കനൽവഴികള്‍ താണ്ടി വിപ്ലവ സൂര്യനായ വി.എസ്; ഓർമ്മകളിൽ നിറയെ സമരകാലം
തിരുവനന്തപുരം: ജീവിതം വിരിച്ച ദുരിതങ്ങളുടെ കനൽവഴികളിലൂടെ നടന്നാണ് വേലിക്കകത്ത് ശങ്കരൻ അച്യുതാനന്ദൻ എന്ന വി.എസ്. അച്യുതാനന്ദൻ കേരള രാഷ്ട്രീയത്തിലെ ജ്വലിക്കുന്ന അധ്യായമായി മാറിയത്. നാലാം വയസ്സിൽ അമ്മയെയും പതിനൊന്നാം വയസ്സിൽ അച്ഛനെയും നഷ്ടപ്പെട്ട വി.എസ്, ദാരിദ്ര്യവും പട്ടിണിയും നിറഞ്ഞ ബാല്യത്തെ അതിജീവിച്ചാണ് ജനനായകനായി വളർന്നത്.
പഠനം പാതിവഴിയിൽ ഉപേക്ഷിച്ച് ജ്യേഷ്ഠന്റെ തയ്യൽക്കടയിലും കയർ ഫാക്ടറിയിലും ജോലിക്ക് പോയ ആ കൗമാരക്കാരൻ, പിന്നീട് കേരളം കണ്ട ഏറ്റവും വലിയ സമരനായകരിൽ ഒരാളായി മാറി. 1940-ൽ, തന്റെ പതിനേഴാം വയസ്സിൽ കമ്മ്യൂണിസ്റ്റ് പാർട്ടിയിൽ അംഗമായ വി.എസ്, പുന്നപ്ര-വയലാർ സമരത്തിലെ മുന്നണിപ്പോരാളിയായിരുന്നു. സമരത്തിന്റെ പേരിൽ പോലീസിന്റെ പിടിയിലായ അദ്ദേഹം, പൂഞ്ഞാർ ലോക്കപ്പിൽ കൊടിയ മർദ്ദനങ്ങൾക്കിരയായി. മരിച്ചെന്ന് കരുതി പോലീസ് കുറ്റിക്കാട്ടിലേക്ക് വലിച്ചെറിഞ്ഞ ആ വിപ്ലവകാരി, പിന്നീട് കേരളത്തിന്റെ മുഖ്യമന്ത്രിയായി ചരിത്രം കുറിച്ചു.
രാഷ്ട്രീയ ജീവിതത്തിൽ അഞ്ചര വർഷത്തോളം ജയിൽവാസവും, നാലര വർഷം ഒളിവുജീവിതവും നയിച്ച വി.എസ്, ചൈനീസ് ചാരനെന്ന് മുദ്രകുത്തപ്പെട്ടും, അടിയന്തരാവസ്ഥക്കാലത്തും ജയിലിലടക്കപ്പെട്ടു. എന്നാൽ, ഈ വെല്ലുവിളികളൊന്നും അദ്ദേഹത്തിലെ പോരാട്ടവീര്യത്തെ കെടുത്തിയില്ല.
വി.എസ്. അച്യുതാനന്ദൻ: ജീവിതരേഖ
- ജനനം: 1923 ഒക്ടോബർ 20, പുന്നപ്രയിൽ.
- രാഷ്ട്രീയ പ്രവേശം: 1939-ൽ സ്റ്റേറ്റ് കോൺഗ്രസിൽ ചേർന്നു, 1940-ൽ കമ്മ്യൂണിസ്റ്റ് പാർട്ടി അംഗമായി.
- പുന്നപ്ര-വയലാർ സമരം: 1946-ൽ സമരത്തിൽ പങ്കെടുത്തു, അറസ്റ്റിലായി മൂന്ന് വർഷം തടവ് ശിക്ഷ അനുഭവിച്ചു.
- സിപിഎം രൂപീകരണം: 1964-ൽ സിപിഎം രൂപീകരിച്ച 32 സ്ഥാപക നേതാക്കളിൽ ഒരാളായി.
- പാർലമെന്ററി ജീവിതം: 1967-ൽ ആദ്യമായി അമ്പലപ്പുഴയിൽ നിന്ന് നിയമസഭയിലെത്തി. പിന്നീട് പലതവണ എംഎൽഎയായി. 1996-ൽ മാരാരിക്കുളത്ത് പരാജയപ്പെട്ടത് വലിയ രാഷ്ട്രീയ കോളിളക്കമുണ്ടാക്കി.
- പാർട്ടിയിലെ ഉന്നത പദവികൾ: 1980 മുതൽ 1992 വരെ സിപിഎം സംസ്ഥാന സെക്രട്ടറി, 1985 മുതൽ 2009 വരെ പോളിറ്റ് ബ്യൂറോ അംഗം.
- ഭരണരംഗത്ത്: 2001-ൽ പ്രതിപക്ഷ നേതാവായി. 2006-ൽ കേരളത്തിന്റെ ഇരുപതാമത്തെ മുഖ്യമന്ത്രിയായി തിരഞ്ഞെടുക്കപ്പെട്ടു. 2011-ൽ വീണ്ടും പ്രതിപക്ഷ നേതാവായി. 2016 മുതൽ 2021 വരെ ഭരണപരിഷ്കാര കമ്മീഷൻ അധ്യക്ഷനായിരുന്നു.
ഭാര്യ: കെ. വസുമതി. മക്കൾ: ഡോ. വി.വി. ആശ, വി.എ. അരുൺകുമാർ.
