പിതൃത്വ അവധി ദിനങ്ങള്‍ ഉയർത്തണമെന്ന ശമ്പള കമ്മീഷൻ ശുപാർശ അംഗീകരിക്കാതെ കേരളം
2009 ലെ ശമ്പള പരിഷ്‌കരണ ഉത്തരവിലൂടെയാണ് ജീവനക്കാർക്ക് അവരുടെ ഭാര്യമാരുടെ പ്രസവ സമയത്തെ പരിരക്ഷ ഉറപ്പാക്കുന്നതിനായി 10 ദിവസത്തെ പിതൃത്വവധി അനുവദിച്ചത്.
പ്രസവ തീയതി സംബന്ധിച്ച സർട്ടിഫിക്കറ്റിന്റെ അടിസ്ഥാനത്തിൽ പ്രസവത്തിനു 10 ദിവസം മുൻപ് മുതലോ പ്രസവത്തിനു ശേഷമുള്ള 3 മാസത്തിനുള്ളിലോ ജീവനക്കാർക്ക് അവധി അനുവദിക്കും. ഒരു ജീവനക്കാരന് സർവീസിൽ പരമാവധി രണ്ട് തവണയാണ് ഇത് പ്രകാരമുള്ള അവധി ലഭിക്കുക.
പിതൃത്വവധി സമയത്ത് ജീവനക്കാർക്ക് ഡ്യൂട്ടി സാലറി ലഭിക്കും. പിതൃത്വവധി ആകസ്മികവധിയുമായി ചേർത്ത് എടുക്കാൻ കഴിയില്ല. 10.06.2020 മുതൽ കേരള സർവീസ് ചട്ടങ്ങൾ ബാധകം അല്ലാത്ത സർക്കാരിന് കീഴിലെ പൊതുമേഖല സ്ഥാപനങ്ങളിലെ ജീവനക്കാർക്കും പിതൃത്വവധി അനുവദിച്ച് സർക്കാർ ഉത്തരവ് പുറത്തിറക്കിയിട്ടുണ്ട്.
നിലവിൽ ജീവനക്കാർക്ക് അനുവദിച്ചിരിക്കുന്ന 10 ദിവസത്തെ പിതൃത്വവധി 15 ദിവസം ആക്കി ഉയർത്താൻ കഴിഞ്ഞ ശമ്പളക്കമ്മീഷൻ സർക്കാരിനോട് ശുപാർശ നൽകിയിരുന്നെങ്കിലും സർക്കാർ അനുകൂല തീരുമാനം എടുത്തിട്ടില്ല.
കേന്ദ്ര സർക്കാറിലെ പുരുഷ ജീവനക്കാർക്ക് അവരുടെ ഭാര്യമാരുടെ പ്രസവത്തിനു 6 മാസം മുൻപോ 6 മാസത്തിനുള്ളിലോ എടുക്കാം എന്ന വ്യവസ്ഥയിൽ 15 ദിവസം ആണ് പിതൃത്വവധി. കുട്ടികളെ ദത്തെടുക്കുന്ന പുരുഷ ജീവനക്കാർക്കും കേന്ദ്ര സർക്കാരിൽ 15 ദിവസം പിതൃത്വവധി അനുവദിച്ചിട്ടുണ്ട്.
