കനത്ത മഴ; 7 ജില്ലകളിൽ ഓറഞ്ച് അലർട്ട്, തീരപ്രദേശത്ത് ‘കള്ളക്കടൽ’ മുന്നറിയിപ്പും

തിരുവനന്തപുരം: സംസ്ഥാനത്ത് മഴ വീണ്ടും ശക്തമായതോടെ ഏഴ് ജില്ലകളിൽ കേന്ദ്ര കാലാവസ്ഥാ വകുപ്പ് ഓറഞ്ച് അലർട്ട് പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലാണ് ഇന്ന് (ഓഗസ്റ്റ് 3) അതിശക്തമായ മഴയ്ക്ക് സാധ്യതയുള്ളതിനാൽ ഓറഞ്ച് അലർട്ട് നൽകിയിരിക്കുന്നത്.

അരുവിക്കര ഡാം തുറന്നു

ജില്ലയിൽ ശക്തമായ മഴ തുടരുന്ന സാഹചര്യത്തിൽ അരുവിക്കര ഡാമിലേക്കുള്ള നീരൊഴുക്ക് വർധിച്ചിട്ടുണ്ട്. ഇതേത്തുടർന്ന് ഡാമിന്റെ ഒന്നു മുതൽ അഞ്ചു വരെയുള്ള ഷട്ടറുകൾ ഇന്ന് വൈകുന്നേരം 5 മണിക്ക് 15 സെന്റിമീറ്റർ വീതം ഉയർത്തുമെന്ന് ജില്ലാ കളക്ടർ അറിയിച്ചു. നിലവിൽ 25 സെന്റിമീറ്റർ തുറന്നിട്ടുള്ള ഷട്ടറുകൾ ഇതോടെ ആകെ 100 സെന്റിമീറ്റർ (ഒരു മീറ്റർ) ആയി ഉയർത്തും. ഡാമിന്റെ സമീപപ്രദേശങ്ങളിലുള്ളവർ അതീവ ജാഗ്രത പാലിക്കണമെന്ന് കളക്ടർ മുന്നറിയിപ്പ് നൽകി.

തീരദേശത്ത് ‘കള്ളക്കടൽ’ ഭീഷണി

അതേസമയം, സംസ്ഥാനത്തിന്റെ തീരപ്രദേശങ്ങളിൽ ‘കള്ളക്കടൽ’ പ്രതിഭാസത്തിനും ഉയർന്ന തിരമാലയ്ക്കും സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം (INCOIS) അറിയിച്ചു.

• തിരുവനന്തപുരം: കാപ്പിൽ മുതൽ പൊഴിയൂർ വരെയുള്ള തീരത്ത് ഇന്ന് (ഓഗസ്റ്റ് 3) വൈകുന്നേരം 5.30 മുതൽ നാളെ (ഓഗസ്റ്റ് 4) രാത്രി 8.30 വരെ 1.5 മുതൽ 1.8 മീറ്റർ വരെ ഉയരത്തിൽ തിരമാലയടിക്കാൻ സാധ്യതയുണ്ട്.
• കന്യാകുമാരി: തീരത്ത് ഇന്ന് പകൽ 11.30 മുതൽ നാളെ രാത്രി 11.30 വരെ 1.6 മുതൽ 1.9 മീറ്റർ വരെ ഉയരത്തിൽ തിരമാലകൾക്ക് സാധ്യതയുണ്ട്.

കടലാക്രമണ സാധ്യതയുള്ളതിനാൽ മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണമെന്നും കടലിൽ പോകരുതെന്നും അധികൃതർ നിർദ്ദേശിച്ചു.