തിരുവനന്തപുരം: മലയാളത്തിന്റെ നിത്യഹരിത നായകൻ പ്രേം നസീറിന്റെ മകനും നടനുമായ ഷാനവാസ് (71) അന്തരിച്ചു. തിരുവനന്തപുരത്തെ സ്വകാര്യ ആശുപത്രിയിൽ തിങ്കളാഴ്ച രാത്രി 11:15-ഓടെയായിരുന്നു അന്ത്യം. ഹൃദയാഘാതത്തെ തുടർന്ന് ചികിത്സയിലായിരുന്നു.
1981-ൽ ബാലചന്ദ്രമേനോൻ സംവിധാനം ചെയ്ത ‘പ്രേമഗീതങ്ങൾ’ എന്ന ചിത്രത്തിലൂടെയായിരുന്നു ഷാനവാസിന്റെ സിനിമാ അരങ്ങേറ്റം. ആദ്യ ചിത്രത്തിലൂടെ തന്നെ ശ്രദ്ധേയനായെങ്കിലും പിതാവിനെപ്പോലെ സിനിമാരംഗത്ത് ശോഭിക്കാൻ അദ്ദേഹത്തിനായില്ല. അൻപതിലധികം സിനിമകളിൽ അഭിനയിച്ചിട്ടുണ്ട്. ‘ഇലഞ്ഞീർ’, ‘കോട്ടയം കുഞ്ഞച്ചൻ’ തുടങ്ങിയ ചിത്രങ്ങളിൽ ശ്രദ്ധേയമായ വേഷങ്ങൾ ചെയ്തു.
സിനിമയിൽ നിന്ന് നീണ്ട കാലം വിട്ടുനിന്ന അദ്ദേഹം, 2011-ൽ ‘ചൈനാ ടൗൺ’ എന്ന ചിത്രത്തിലൂടെയാണ് തിരിച്ചെത്തിയത്. പൃഥ്വിരാജ് നായകനായ ‘ജനഗണമന’യാണ് ഒടുവിൽ അഭിനയിച്ച ചിത്രം.
പ്രേം നസീറിന്റെയും ഹബീബ ബീവിയുടെയും മകനാണ്. പ്രേംനസീറിന്റെ മൂത്ത സഹോദരിയുടെ മകളായ ആയിഷാ ബീവിയാണ് ഭാര്യ. ഷമീർ ഖാൻ, അജിത് ഖാൻ എന്നിവർ മക്കളാണ്. സംസ്കാരം ചൊവ്വാഴ്ച വൈകുന്നേരം തിരുവനന്തപുരത്തെ ചിറയിൻകീഴ് മുസ്ലിം ജമാഅത്ത് പള്ളിയിൽ നടക്കും.
