സർക്കാർ ജീവനക്കാർക്ക് തിരിച്ചടി? ക്ഷാമബത്ത കുടിശ്ശിക നൽകിയാൽ ശമ്പളവും പെൻഷനും റവന്യു വരുമാനത്തേക്കാൾ കവിയുമെന്ന് ധനമന്ത്രി
തിരുവനന്തപുരം: സംസ്ഥാനത്തെ ധനസ്ഥിതി അതിരൂക്ഷമായ സാഹചര്യത്തിൽ സർക്കാർ ജീവനക്കാരുടെയും പെൻഷൻകാരുടെയും ക്ഷാമബത്ത കുടിശ്ശിക സംബന്ധിച്ച് ആശങ്കയുയർത്തി ധനമന്ത്രി കെ.എൻ. ബാലഗോപാൽ.
നിലവിലുള്ള ആറ് ഗഡു ക്ഷാമബത്ത കുടിശ്ശിക (18 ശതമാനം) പൂർണ്ണമായി നൽകിയാൽ, ശമ്പളവും പെൻഷനും നൽകുന്നതിനുള്ള ചെലവ് സംസ്ഥാനത്തിന്റെ റവന്യൂ വരുമാനത്തിന്റെ 120 ശതമാനത്തിലധികം വരുമെന്ന് ധനമന്ത്രി കഴിഞ്ഞ ദിവസം വ്യക്തമാക്കി. ഈ മാസം 3% ക്ഷാമബത്ത പ്രഖ്യാപിച്ചിരുന്നെങ്കിലും, വലിയൊരു തുക ഇനിയും നൽകാനുണ്ട്.
ധനമന്ത്രിയുടെ പ്രസ്താവന വലിയ വിമർശനങ്ങൾക്കും ചർച്ചകൾക്കും വഴിതെളിയിച്ചു. സംസ്ഥാനത്തിന്റെ റവന്യൂ വരുമാനത്തിന്റെ 95 ശതമാനത്തിലധികം ശമ്പളത്തിനും പെൻഷനും വേണ്ടിവരുമെന്ന് അദ്ദേഹം പറഞ്ഞിരുന്നു. എന്നാൽ, ഈ കണക്കുകൾ വസ്തുതാപരമായി ശരിയാണോ എന്ന സംശയം സാമ്പത്തിക രംഗത്തെ വിദഗ്ധർ ഉയർത്തുന്നു.
ബജറ്റ് കണക്കുകളും ധനമന്ത്രിയുടെ പ്രസ്താവനയും തമ്മിലുള്ള വൈരുദ്ധ്യം
ധനമന്ത്രി കെ.എൻ. ബാലഗോപാൽ അവതരിപ്പിച്ച 2025-26 വർഷത്തെ ബജറ്റ് കണക്കുകൾ പരിശോധിച്ചാൽ അദ്ദേഹത്തിന്റെ പ്രസ്താവനകളിലെ വൈരുദ്ധ്യങ്ങൾ വ്യക്തമാകും. ബജറ്റ് പ്രകാരം, കേന്ദ്ര നികുതികളും ധനസഹായങ്ങളും ഒഴിവാക്കിയാൽ, സംസ്ഥാനത്തിന്റെ സ്വന്തം നികുതി വരുമാനം 1,10,660.27 കോടി രൂപയാണ്.
ഇതേ ബജറ്റ് കണക്കുകൾ പ്രകാരം, 2025-26-ൽ ശമ്പളം നൽകാൻ 44,114.35 കോടി രൂപയും, പെൻഷൻ നൽകാൻ 29,459.83 കോടി രൂപയുമാണ് വേണ്ടത്. അതായത്, ശമ്പളത്തിനും പെൻഷനും കൂടി ആകെ 73,574.18 കോടി രൂപയാണ് ആവശ്യമായി വരുന്നത്. ഈ തുക സംസ്ഥാനത്തിന്റെ സ്വന്തം നികുതി വരുമാനത്തിന്റെ 66.49 ശതമാനം മാത്രമാണ്.
ധനമന്ത്രിയുടെ പ്രസ്താവനയും ബജറ്റിലെ ഔദ്യോഗിക കണക്കുകളും തമ്മിലുള്ള ഈ വലിയ വ്യത്യാസം ചൂണ്ടിക്കാട്ടി, കൂടുതൽ വ്യക്തതയോടെ കാര്യങ്ങൾ മനസ്സിലാക്കി സംസാരിക്കാൻ ധനമന്ത്രി ശ്രദ്ധിക്കണമെന്ന് വിമർശകർ ആവശ്യപ്പെടുന്നു.
