രാജ്യത്തെ ഏറ്റവും ദരിദ്രയായ മുഖ്യമന്ത്രി മമത ബാനർജി; പിണറായി വിജയൻ മൂന്നാമത്
ന്യൂഡൽഹി: അസോസിയേഷൻ ഫോർ ഡെമോക്രാറ്റിക് റിഫോംസ് (എ.ഡി.ആർ) പുറത്തുവിട്ട ഏറ്റവും പുതിയ റിപ്പോർട്ട് പ്രകാരം രാജ്യത്തെ മുഖ്യമന്ത്രിമാരിൽ ഏറ്റവും കുറഞ്ഞ ആസ്തിയുള്ളത് പശ്ചിമ ബംഗാൾ മുഖ്യമന്ത്രി മമത ബാനർജിക്കാണ്. 15 ലക്ഷം രൂപ മാത്രമാണ് മമതയുടെ ആസ്തി. അതേസമയം, 931 കോടിയിലധികം രൂപയുടെ ആസ്തിയുമായി ആന്ധ്രാപ്രദേശ് മുഖ്യമന്ത്രി എൻ. ചന്ദ്രബാബു നായിഡു രാജ്യത്തെ ഏറ്റവും സമ്പന്നനായ മുഖ്യമന്ത്രിയായി തുടരുന്നു.
അവസാനമായി മത്സരിച്ച തിരഞ്ഞെടുപ്പിൽ മുഖ്യമന്ത്രിമാർ സമർപ്പിച്ച സത്യവാങ്മൂലങ്ങളെ അടിസ്ഥാനമാക്കിയാണ് എ.ഡി.ആർ. ഈ റിപ്പോർട്ട് തയ്യാറാക്കിയത്. 2021 സെപ്റ്റംബറിൽ ഭവാനിപൂർ ഉപതിരഞ്ഞെടുപ്പിൽ സമർപ്പിച്ച സത്യവാങ്മൂലത്തിൽ മമതയുടെ കൈവശം 69,255 രൂപ പണമായും 13.5 ലക്ഷം രൂപ ബാങ്ക് ബാലൻസായും ഉണ്ടെന്ന് രേഖപ്പെടുത്തിയിട്ടുണ്ട്. ഇതിൽ 1.5 ലക്ഷം രൂപ തിരഞ്ഞെടുപ്പ് ചെലവിനുള്ള അക്കൗണ്ടിലാണ്. കൂടാതെ 1.8 ലക്ഷം രൂപയുടെ ടി.ഡി.എസ്. റീഫണ്ടും, 9 ഗ്രാം സ്വർണാഭരണങ്ങളും (മൂല്യം 43,837 രൂപ) അവർക്കുണ്ട്. സ്വന്തമായി ഭൂമിയോ വീടോ ഇല്ലെന്നും സത്യവാങ്മൂലത്തിൽ വ്യക്തമാക്കിയിട്ടുണ്ട്. മമത ബാനർജിയുടെ ആസ്തി കാലക്രമേണ കുറഞ്ഞുവരുന്നതായും റിപ്പോർട്ടിൽ ചൂണ്ടിക്കാട്ടുന്നു. 2016-ലെ തിരഞ്ഞെടുപ്പിൽ 30.4 ലക്ഷം രൂപയായിരുന്ന അവരുടെ ആസ്തി 2020-21 സാമ്പത്തിക വർഷത്തിൽ 15.4 ലക്ഷമായി കുറഞ്ഞിരുന്നു.
അരുണാചൽ പ്രദേശ് മുഖ്യമന്ത്രി പേമ ഖണ്ഡുവാണ് സമ്പന്നരുടെ പട്ടികയിൽ രണ്ടാമത്, 332 കോടി രൂപയുടെ ആസ്തിയാണ് അദ്ദേഹത്തിനുള്ളത്. ഇവർ രണ്ട് പേരും മാത്രമാണ് മുഖ്യമന്ത്രിമാരിൽ കോടീശ്വരൻമാർ. 31 മുഖ്യമന്ത്രിമാരുടെയും മൊത്തം ആസ്തി ഏകദേശം 1,630 കോടി രൂപയാണെന്നും റിപ്പോർട്ടിൽ പറയുന്നു.
കുറഞ്ഞ ആസ്തിയുള്ള മുഖ്യമന്ത്രിമാരുടെ പട്ടികയിൽ മമത ബാനർജിക്ക് പിന്നിൽ രണ്ടാം സ്ഥാനത്ത് ജമ്മു കശ്മീർ മുഖ്യമന്ത്രി ഒമർ അബ്ദുള്ള (55 ലക്ഷം) ആണ്. കേരള മുഖ്യമന്ത്രി പിണറായി വിജയൻ 1 കോടി രൂപയിൽ അല്പം കൂടുതൽ ആസ്തിയുള്ള മൂന്നാമത്തെ ദരിദ്രനായ മുഖ്യമന്ത്രിയാണ്.
