സൈന്യത്തിന് കരുത്തേകാൻ 200 പുതിയ ഹെലികോപ്റ്ററുകൾ; ‘ചേതക്’, ‘ചീറ്റ’ യുഗത്തിന് അന്ത്യം, നിർമ്മാണം ഇന്ത്യയിൽ
ന്യൂഡൽഹി: ഇന്ത്യൻ സായുധ സേനയുടെ നട്ടെല്ലായി പതിറ്റാണ്ടുകളോളം സേവനമനുഷ്ഠിച്ച ചേതക്, ചീറ്റ ഹെലികോപ്റ്ററുകൾക്ക് പകരമായി 200 അത്യാധുനിക നിരീക്ഷണ ഹെലികോപ്റ്ററുകൾ (RSH) വാങ്ങാൻ പ്രതിരോധ മന്ത്രാലയം തീരുമാനിച്ചു. ഇതുമായി ബന്ധപ്പെട്ട വിവരങ്ങൾക്കായി (RFI) മന്ത്രാലയം വിജ്ഞാപനം പുറത്തിറക്കി. ‘ആത്മനിർഭർ ഭാരത്’ പദ്ധതിക്ക് കീഴിൽ രാജ്യത്തിന്റെ പ്രതിരോധ ശേഷി വർധിപ്പിക്കുന്നതിനുള്ള നിർണായക ചുവടുവെപ്പാണിത്.
കരസേനയുടെയും വ്യോമസേനയുടെയും പ്രവർത്തനങ്ങൾ നവീകരിക്കുന്നതിന്റെ ഭാഗമായാണ് ഈ നീക്കം. ഫ്രഞ്ച് രൂപകൽപ്പനയെ അടിസ്ഥാനമാക്കിയുള്ള ചേതക്, ചീറ്റ ഹെലികോപ്റ്ററുകൾക്ക് കാലപ്പഴക്കം ചെന്നതും ആധുനിക യുദ്ധമുഖത്തെ ആവശ്യകതകൾ നിറവേറ്റാൻ ശേഷി കുറഞ്ഞതുമാണ് പുതിയ ഹെലികോപ്റ്ററുകൾ വാങ്ങാൻ കാരണം.
പുതിയതായി വാങ്ങുന്ന ഹെലികോപ്റ്ററുകൾക്ക് മികച്ച നിരീക്ഷണ സംവിധാനങ്ങൾ, ആധുനിക ഏവിയോണിക്സ്, കൂടുതൽ ഭാരം വഹിക്കാനുള്ള ശേഷി, അത്യാധുനിക സെൻസറുകൾ എന്നിവയുണ്ടാകും. ഹിമാലയം പോലുള്ള തന്ത്രപ്രധാനമായ ഉയർന്ന പ്രദേശങ്ങളിലും അതിർത്തികളിലും നിരീക്ഷണം നടത്താനും രഹസ്യാന്വേഷണ വിവരങ്ങൾ ശേഖരിക്കാനും ഇവ സൈന്യത്തിന് വലിയ മുതൽക്കൂട്ടാകും.
നിർമ്മാണം ഇന്ത്യയിൽ
‘ആത്മനിർഭർ ഭാരത്’ പദ്ധതിയുടെ ഭാഗമായി, ഈ ഹെലികോപ്റ്ററുകൾ തദ്ദേശീയമായി നിർമ്മിക്കുന്നതിനാണ് സർക്കാർ പ്രഥമ പരിഗണന നൽകുന്നത്. ഹിന്ദുസ്ഥാൻ എയറോനോട്ടിക്സ് ലിമിറ്റഡ് (HAL) പോലുള്ള പൊതുമേഖലാ സ്ഥാപനങ്ങൾക്കും സ്വകാര്യ കമ്പനികൾക്കും നിർമ്മാണത്തിൽ പങ്കാളികളാകാൻ അവസരമുണ്ട്. സാങ്കേതികവിദ്യ കൈമാറ്റം ചെയ്യാനും പ്രാദേശികമായി നിർമ്മിക്കാനും തയ്യാറാണെങ്കിൽ വിദേശ കമ്പനികളുമായും സഹകരിക്കാൻ സർക്കാർ തയ്യാറാണ്.
