5 വർഷത്തിനിടെ 65 എഞ്ചിൻ തകരാർ, 17 മാസത്തിനിടെ 11 മേയ്ഡേ’ സന്ദേശങ്ങള്‍; ഇന്ത്യൻ ആകാശത്ത് എന്ത് സംഭവിക്കുന്നു?

ന്യൂഡൽഹി: ഇന്ത്യൻ വ്യോമയാന മേഖലയിലെ സുരക്ഷയെക്കുറിച്ച് വലിയ ആശങ്കകൾ ഉയർത്തി, കഴിഞ്ഞ അഞ്ച് വർഷത്തിനിടെ 65 ഇൻ-ഫ്ലൈറ്റ് എഞ്ചിൻ തകരാറുകളും (In-flight engine shutdowns), കഴിഞ്ഞ 17 മാസത്തിനുള്ളിൽ 11 ‘മേയ്ഡേ’ (Mayday) അപായ സന്ദേശങ്ങളും റിപ്പോർട്ട് ചെയ്തതായി കണക്കുകൾ. വിവരാവകാശ നിയമപ്രകാരം ടൈംസ് ഓഫ് ഇന്ത്യയ്ക്ക് ലഭിച്ച മറുപടിയിലാണ് വ്യോമയാന റെഗുലേറ്ററായ ഡിജിസിഎ (DGCA) ഈ ഞെട്ടിക്കുന്ന വിവരങ്ങൾ പുറത്തുവിട്ടത്.

അടുത്തിടെ അഹമ്മദാബാദിൽ തകർന്നുവീണ എയർ ഇന്ത്യയുടെ എഐ-171 വിമാനത്തിന്റെയോ, വഴിതിരിച്ചുവിട്ട ഇൻഡിഗോ വിമാനത്തിന്റെയോ വിവരങ്ങൾ ഈ കണക്കിൽ ഉൾപ്പെടുത്തിയിട്ടില്ല എന്നതും ആശങ്ക വർധിപ്പിക്കുന്നു.

തുടരുന്ന സാങ്കേതിക തകരാറുകൾ

എയർ ഇന്ത്യയുടെ ബോയിംഗ് 787-8 ഡ്രീംലൈനർ വിമാനം തകരാൻ കാരണം എഞ്ചിനുകളിലേക്കുള്ള ഇന്ധനവിതരണം നിലച്ചതാണെന്നായിരുന്നു പ്രാഥമിക അന്വേഷണ റിപ്പോർട്ട്. ഇന്ത്യൻ വിമാനക്കമ്പനികൾ നേരിടുന്ന സാങ്കേതിക പ്രശ്നങ്ങളുടെ തുടർച്ചയായാണ് ഈ ദുരന്തത്തെയും വിദഗ്ധർ കാണുന്നത്. മിക്ക സാഹചര്യങ്ങളിലും പൈലറ്റുമാർക്ക് ഇത്തരം തകരാറുകൾ കൈകാര്യം ചെയ്യാൻ കഴിയുന്നുണ്ടെങ്കിലും, ചിലപ്പോൾ സ്ഥിതി നിയന്ത്രണാതീതമാകുമെന്ന് അവർ മുന്നറിയിപ്പ് നൽകുന്നു.

“ഇന്ധന ഫിൽട്ടറുകളിലെ തടസ്സം, ഇന്ധനത്തിൽ വെള്ളം കലരുന്നത്, എഞ്ചിനിലേക്കുള്ള ഇന്ധന വിതരണം തടസ്സപ്പെടുന്നത് എന്നിവയാണ് എഞ്ചിൻ തകരാറുകൾക്ക് പ്രധാന കാരണം,” എന്ന് ഫെഡറേഷൻ ഓഫ് ഇന്ത്യൻ പൈലറ്റ്സ് പ്രസിഡന്റ് ക്യാപ്റ്റൻ സി.എസ്. രൺധാവ പറഞ്ഞു.

ഡിജിസിഎയുടെ ഇടപെടൽ

എയർ ഇന്ത്യ ദുരന്തത്തിന്റെ പശ്ചാത്തലത്തിൽ, ബോയിംഗ് 787 ഡ്രീംലൈനർ, ബോയിംഗ് 737 വിമാനങ്ങളിലെ ഫ്യൂവൽ കൺട്രോൾ സ്വിച്ചുകളുടെ ലോക്കിംഗ് സംവിധാനം പരിശോധിക്കാൻ ഡിജിസിഎ എല്ലാ വിമാനക്കമ്പനികൾക്കും നിർദ്ദേശം നൽകിയിട്ടുണ്ട്. 2018-ൽ അമേരിക്കൻ ഏവിയേഷൻ ഏജൻസിയായ എഫ്എഎ (FAA) ഈ വിഷയത്തിൽ ഒരു മുന്നറിയിപ്പ് നൽകിയിരുന്നുവെങ്കിലും, അത് നിർബന്ധമല്ലാത്തതിനാൽ എയർ ഇന്ത്യ ആ പരിശോധനകൾ നടത്തിയിരുന്നില്ലെന്ന് അന്വേഷണത്തിൽ കണ്ടെത്തിയിട്ടുണ്ട്.

ഇന്ത്യയിലെ അപകടത്തിന് പിന്നാലെ, എത്തിഹാദ് എയർവേയ്‌സ്, സിംഗപ്പൂർ എയർലൈൻസ് തുടങ്ങിയ അന്താരാഷ്ട്ര വിമാനക്കമ്പനികളും തങ്ങളുടെ വിമാനങ്ങളിൽ സമാനമായ പരിശോധനകൾ ആരംഭിച്ചിട്ടുണ്ട്.

ആഗോള സുരക്ഷാ റാങ്കിംഗിൽ ഇന്ത്യ പിന്നിൽ

എഞ്ചിൻ തകരാറുകൾ ആഗോളതലത്തിൽ സാധാരണമാണെങ്കിലും, ഇന്ത്യയിൽ ഇതിന്റെ ആവൃത്തി കൂടുതലാണെന്നത് ആശങ്കാജനകമാണ്. അന്താരാഷ്ട്ര സിവിൽ ഏവിയേഷൻ ഓർഗനൈസേഷന്റെ (ICAO) ആഗോള വ്യോമയാന സുരക്ഷാ മേൽനോട്ട പരിപാടിയിൽ ഇന്ത്യയുടെ റാങ്ക് 48 ആണ്. ഇത് മെച്ചപ്പെടുത്തേണ്ടതിന്റെ ആവശ്യകതയിലേക്കാണ് ഈ സംഭവങ്ങൾ വിരൽ ചൂണ്ടുന്നത്.