ശമ്പളം കൊടുക്കാൻ പണമില്ല; സർക്കാർ വീണ്ടും 2000 കോടി കടമെടുക്കുന്നു; ഈ വർഷത്തെ കടം 14,000 കോടിയിലേക്ക്
തിരുവനന്തപുരം: സംസ്ഥാനത്ത് ശമ്പളവും പെൻഷനും നൽകാൻ പണമില്ലാത്തതിനെ തുടർന്ന് സർക്കാർ വീണ്ടും കടമെടുക്കുന്നു. 2000 കോടി രൂപ കൂടി കടപ്പത്രം വഴി സമാഹരിക്കാൻ തീരുമാനിച്ചതായി ധനമന്ത്രി കെ.എൻ. ബാലഗോപാൽ അറിയിച്ചു. ഇതോടെ, ഈ സാമ്പത്തിക വർഷം മാത്രം സർക്കാർ എടുത്ത കടം 14,000 കോടി രൂപയായി ഉയരും.
ജൂലൈ 1-ന് റിസർവ് ബാങ്കിന്റെ ഇ-കുബേർ സംവിധാനം വഴി നടക്കുന്ന ലേലത്തിലൂടെയാണ് സർക്കാർ പുതിയ കടം കണ്ടെത്തുന്നത്. ഈ മാസം ഇത് രണ്ടാം തവണയാണ് സർക്കാർ കടമെടുക്കുന്നത്. ജൂൺ 24-ന് 2000 കോടിയും ജൂൺ 3-ന് 3000 കോടിയും കടമെടുത്തിരുന്നു.
തുടരുന്ന കടമെടുപ്പ്, കുമിയുന്ന കുടിശ്ശിക
പ്രതിമാസ ചെലവുകൾക്ക് പോലും കടമെടുക്കേണ്ടി വരുന്നത് സംസ്ഥാനത്തിന്റെ രൂക്ഷമായ സാമ്പത്തിക പ്രതിസന്ധിയാണ് തുറന്നുകാട്ടുന്നത്. കേരളത്തിന്റെ ആകെ കടബാധ്യത 6 ലക്ഷം കോടി രൂപയിലേക്ക് കുതിക്കുകയാണ്. കിഫ്ബി, പെൻഷൻ കമ്പനി എന്നിവയുടെ ഭീമമായ ബാധ്യതകളാണ് സംസ്ഥാനത്തെ കടക്കെണിയിലാക്കിയത്.
ഇതിന് പുറമെ, ഏകദേശം 2 ലക്ഷം കോടി രൂപയുടെ കുടിശ്ശികയും സർക്കാർ നൽകാനുണ്ട്.
- ജീവനക്കാർക്കും പെൻഷൻകാർക്കും: നൽകാനുള്ള കുടിശ്ശിക മാത്രം 1 ലക്ഷം കോടി രൂപ വരും.
- ക്ഷേമ പെൻഷൻ, മറ്റ് കുടിശ്ശികകൾ: ക്ഷേമ പെൻഷൻ, കർഷകർ, കരാറുകാർ, ക്ഷേമനിധി ബോർഡുകൾ എന്നിവയ്ക്കുള്ള കുടിശ്ശികയും 1 ലക്ഷം കോടി കവിഞ്ഞു.
അടിസ്ഥാന ചെലവുകൾക്ക് പോലും തുടർർച്ചയായി കടമെടുക്കേണ്ടി വരുന്ന സാഹചര്യം സംസ്ഥാനത്തിന്റെ സാമ്പത്തിക ഭാവിയെക്കുറിച്ച് വലിയ ആശങ്കകളാണ് ഉയർത്തുന്നത്.
