ബ്രഹ്മോസിന്റെ കഥ: തൊടുത്താൽ ശത്രുവിനെ തീർക്കുന്ന ഇന്ത്യൻ കരുത്ത്‌ | BrahMos
വെടിനിർത്തല്‍ കരാറുകള്‍ ലംഘിച്ച് സാധാരണക്കാർക്ക് നേരെ പാകിസ്ഥാൻ നടത്തിയ ഷെല്ലാക്രമണത്തിന് മറുപടിയായി, ശനിയാഴ്ച പുലർച്ചെ ഇന്ത്യ പാക് സൈനിക താവളങ്ങളെ ലക്ഷ്യമിട്ട് ശക്തമായി തിരിച്ചടി നടത്തിയിരുന്നു.
ഇന്ത്യയുടെ 12 സൈനിക കേന്ദ്രങ്ങൾ ആക്രമിക്കാനുള്ള പാകിസ്ഥാന്റെ ശ്രമങ്ങളെയാണ് ഇന്ത്യ അതേ നാണയത്തിൽ തിരിച്ചടിച്ചത്. പാകിസ്ഥാനിലെ അഞ്ച് വ്യോമകേന്ദ്രങ്ങളിലാണ് ഇന്ത്യൻ സേന പ്രധാനമായും മാരക പ്രഹരമേൽപ്പിച്ചത്. ഇതിനായി ഇന്ത്യയുടെ സൂപ്പർസോണിക് ക്രൂയിസ് മിസൈലായ ബ്രഹ്മോസ് ഉപയോഗിച്ചതായാണ് സൂചനകൾ.
ആകാശത്തുനിന്ന് പ്രയോഗിക്കാന്‍ സാധിക്കുന്ന ഹാമര്‍ (HAMMER), സ്കാല്‍പ് (SCALP) എന്നീ മിസൈലുകൾക്കൊപ്പം ബ്രഹ്മോസും ഉപയോഗിച്ചാകാം പാക് സൈനിക കേന്ദ്രങ്ങളെ ലക്ഷ്യമിട്ടതെന്ന് ഉന്നത സൈനിക വൃത്തങ്ങളെ ഉദ്ധരിച്ച് ദേശീയ മാധ്യമങ്ങൾ റിപ്പോർട്ട് ചെയ്യുന്നു. ഇന്ത്യൻ വ്യോമസേനയുടെ റാഫേൽ യുദ്ധവിമാനങ്ങളിൽ നിന്ന് വിക്ഷേപിക്കാൻ കഴിവുള്ളവയാണ് ഹാമർ, സ്കാൽപ് മിസൈലുകൾ.
എന്താണ് ബ്രഹ്മോസ്? എങ്ങനെ വികസിപ്പിച്ചു?
ബ്രഹ്മോസ് ഒരു ‘ഫയർ ആൻഡ് ഫൊർഗെറ്റ്’ (Fire and Forget) വിഭാഗത്തിൽപ്പെട്ട, അതായത് വിക്ഷേപിച്ച ശേഷം സ്വയം ലക്ഷ്യം കണ്ടെത്തി നശിപ്പിക്കുന്ന മിസൈലാണ്. കര, കപ്പൽ, വിമാനം, അന്തർവാഹിനി എന്നിവയിൽ നിന്ന് ഈ മിസൈലുകള്‍ വിക്ഷേപിക്കാൻ കഴിയും എന്നതും ഇതിന്റെ പ്രധാന സവിശേഷതയാണ്.
