ബ്രസീലിയൻ ഫുട്ബോൾ സൂപ്പർ താരം നെയ്മർക്ക് വലത് തുടയിലെ പേശികൾക്ക് വീണ്ടും പരിക്കേറ്റു. ഇതോടെ, വരാനിരിക്കുന്ന ലോകകപ്പ് യോഗ്യതാ മത്സരങ്ങൾക്കുള്ള ബ്രസീൽ ടീമിൽ താരം ഇടം നേടുമോയെന്ന ആശങ്കയിലാണ് ആരാധകർ. പരിശീലകൻ കാർലോ ആൻസെലോട്ടി ടീമിനെ പ്രഖ്യാപിക്കാനിരിക്കെയാണ് നെയ്മറിന്റെ പരിക്ക് സ്ഥിരീകരിച്ചിരിക്കുന്നത്.
ക്ലബിന്റെ ഔദ്യോഗിക പ്രസ്താവന പ്രകാരം, പരിശീലനത്തിനിടെയാണ് നെയ്മറിന് പേശികളിൽ അസ്വസ്ഥത അനുഭവപ്പെട്ടത്. പരിക്ക് ഗുരുതരമല്ലാത്തതിനാൽ താരം ഒരാഴ്ചയെങ്കിലും ചികിത്സയിൽ കഴിയണം. ഓഗസ്റ്റ് 31-ന് സാന്റോസ് ഫ്ലുമിനെൻസിനെതിരെ കളിക്കുമ്പോൾ നെയ്മർ ടീമിലേക്ക് മടങ്ങിയെത്തുമെന്നാണ് ക്ലബിന്റെ പ്രതീക്ഷ. മഞ്ഞക്കാർഡ് നേടിയതിനെ തുടർന്ന് ബഹിയക്കെതിരായ മത്സരത്തിൽ നെയ്മറിന് കളിക്കാൻ കഴിഞ്ഞിരുന്നില്ല. ഈ സാഹചര്യത്തിലാണ് പരിക്ക് കൂടി തിരിച്ചടിയായത്.
കഴിഞ്ഞ ഒക്ടോബർ 2023 മുതൽ ദേശീയ ടീമിനായി കളിക്കാത്ത നെയ്മറിന് ഈ പരിക്ക് വലിയ വെല്ലുവിളിയാണ് ഉയർത്തുന്നത്. ഫിറ്റ്നസ് വീണ്ടെടുത്ത് സാന്റോസിനായി മികച്ച പ്രകടനം കാഴ്ചവെച്ചിരുന്നെങ്കിലും, വാസ്കോ ഡ ഗാമയ്‌ക്കെതിരെ 6-0ന് തോറ്റ മത്സരത്തിൽ ടീമിനെ രക്ഷിക്കാൻ നെയ്മർക്ക് കഴിഞ്ഞില്ല. ഈ തോൽവി ക്ലബിനെ തരംതാഴ്ത്തൽ ഭീഷണിയിലേക്ക് തള്ളിവിട്ടിരുന്നു.
2026 ലോകകപ്പിന് ബ്രസീൽ ഇതിനോടകം തന്നെ യോഗ്യത നേടിയിട്ടുണ്ട്. സെപ്റ്റംബർ 4-ന് ചിലിക്കെതിരെ റിയോ ഡി ജനീറോയിലും സെപ്റ്റംബർ 9-ന് ബൊളീവിയക്കെതിരെ ലാ പാസിലുമായി നടക്കുന്ന മത്സരങ്ങൾ ടീമിന് ലോകകപ്പിനായുള്ള ഒരുക്കമായിരിക്കും. നെയ്മറിന്റെ ഈ പരിക്ക്, ദേശീയ ടീമിൽ അദ്ദേഹത്തിന്റെ പ്രസക്തിയെക്കുറിച്ച് വീണ്ടും സംശയങ്ങൾ ഉയർത്തുന്നുണ്ട്.
