷാർ വെള്ളാപ്പള്ളിക്ക് കായംകുളം സീറ്റ് മാറ്റിവെച്ചിട്ടുണ്ട്. ന്യൂനപക്ഷ മോർച്ച നേതാക്കളായ ജി ജി ജോസഫിനെ എറണാകുളത്തും, നോബിൾ മാത്യുവിനെ കാഞ്ഞിരപ്പള്ളിയിലും മത്സരിപ്പിക്കാൻ പാർട്ടി ഉദ്ദേശിക്കുന്നു. 2026-ൽ കേരളത്തിൽ സർക്കാർ രൂപീകരിക്കുമെന്ന് അമിത് ഷാ പ്രഖ്യാപിച്ചിട്ടുണ്ടെങ്കിലും, നിലവിൽ 40-ൽ താഴെ സീറ്റുകളിൽ ശക്തമായ മത്സരം കാഴ്ചവെക്കാനാണ് ബിജെപി തയ്യാറെടുക്കുന്നത്.