വി.എസ് എന്ന ഒറ്റയാൻ: പാർട്ടിക്കും മുകളില്‍ നിലപാടില്‍ ഉറച്ച് നിന്ന പോരാളി
തിരുവനന്തപുരം: ജനകീയനായ മുഖ്യമന്ത്രി, കാലത്തെ അതിജീവിച്ച കമ്യൂണിസ്റ്റ് നേതാവ്, പ്രായം തോൽപ്പിക്കാത്ത പോരാളി – വേലിക്കകത്ത് ശങ്കരൻ അച്യുതാനന്ദൻ എന്ന വി.എസ്. അച്യുതാനന്ദന് വിശേഷണങ്ങൾ ഏറെയാണ്. പാർട്ടിക്കകത്തും പുറത്തും കൊടുങ്കാറ്റുകൾ സൃഷ്ടിച്ച, എന്നാൽ നിലപാടുകളിൽ ഉറച്ചുനിന്ന ആ ‘സഖാവ്’ ഓർമ്മയാകുമ്പോൾ, അത് കേരള രാഷ്ട്രീയത്തിലെ ഒരു സമരകാലഘട്ടത്തിന്റെ അവസാനമാണ് കുറിക്കുന്നത്.
വിഭാഗീയതയിലും തളരാത്ത പോരാളി
“വിഎസ് ജയിച്ചാൽ പാർട്ടി തോൽക്കും, പാർട്ടി ജയിച്ചാൽ വിഎസ് തോൽക്കും” – എന്ന രാഷ്ട്രീയ അടക്കംപറച്ചില്‍, ഒരു കാലത്ത് സിപിഎമ്മിനുള്ളിലെ വിഭാഗീയതയുടെ നേർചിത്രമായിരുന്നു. 1996-ൽ മാരാരിക്കുളത്തെ പാർട്ടിയുടെ ഉരുക്കുകോട്ടയിൽ വി.എസ്. പരാജയപ്പെട്ടപ്പോൾ, അത് സംഘടനക്കുള്ളിലെ ആഴത്തിലുള്ള ഭിന്നതയുടെ പ്രതിഫലനമായി.
1998-ലെ പാലക്കാട് സംസ്ഥാന സമ്മേളനത്തിൽ, ഔദ്യോഗിക പക്ഷത്തിനെതിരെ വി.എസ്. രംഗത്തിറക്കിയത് പിണറായി വിജയനെയായിരുന്നു. എന്നാൽ, വി.എസ്സിന്റെ നോമിനിയായി സംസ്ഥാന സെക്രട്ടറിയായ പിണറായി, പിന്നീട് പാർട്ടിക്കുള്ളിൽ വി.എസ്. വിരുദ്ധ ചേരിയുടെ ശക്തനായ നേതാവായി മാറി. 2007-ൽ വിഭാഗീയതയുടെ പേരിൽ പോളിറ്റ്ബ്യൂറോയിൽ നിന്ന് താൽക്കാലികമായി പുറത്താക്കപ്പെട്ടതും, 2009-ൽ പൂർണ്ണമായി ഒഴിവാക്കപ്പെട്ടതും വി.എസ്. നേരിട്ട കടുത്ത വെല്ലുവിളികളായിരുന്നു.
എന്നാൽ, 2006-ലെ തിരഞ്ഞെടുപ്പിൽ വി.എസ്സിനെ മത്സരിപ്പിക്കാതിരിക്കാനുള്ള പാർട്ടി നീക്കങ്ങളെ, അദ്ദേഹത്തിന്റെ ജനകീയതയ്ക്ക് മുന്നിൽ പാർട്ടിക്ക് തിരുത്തേണ്ടി വന്നു. പ്രതിപക്ഷ നേതാവെന്ന നിലയിൽ നടത്തിയ ജനകീയ ഇടപെടലുകളായിരുന്നു ഇതിന് കാരണം. ഒടുവിൽ, പാർട്ടിയുടെ എതിർപ്പുകളെ മറികടന്ന് അദ്ദേഹം കേരളത്തിന്റെ മുഖ്യമന്ത്രിയായി.
നിലപാടുകളെ വ്യക്തിമുദ്രയാക്കിയ സഖാവ്
തനിക്ക് ശരിയെന്ന് തോന്നാത്ത കാര്യങ്ങളെ, അത് പാർട്ടിക്കുള്ളിലാണെങ്കിൽ പോലും പരസ്യമായി വെല്ലുവിളിച്ച നേതാവായിരുന്നു വി.എസ്. ടി.പി. ചന്ദ്രശേഖരൻ വധക്കേസിലും, ലൈംഗികാരോപണം നേരിട്ട പി.കെ. ശശിക്കെതിരായ നടപടിയിലും അദ്ദേഹം സ്വീകരിച്ച നിലപാടുകൾ പാർട്ടിക്ക് വലിയ തലവേദന സൃഷ്ടിച്ചു. പാർട്ടി വിലക്കിയിട്ടും ബർലിൻ കുഞ്ഞനന്തൻ നായരെ സന്ദർശിച്ചതും, മൂന്നാറിലെ കയ്യേറ്റങ്ങൾ ഒഴിപ്പിക്കാൻ നേരിട്ടിറങ്ങിയതും വഴങ്ങാത്ത മനസ്സുള്ള ആ കമ്യൂണിസ്റ്റിന്റെ നേർസാക്ഷ്യങ്ങളായിരുന്നു.
പാർട്ടിക്കുള്ളിൽ പലപ്പോഴും ഒറ്റപ്പെട്ടെങ്കിലും, പൊതുസമൂഹത്തിൽ അദ്ദേഹത്തിന്റെ സ്വീകാര്യത വർധിക്കാൻ കാരണമായതും ഈ വിട്ടുവീഴ്ചയില്ലാത്ത നിലപാടുകളായിരുന്നു. സിപിഎമ്മിന് ജന്മം നൽകിയ 32 സ്ഥാപക നേതാക്കളിൽ അവസാനത്തെ കണ്ണിയും വിടവാങ്ങുമ്പോൾ, കേരളത്തിന് നഷ്ടമാകുന്നത് ശക്തനായ ഒരു കമ്യൂണിസ്റ്റ് നേതാവിനെ മാത്രമല്ല, പാർട്ടിക്കും മുകളിൽ ജനങ്ങളെ പ്രതിഷ്ഠിച്ച ഒരു ജനനായകനെക്കൂടിയാണ്.
