ന്യൂഡൽഹി: അമേരിക്കൻ പ്രസിഡന്റ് ഡോണൾഡ് ട്രംപ് ഇന്ത്യയുൾപ്പെടെയുള്ള രാജ്യങ്ങൾക്കെതിരെ നടത്തുന്ന താരിഫ് ആക്രമണം വെറുമൊരു സാമ്പത്തിക നയത്തിനപ്പുറം ‘ശക്തിപ്രകടനം’ ആണെന്ന് മുൻ റിസർവ് ബാങ്ക് ഗവർണർ രഘുറാം രാജൻ. ഇന്ത്യ ഇന്ന് നേരിടുന്ന പ്രധാന വെല്ലുവിളിയാണിതെന്നും അദ്ദേഹം ചൂണ്ടിക്കാട്ടി. റഷ്യയിൽ നിന്ന് എണ്ണ വാങ്ങുന്നതുമായി ബന്ധപ്പെട്ടാണ് ഇന്ത്യയെ ട്രംപ് ലക്ഷ്യമിടുന്നതെന്നും അദ്ദേഹം പറയുന്നു.
വ്യാപാരക്കമ്മി നിലനിൽക്കുന്നത് മറ്റ് രാജ്യങ്ങൾ അമേരിക്കയെ ചൂഷണം ചെയ്യുന്നതിന്റെ സൂചനയായി ട്രംപ് കാണുന്നുവെന്ന് രഘുറാം രാജൻ വിശദീകരിച്ചു. താരിഫുകൾ ചുമത്തുന്നത് പ്രതിരോധത്തിനുള്ള മാർഗ്ഗമായും വരുമാനം ഉണ്ടാക്കാനുള്ള വഴിയായും ട്രംപ് കാണുന്നു. സൈനിക ശക്തിക്ക് ബദലായി ഈ നയം ഉപയോഗിക്കാനാണ് അദ്ദേഹത്തിന്റെ ശ്രമം.
മറ്റ് ഏഷ്യൻ രാജ്യങ്ങളെ അപേക്ഷിച്ച് ഇന്ത്യയെയാണ് ട്രംപ് കൂടുതൽ രൂക്ഷമായി ലക്ഷ്യമിടുന്നതെന്ന് രാജൻ പറയുന്നു. ഇന്ത്യയ്ക്ക് 50% തീരുവയാണ് ചുമത്തിയത്, മറ്റ് രാജ്യങ്ങൾക്ക് ഇത് കുറവാണ്. ഇത് ഇരു രാജ്യങ്ങളും തമ്മിലുള്ള ബന്ധം വഷളായതിന്റെ സൂചന നൽകുന്നു. റഷ്യയിൽ നിന്ന് കുറഞ്ഞ വിലയിൽ എണ്ണ വാങ്ങുന്നത് ഒരു കാരണമാണെങ്കിലും, ഇത് നീതിയുടെയും പരമാധികാരത്തിന്റെയും പ്രശ്നത്തിനപ്പുറമാണെന്ന് രഘുറാം രാജൻ വ്യക്തമാക്കുന്നു.
ട്രംപിന്റെ കാഴ്ചപ്പാടിൽ ഇന്ത്യ “നിയമങ്ങൾ അനുസരിച്ച് കളിക്കുന്നില്ല” എന്നും ഇതിന്റെ ഫലമായിട്ടാണ് ഇന്ത്യയെ ഒറ്റപ്പെടുത്തി ആക്രമിക്കുന്നതെന്നും അദ്ദേഹം പറഞ്ഞു. റഷ്യയിൽ നിന്ന് എണ്ണ വാങ്ങുന്നതിലൂടെയുള്ള സാമ്പത്തിക നേട്ടങ്ങളും അമേരിക്ക ചുമത്തുന്ന ഉയർന്ന താരിഫുകൾ മൂലമുള്ള നഷ്ടവും താരതമ്യം ചെയ്യേണ്ട സമയമാണിതെന്നും രഘുറാം രാജൻ കൂട്ടിച്ചേർത്തു.
