‘ലക്കി ഭാസ്കർ’ ചിത്രത്തിലൂടെ തിരിച്ചു വരവിനൊരുങ്ങി ദുൽഖർ സൽമാൻ

ദുൽഖർ സൽമാന്റെ തിരിച്ചുവരവ് ആരാധകർ ആഘോഷമാക്കുകയാണ്. നീണ്ട ഇടവേളയ്ക്ക് ശേഷം ദുൽഖർ സൽമാൻ പാൻ ഇന്ത്യൻ തെലുങ്കു ചിത്രമായ ‘ലക്കി ഭാസ്കർ’ലൂടെയാണ് തിരിച്ചു വരവിന് തയ്യാറെടുക്കുന്നത്. താരത്തിന്റെ ഇൻസ്റ്റാഗ്രാമിൽ കുറിച്ച പോസ്റ്റും ആരാധകർ ഏറ്റെടുത്തിരിക്കുകയാണ്.

“നീണ്ട ഇടവേളയ്ക്ക് ശേഷം ഞാൻ തിരിച്ചു വന്നു” എന്ന അടിക്കുറിപ്പോടെയായിരുന്നു ദുൽഖർ തന്റെ ചിത്രം പോസ്റ്റ് ചെയ്തിരിക്കുന്നത്. അതിന് താഴെ കമന്റുകളുടെ പ്രളയമാണ്. അഹാന കൃഷ്ണ, അദിതി റാവു ഹൈദരി, വിക്രാന്ത് മാസ്സി തുടങ്ങിയ നിരവധി പ്രമുഖരും കമന്റുകളുമായി രംഗത്തെത്തി. “മലയാളത്തിൽ ഇനി എപ്പോഴാണ് തിരിച്ചുവരവ്?” എന്ന ചോദ്യവും ആരാധകർ ഉയർത്തിയിട്ടുണ്ട്.

ഒക്ടോബർ 31-നാണ് ദുൽഖർ നായകനായ ‘ലക്കി ഭാസ്കർ’ റിലീസ് ചെയ്യുന്നത്. ‘കിങ് ഓഫ് കൊത്ത’യ്ക്ക് ശേഷമുള്ള ദുൽഖറിന്റെ ഈ സിനിമയ്ക്ക് ആരാധകർ വലിയ പ്രതീക്ഷയാണ് കാഴ്ചവെയ്ക്കുന്നത്. ചിത്രം തെലുങ്ക്, തമിഴ്, മലയാളം, ഹിന്ദി ഭാഷകളിൽ പ്രദർശനത്തിനെത്തും.

1980-1990 കാലഘട്ടത്തിലെ മുംബൈ നഗരത്തിന്റെ പശ്ചാത്തലത്തിലുള്ള ഒരു പീരീഡ് ഡ്രാമയാണ് ചിത്രത്തിൻറെ ഉള്ളടക്കം. വെങ്കി അറ്റ്‌ലൂരി സംവിധാനം ചെയ്ത ചിത്രം സിതാര എന്റർടൈൻമെന്റ്സിന്റെ ബാനറിൽ നിർമ്മിച്ചിരിക്കുന്നു. ചിത്രത്തിൽ ദുൽഖർ ഒരു ബാങ്ക് കാഷ്യറുടെ വേഷത്തിൽ പ്രത്യക്ഷപ്പെടുന്നു. മീനാക്ഷി ചൗധരിയാണ് നായിക.

‘കിങ് ഓഫ് കൊത്ത’ റിലീസ് സമയത്ത് നേരിട്ട നിരവധി നെഗറ്റീവ് പ്രതികരണങ്ങൾക്കുശേഷം, ‘ലക്കി ഭാസ്കർ’യിലൂടെ ദുൽഖർ വീണ്ടും മികച്ച പ്രകടനവുമായി വരുമെന്ന് ആരാധകർ പ്രതീക്ഷിക്കുന്നു.