1980-കളിൽ ഡോ. എ.പി.ജെ. അബ്ദുൾ കലാം മുൻകൈയ്യെടുത്ത് ആരംഭിച്ച ഇന്ത്യയുടെ Integrated Guided Missile Development Programme (IGMDP) ആണ് അഗ്നി, ആകാശ്, പൃഥ്വി, നാഗ് തുടങ്ങിയ മിസൈലുകൾ വികസിപ്പിച്ചത്. 1990-കളിൽ ക്രൂയിസ് മിസൈലുകളുടെ ആവശ്യകത ഇന്ത്യ തിരിച്ചറിഞ്ഞു. 1991-ലെ ഗൾഫ് യുദ്ധത്തിൽ ക്രൂയിസ് മിസൈലുകളുടെ ഫലപ്രദമായ ഉപയോഗം ഈ ആവശ്യകതയ്ക്ക് കൂടുതൽ ഊന്നൽ നൽകി.
റഷ്യയുമായുള്ള ചർച്ചകൾക്ക് ശേഷം, 1998 ഫെബ്രുവരിയിൽ ഡോ. കലാം (അന്ന് ഡിആർഡിഒ മേധാവി), റഷ്യയുടെ ഉപ പ്രതിരോധ മന്ത്രി എൻ.വി. മിഖായ്ലോവ് എന്നിവർ ചേർന്ന് മോസ്‌കോയിൽ വെച്ച് ഒരു ഉടമ്പടി ഒപ്പുവെച്ചു. ഇതിലൂടെയാണ് ഡിആർഡിഒയും റഷ്യയുടെ എൻപിഒ മാഷിൻട്രോയേനിയയും (NPOM) ചേർന്നുള്ള സംയുക്ത സംരംഭമായ ബ്രഹ്മോസ് എയ്റോസ്‌പേസ് രൂപീകരിക്കുന്നത്. ഇന്ത്യയിലെ ബ്രഹ്മപുത്ര, റഷ്യയിലെ മോസ്ക്വ നദികളുടെ പേരുകൾ ചേർത്താണ് ബ്രഹ്മോസ് എന്ന പേര് സ്വീകരിച്ചത്. ഈ സംരംഭത്തിൽ ഇന്ത്യക്ക് 50.5 ശതമാനവും റഷ്യക്ക് 49.5 ശതമാനവും ഓഹരിയുണ്ട്. 2001 ജൂൺ 12-ന് ഒഡീഷയിലെ ചാന്ദിപ്പൂർ തീരത്ത് വെച്ച് ആദ്യ വിജയകരമായ പരീക്ഷണം നടന്നു.
ബ്രഹ്മോസിന്റെ പ്രത്യേകതകൾ
രണ്ട് ഘട്ടങ്ങളുള്ള മിസൈലാണ് ബ്രഹ്മോസ്. ആദ്യ ഘട്ടം മിസൈലിന് ശബ്ദാതിവേഗം നൽകുകയും അത് വേർപെടുകയും ചെയ്യുന്നു. രണ്ടാം ഘട്ടത്തിലെ ലിക്വിഡ് റാംജെറ്റ് എഞ്ചിൻ ശബ്ദത്തിന്റെ മൂന്നിരട്ടി വേഗതയിൽ (ഏകദേശം Mach 3) മിസൈലിനെ മുന്നോട്ട് നയിക്കുന്നു.
ഒതുക്കമുള്ള രൂപകൽപ്പനയും പ്രത്യേക വസ്തുക്കളുടെ ഉപയോഗവും കാരണം ഇതിനെ റഡാറിൽ കണ്ടെത്താൻ ബുദ്ധിമുട്ടാണ്. 15 കിലോമീറ്റർ ഉയരത്തിൽ പറക്കാനും ലക്ഷ്യസ്ഥാനത്ത് എത്തുമ്പോൾ 10 മീറ്റർ വരെ താഴ്ന്ന് ലക്ഷ്യം ഭേദിക്കാനും ഇതിന് കഴിയും. ഇത് ‘സ്റ്റാൻഡ്-ഓഫ് റേഞ്ച് വെപ്പൺ’ വിഭാഗത്തിൽപ്പെടുന്നതിനാൽ, ശത്രുവിന്റെ പ്രതിരോധത്തിൽ നിന്ന് സുരക്ഷിതമായി ദൂരെ നിന്ന് ആക്രമണം നടത്താൻ സാധിക്കുന്നു.
