കീം പരീക്ഷയിൽ കുട്ടികളെ ചതിച്ചു, ഡിജിറ്റൽ സർവകലാശാലയിൽ കോടികളുടെ അഴിമതി; സർക്കാരിനെതിരെ ആഞ്ഞടിച്ച് സതീശൻ

കൊച്ചി: സംസ്ഥാനത്തെ ഉന്നതവിദ്യാഭ്യാസ മേഖലയെ സർക്കാർ തകർക്കുകയാണെന്ന് ആഞ്ഞടിച്ച് പ്രതിപക്ഷ നേതാവ് വി.ഡി. സതീശൻ. മുഖ്യമന്ത്രി ചാൻസലറായ കേരള ഡിജിറ്റൽ സർവകലാശാലയിൽ കോടികളുടെ അഴിമതി നടന്നതായും, കീം പരീക്ഷാഫലം റദ്ദാക്കിയതിലൂടെ സർക്കാർ കുട്ടികളുടെ ഭാവി അവതാളത്തിലാക്കിയെന്നും അദ്ദേഹം കുറ്റപ്പെടുത്തി.

കേന്ദ്ര-സംസ്ഥാന സർക്കാരുകൾ സംയുക്തമായി നടപ്പാക്കുന്ന ഗ്രഫീൻ അറോറ പദ്ധതിയിൽ, ഉത്തരവിറങ്ങിയ ശേഷം രൂപീകരിച്ച ഒരു കമ്പനിക്ക് കരാർ നൽകിയെന്നാണ് പ്രതിപക്ഷ നേതാവിന്റെ പ്രധാന ആരോപണം. നടപടിക്രമങ്ങൾ പൂർത്തിയാക്കും മുൻപ് തന്നെ കമ്പനിക്ക് പണം നൽകിയെന്ന് വൈസ് ചാൻസലറുടെ റിപ്പോർട്ടിൽ തന്നെയുണ്ടെന്നും, ഇത് കോടികളുടെ അഴിമതിയാണെന്നും സതീശൻ പറഞ്ഞു. ‘ഗ്രഫീൻ എഞ്ചിനീയറിങ് ആൻഡ് ഇന്നവേഷൻ’ എന്ന കമ്പനിക്ക് പിന്നിൽ സർക്കാരിന് വേണ്ടപ്പെട്ടവരാണെന്നും അദ്ദേഹം ആരോപിച്ചു.

കീം വിഷയത്തിൽ രൂക്ഷ വിമർശനം

പ്രോസ്‌പെക്ടസ് പുറത്തിറക്കിയ ശേഷം കീം പരീക്ഷയുടെ റാങ്ക് നിർണയ രീതി മാറ്റിയ സർക്കാർ നടപടിയെയും സതീശൻ രൂക്ഷമായി വിമർശിച്ചു. “സാമാന്യബുദ്ധിയുള്ള ആരെങ്കിലും അവസാന നിമിഷം പ്രോസ്‌പെക്ടസ് തിരുത്തുമോ?” എന്ന് ചോദിച്ച അദ്ദേഹം, ഉന്നതവിദ്യാഭ്യാസ വകുപ്പും എൻട്രൻസ് കമ്മീഷണറേറ്റും ഒരു ചിന്തയുമില്ലാതെയാണ് പ്രവർത്തിക്കുന്നതെന്നും ഇത് കുട്ടികളുടെ ഭാവി നശിപ്പിക്കുമെന്നും പറഞ്ഞു.

സംസ്ഥാനത്തെ 13 സർവകലാശാലകളിൽ 12 ഇടത്തും വൈസ് ചാൻസലർമാരില്ലാത്തതും, ക്യാമ്പസുകളിലെ സംഘർഷങ്ങളും ചൂണ്ടിക്കാട്ടി, ഉന്നതവിദ്യാഭ്യാസ രംഗത്തെ സർക്കാർ കുളമാക്കിയെന്നും, ഇത് കേരളത്തിൽ നിന്നുള്ള ബ്രെയിൻ ഡ്രെയിൻ വർധിപ്പിക്കുമെന്നും അദ്ദേഹം കൂട്ടിച്ചേർത്തു.

ശശി തരൂരിന്റെ അടിയന്തരാവസ്ഥയെക്കുറിച്ചുള്ള ലേഖനത്തെപ്പറ്റി ദേശീയ നേതൃത്വമാണ് പ്രതികരിക്കേണ്ടതെന്ന് പറഞ്ഞ സതീശൻ, തനിക്ക് അഭിപ്രായമുണ്ടെങ്കിലും അത് ഇപ്പോൾ പറയില്ലെന്നും വ്യക്തമാക്കി.