ഹൂതി ഭീഷണി: ചെങ്കടലിലെ ഇന്റർനെറ്റ് കേബിളുകൾ അപകടത്തിൽ; ഇന്ത്യയുടെ ഡിജിറ്റൽ ഭാവിക്ക് പുതിയ വഴികൾ തേടുന്നു

ന്യൂഡൽഹി: ചെങ്കടലിൽ യെമനിലെ ഹൂതി വിമതരുടെ ആക്രമണങ്ങൾ രൂക്ഷമായതോടെ ഇന്ത്യയുടെ ഇന്റർനെറ്റ് അടിസ്ഥാന സൗകര്യങ്ങൾ കടുത്ത ഭീഷണിയിൽ. രാജ്യത്തിന്റെ ഡിജിറ്റൽ നട്ടെല്ലായ പ്രധാന സമുദ്രാന്തര കേബിൾ ശൃംഖലകൾ കടന്നുപോകുന്ന ചെങ്കടൽ പാത അപകടത്തിലായതോടെ, ഡാറ്റാ വേഗത കുറയാനും ഇന്റർനെറ്റ് സേവനങ്ങൾക്ക് തടസ്സം നേരിടാനും സാധ്യതയേറി. ഇതോടെ റിലയൻസ് ജിയോ, ഭാരതി എയർടെൽ തുടങ്ങിയ പ്രമുഖ കമ്പനികൾ ബദൽ മാർഗ്ഗങ്ങൾ തേടിത്തുടങ്ങി.

ഇന്ത്യയെ ബാധിക്കുന്നത് എങ്ങനെ?

ലോകത്തെ ഏറ്റവും തിരക്കേറിയ കപ്പൽ പാതകളിലൊന്നായ ചെങ്കടലിലെ ബാബ് എൽ-മൻഡേബ് കടലിടുക്കിലൂടെയാണ് ഇന്ത്യയെ യൂറോപ്പുമായി ബന്ധിപ്പിക്കുന്ന ഭൂരിഭാഗം സബ്മറൈൻ ഇന്റർനെറ്റ് കേബിളുകളും കടന്നുപോകുന്നത്. ഗൂഗിളിന്റെ ‘ബ്ലൂ-രാമൻ’, ഭാരതി എയർടെല്ലിന്റെ ‘2അഫ്രിക്ക’, റിലയൻസ് ജിയോയുടെ ‘ഇന്ത്യ-യൂറോപ്പ്-എക്സ്പ്രസ്’ തുടങ്ങിയ അതിനിർണായക കേബിളുകളെല്ലാം ഈ പാതയെയാണ് ആശ്രയിക്കുന്നത്. മുംബൈ, ചെന്നൈ തുടങ്ങിയ നഗരങ്ങളിലാണ് ഈ കേബിളുകൾ ഇന്ത്യയിലേക്ക് പ്രവേശിക്കുന്നത്. ഹൂതികൾ കപ്പലുകൾക്ക് പുറമെ ഈ സമുദ്രാന്തര ആസ്തികൾക്കും ഭീഷണി ഉയർത്തുന്നതാണ് നിലവിലെ പ്രതിസന്ധിക്ക് കാരണം.

“കേബിൾ സംവിധാനത്തെ നാം ആശ്രയിക്കുന്നത് വളരെ അപകടകരമായ അവസ്ഥയിലാണ്. ഈ പാതയിൽ ഇനിയൊരു കേടുപാടുണ്ടായാൽ അത് നന്നാക്കിയെടുക്കുക എന്നത് അതീവ ദുഷ്കരമാകും,” 21,000 കിലോമീറ്റർ സബ്മറൈൻ കേബിൾ ശൃംഖല കൈകാര്യം ചെയ്യുന്ന ലൈറ്റ്സ്റ്റോം സിഇഒ അമജിത് ഗുപ്ത പറഞ്ഞു.

ഉയരുന്ന ചെലവും ബദൽ മാർഗ്ഗങ്ങളും

കേബിളുകൾക്ക് കേടുപാടുകൾ സംഭവിക്കുന്നതും അറ്റകുറ്റപ്പണികൾക്കായി എത്തുന്ന കപ്പലുകളിൽ നിന്ന് ഹൂതികൾ ഭീഷണി മുഴക്കി പണം തട്ടാൻ ശ്രമിക്കുന്നതും സ്ഥിതി വഷളാക്കിയിട്ടുണ്ട്. ഇതുമൂലം ഇൻഷുറൻസ് പ്രീമിയം കുത്തനെ ഉയർന്നു. ഒരു ഫൈബർ ജോഡിക്ക് ആഗോള പാതകളിൽ പാട്ടം നൽകാൻ ഇപ്പോൾ പ്രതിമാസം 30,000 മുതൽ 50,000 ഡോളർ വരെ (ഏകദേശം 25 മുതൽ 42 ലക്ഷം രൂപ വരെ) ചെലവ് വരുന്നുണ്ട്.

ഈ പ്രതിസന്ധി മറികടക്കാൻ ടെലികോം കമ്പനികൾ കടൽ ഒഴിവാക്കി കരയിലൂടെയുള്ള പാതകൾ തേടുകയാണ്. ഇതിൽ ഏറ്റവും പ്രധാനപ്പെട്ടത് ‘ഇന്ത്യ-മിഡിൽ ഈസ്റ്റ്-യൂറോപ്പ് സാമ്പത്തിക ഇടനാഴി’ (IMEC) ആണ്. കടൽ വഴിയും കര വഴിയുമുള്ള ശൃംഖലകൾ ഒരുമിപ്പിക്കുന്ന ഈ ഹൈബ്രിഡ് പാതയ്ക്ക് പ്രാധാന്യം ഏറുകയാണ്.

“കേബിൾ അറ്റകുറ്റപ്പണികൾക്കുള്ള കപ്പലുകളുടെ കുറവാണ് യഥാർത്ഥ വെല്ലുവിളി. ഇന്ത്യക്ക് സ്വന്തമായി അറ്റകുറ്റപ്പണികൾക്കായി കപ്പൽ വേണോ എന്ന കാര്യം സർക്കാർ ചർച്ച ചെയ്യുന്നുണ്ട്,” ടാറ്റാ കമ്മ്യൂണിക്കേഷൻസ് എംഡി എ.എസ്. ലക്ഷ്മിനാരായണൻ വ്യക്തമാക്കി.

പ്രതിസന്ധികൾക്കിടയിലും ജിയോയും എയർടെല്ലും പുതിയ കേബിൾ റൂട്ടുകൾ ഈ വർഷം സജീവമാക്കാൻ ഒരുങ്ങുന്നുണ്ട്. എന്നിരുന്നാലും, ചെങ്കടലിലെ സംഘർഷം രൂക്ഷമായാൽ ലോകത്തെ ഏറ്റവും വേഗത്തിൽ വളരുന്ന ഇന്റർനെറ്റ് വിപണികളിലൊന്നായ ഇന്ത്യയിൽ ഡിജിറ്റൽ ബ്ലാക്ക്ഔട്ടുകൾക്ക് വരെ അത് കാരണമായേക്കാമെന്നാണ് വിദഗ്ദ്ധരുടെ മുന്നറിയിപ്പ്.