ആദായ നികുതി വിഹിതമായി കേരളത്തിന് ലഭിക്കുക 10,202 കോടി; ഇളവ് മൂലം വിഹിതം കുറയുമോയെന്ന ആശങ്കയിൽ കെ.എൻ. ബാലഗോപാൽ
2025- 26 സാമ്പത്തിക വർഷം കേരളത്തിന് നികുതി വിഹിതമായി കേന്ദ്രത്തിൽ നിന്ന് ലഭിക്കുന്നത് 27,382 കോടി . ഇതിൽ ഏറ്റവും കൂടുതൽ ആദായ നികുതി വിഹിതമായി ലഭിക്കുന്നതാണ്.
10202 കോടിയാണ് ആദായ നികുതി വിഹിതമായി കേരളത്തിന് ലഭിക്കുക. ധന കമ്മീഷൻ്റെ ശുപാർശ അനുസരിച്ച് സംസ്ഥാനങ്ങളിൽ നിന്ന് കേന്ദ്രം പിരിക്കുന്ന നികുതിയുടെ 41 ശതമാനം ആണ് സംസ്ഥാനങ്ങൾക്ക് കൈമാറേണ്ടത്.
ഈ തുകയുടെ 1.925 ശതമാനമാണ് കേരളത്തിന് കിട്ടുന്നത്. 12 ലക്ഷം രൂപ വരെ വാർഷിക വരുമാനം ഉള്ളവർ ആദായനികുതി അടയ്ക്കേണ്ട എന്ന പ്രഖ്യാപനം വഴി കേന്ദ്ര സർക്കാരിന് ലഭിക്കുന്ന ആദായ നികുതി വരുമാനം കുറയുമോ എന്ന ആശങ്കയും ഉയരുന്നുണ്ട്.
കേന്ദ്രത്തിന് ലഭിക്കുന്ന വിഹിതം കുറഞ്ഞാൽ കേരളത്തിന് ലഭിക്കുന്ന 10202 കോടിയുടെ ആദായ നികുതി വിഹിതം കുറയുമോയെന്ന ആശങ്കയിലാണ് കെ .എൻ. ബാലഗോപാൽ.
പൂർണ ആദായ നികുതിയൊഴിവിനുള്ള വാർഷിക പരിധി 7 ലക്ഷം രൂപയിൽ നിന്നാണ് 12 ലക്ഷമാക്കി ഉയർത്തിയത്. ഒരു കോടി ആളുകൾക്ക് നികുതി ബാധ്യത പൂർണ്ണമായും ഒഴിവാകുമെന്നാണ് നിർമല സീതാരാമൻ പറയുന്നത്.
ഒരു ലക്ഷം കോടിയാണ് പരിഷ്കാരങ്ങൾ വഴി സർക്കാർ വേണ്ടെന്ന് വയ്ക്കുന്നത്. ഇങ്ങനെ ലഭിക്കുന്ന പണം ജനം ചെലവഴിക്കുന്ന തോടെ സാമ്പത്തിക രംഗത്ത് ഉണർവുണ്ടാകും എന്നാണ് നിർമല സീതാരാമൻ്റെ വിശ്വാസം.
