കണ്ണൂരിലേത് പ്രതികള്‍ നിയന്ത്രിക്കുന്ന ജയില്‍; ഗോവിന്ദച്ചാമിക്കുപോലും സഹായം
തിരുവനന്തപുരം: കേരളത്തെ നടുക്കിയ സൗമ്യ വധക്കേസിലെ പ്രതി ഗോവിന്ദച്ചാമിയുടെ ജയിൽചാട്ടം, ആഭ്യന്തര വകുപ്പ് കൈകാര്യം ചെയ്യുന്ന സിപിഎമ്മിനും പിണറായി സർക്കാരിനും വലിയ രാഷ്ട്രീയ തിരിച്ചടിയാകുന്നു. പ്രതിയെ മണിക്കൂറുകൾക്കകം പിടികൂടാനായെങ്കിലും, അതിസുരക്ഷാ ജയിലിൽ നടന്ന ഗുരുതരമായ സുരക്ഷാ വീഴ്ച പ്രതിപക്ഷം സർക്കാരിനെതിരെ മൂർച്ചയേറിയ ആയുധമാക്കുകയാണ്.
ദിവസങ്ങളെടുത്ത് സെല്ലിലെ അഴികൾ മുറിച്ചതും, ജയിലിനകത്തെ വർക്ക് ഷോപ്പിൽ നിന്ന് തന്നെ അതിനുള്ള ആയുധം (ഹാക്സോ ബ്ലേഡ്) ലഭിച്ചതും, സിസിടിവി നിരീക്ഷണങ്ങൾ പരാജയപ്പെട്ടതും വിരൽ ചൂണ്ടുന്നത് ജയിൽ വകുപ്പിന്റെ സമ്പൂർണ്ണ പരാജയത്തിലേക്കാണ്. അംഗപരിമിതനായ ഒരാൾക്ക് ഇത്രയും വലിയ ജയിൽ ചാട്ടം ഒറ്റയ്ക്ക് നടത്താനാകില്ലെന്നും, ജയിലിനകത്ത് നിന്ന് സഹായം ലഭിച്ചിട്ടുണ്ടെന്നും വ്യക്തമാണ്. ഇതോടെ, “സിസ്റ്റത്തിന്റെ തകരാറ്” എന്ന ആരോഗ്യമന്ത്രിയുടെ പ്രയോഗം സർക്കാരിനെതിരെ തന്നെ തിരിഞ്ഞിരിക്കുകയാണ്.
ജയിലുകളിൽ സിപിഎം തടവുകാർക്ക് പ്രത്യേക പരിഗണന ലഭിക്കുന്നുവെന്നും, ജയിൽ ഭരണം പാർട്ടി നിയന്ത്രണത്തിലാണെന്നുമുള്ള പ്രതിപക്ഷത്തിന്റെ ദീർഘകാല ആരോപണങ്ങൾക്ക് ശക്തി പകരുന്നതാണ് ഈ സംഭവം. കാരണവർ വധക്കേസിലെ ഷെറിന്റെ ജയിൽ മോചനം ഉൾപ്പെടെയുള്ള മുൻകാല വിവാദങ്ങൾ വീണ്ടും ചർച്ചയാക്കുകയാണ് പ്രതിപക്ഷം.
സ്ത്രീ സുരക്ഷയുടെ കാര്യത്തിൽ സർക്കാർ പരാജയപ്പെട്ടുവെന്നതിന് ഉദാഹരണമായി, ഗോവിന്ദച്ചാമിയെപ്പോലൊരു കുറ്റവാളി രക്ഷപ്പെട്ട സാഹചര്യം കോൺഗ്രസ് ഉയർത്തിക്കാട്ടുന്നു. വിഷയത്തിൽ മുഖ്യമന്ത്രി പിണറായി വിജയന് ഉത്തരവാദിത്തത്തിൽ നിന്ന് ഒഴിഞ്ഞുമാറാനാകില്ലെന്നും പ്രതിപക്ഷം ആരോപിക്കുന്നു. എന്നാൽ, പ്രതിപക്ഷം രാഷ്ട്രീയ മുതലെടുപ്പിന് ശ്രമിക്കുകയാണെന്ന പതിവ് പ്രതിരോധമാണ് സിപിഎം ഉയർത്തുന്നത്. വരും ദിവസങ്ങളിൽ ഈ വിഷയം നിയമസഭയിലും വലിയ കോളിളക്കമുണ്ടാക്കുമെന്ന് ഉറപ്പാണ്.