നിലവിൽ 350 കിലോമീറ്റർ ദൂരപരിധിയിൽ വരെ ലക്ഷ്യം ഭേദിക്കാൻ ബ്രഹ്മോസിന് കഴിയും. ഭാവിയിൽ 800 കിലോമീറ്റർ വരെ ദൂരപരിധിയും ശബ്ദത്തിന്റെ അഞ്ചിരട്ടി വേഗതയും (Hypersonic) കൈവരിക്കാനുള്ള ശ്രമങ്ങൾ നടക്കുന്നുണ്ട്.
വിവിധ പതിപ്പുകൾ
ബ്രഹ്മോസിന് കരസേന, നാവികസേന, വ്യോമസേന, അന്തർവാഹിനി എന്നിങ്ങനെ നിരവധി പതിപ്പുകളുണ്ട്:
- നാവികസേന പതിപ്പ്: 2005-ൽ ഉൾപ്പെടുത്തി. കപ്പലുകളിൽ നിന്ന് കടലിലെയും കരയിലെയും ലക്ഷ്യങ്ങളെ ആക്രമിക്കാൻ ഇത് ഉപയോഗിക്കുന്നു.
- കരസേന പതിപ്പ്: 2007-ൽ ഉൾപ്പെടുത്തി. മൊബൈൽ ലോഞ്ചറുകളിൽ നിന്ന് വിക്ഷേപിക്കാൻ കഴിയുന്ന ഇത് കരയിലെ വിവിധ ലക്ഷ്യങ്ങളെ ആക്രമിക്കാൻ പ്രാപ്തമാണ്. കൃത്യത, ഡീപ്-ഡൈവ് കഴിവ്, മലമ്പ്രദേശങ്ങളിലെ ഉപയോഗം എന്നിവയ്ക്കായി ഇതിന് വിവിധ ബ്ലോക്ക് പതിപ്പുകളുണ്ട്.
- വ്യോമസേന പതിപ്പ്: സുഖോയ്-30 MKI യുദ്ധവിമാനത്തിൽ നിന്ന് വിക്ഷേപിക്കാൻ കഴിയുന്ന ഏറ്റവും ഭാരം കൂടിയ മിസൈലാണിത്. 2017-ൽ വിജയകരമായി പരീക്ഷിച്ചു. ദൂരപരിധിയിൽ നിന്ന് കരയിലെയും കടലിലെയും ലക്ഷ്യങ്ങളെ ആക്രമിക്കാൻ ഇത് ശേഷിയുള്ളതാണ്.
- അന്തർവാഹിനി പതിപ്പ്: 2013-ൽ പരീക്ഷിച്ചു. വെള്ളത്തിനടിയിൽ 50 മീറ്റർ താഴ്ചയിൽ നിന്ന് പോലും ഇത് വിക്ഷേപിക്കാൻ സാധിക്കും.
ഭാവിയിൽ, വലിപ്പവും ഭാരവും കുറഞ്ഞ, കൂടുതൽ സ്റ്റെൽത്ത് സവിശേഷതകളുള്ള ബ്രഹ്മോസ്-എൻജി (നെക്സ്റ്റ് ജനറേഷൻ) പതിപ്പും വികസിപ്പിച്ചുകൊണ്ടിരിക്കുകയാണ്.
ഓപ്പറേഷൻ സിന്ദൂരിൽ ബ്രഹ്മോസ് ഉപയോഗിച്ചു എന്നത് സ്ഥിരീകരിക്കപ്പെടുകയാണെങ്കിൽ, അത് ഇന്ത്യയുടെ പ്രതിരോധ ശേഷിയിലെ ഒരു സുപ്രധാന മുന്നേറ്റമായി കണക്കാക്കപ്പെടും.
