പണ്ട് കാലത്ത് ഭക്ഷ്യവസ്തുക്കൾ കേടുകൂടാതെ സൂക്ഷിക്കാൻ പലവിധം മാർഗങ്ങൾ ഉണ്ടായിരുന്നു. അവയിൽ ചിലതെല്ലാം ഇന്നും നാം ചെയ്യുന്നതാണ്. മാമ്പഴക്കാലമാകുമ്പോൾ ഉണക്കിയും അച്ചാറിട്ടും ഉപ്പിലിട്ടുമെല്ലാം സൂക്ഷിക്കുന്നതാണ് അതിന‍ൊരു ഉദാഹരണം. ഇത്തരത്തിൽ പണ്ട് കാലത്ത് റഷ്യക്കാർ ചെയ്ത ചില പൊടികൈകളാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. പെട്ടന്ന് കേൾക്കുമ്പോൾ മനം മടുക്കുന്ന ചില പൊടികൈകൾ.
അതായത് പാൽ പുളിക്കാതെ സൂക്ഷിക്കുന്നതിനുള്ള പുരാതന റഷ്യക്കാർ പിൻതുടർന്ന ഒരു രീതിയാണ്‌ ഒരു തവളയെ പാലിന്റെ ബക്കറ്റിൽ ഇടുക എന്നത്. റഷ്യൻ ബ്രൗൺ തവളയുടെ ചർമ്മത്തിൽ ആന്റിബയോട്ടിക് പദാർത്ഥങ്ങളുടെ സമ്പത്ത് കാരണമാണ് പാൽ കേട് കൂടാതെ ഇരിക്കുന്നത്.
ഫ്രിഡ്ജ് ഒക്കെ കണ്ടുപിടിക്കുന്നതിന് മുമ്പ് ചില ഗ്രാമീണ മേഖലയിലെ റഷ്യക്കാർ പലപ്പോഴും ജീവനുള്ള തവളകളെ, സാധാരണയായി ബ്രൗൺ തവളകളെ (റാണ ടെമ്പോറേറിയ പോലുള്ള ഇനം) പാൽ പാത്രങ്ങളിൽ ജീവനോടെ ഇടാറുണ്ടായിരുന്നുവത്രെ,ഇത് പാലിന്റെ പുതുമ നിലനിർത്താൻ സഹായിച്ചിരുന്നു.
ചില തവളകൾ ഉൾപ്പെടെയുള്ള ഉഭയജീവികൾ അവയുടെ പരിസ്ഥിതിയിലെ രോഗകാരികൾക്കെതിരായ സ്വാഭാവിക പ്രതിരോധമെന്ന നിലയിൽ ആന്റിമൈക്രോബിയൽ സംയുക്തങ്ങൾ ചർമ്മത്തിലൂടെ സ്രവിക്കുന്നു. 2012-ൽ റഷ്യൻ ശാസ്ത്രജ്ഞനായ ആൽബർട്ട് ലെബെദേവും സംഘവും ഈ സ്രവങ്ങൾ പഠിക്കുകയും ബാക്ടീരിയയുടെ വളർച്ചയെ തടയുന്ന ആന്റിമൈക്രോബയൽ പെപ്‌റ്റൈഡുകൾ തിരിച്ചറിയുകയും ചെയ്തു. ഈ സംയുക്തങ്ങളിൽ ആൻറിബയോട്ടിക് ഫലങ്ങളുള്ള പെപ്‌റ്റൈഡുകളും ആൽക്കലോയിഡുകളും പോലുള്ള പ്രകൃതിദത്ത പദാർത്ഥങ്ങളും ഉൾപ്പെടുന്നു, ഇത് പാൽ കേടാകുന്നത് മന്ദഗതിയിലാക്കാൻ സഹായിക്കും.
