10 ദിവസം കൊണ്ട് 10 കിലോ കുറച്ച് ചിമ്പു; വെട്രിമാരൻ ചിത്രത്തിനായി ഞെട്ടിക്കുന്ന മേക്കോവർ, ടീസർ ഉടൻ

ചെന്നൈ: ഹിറ്റ് സംവിധായകൻ വെട്രിമാരന്റെ പുതിയ ചിത്രത്തിനായി ഞെട്ടിക്കുന്ന മേക്കോവറുമായി തമിഴ് താരം ചിമ്പു (സിലംബരസൻ ടിആർ). വെറും 10 ദിവസം കൊണ്ട് 10 കിലോ ഭാരം കുറച്ചാണ് താരം ആരാധകരെ അമ്പരപ്പിച്ചിരിക്കുന്നത്. ചിത്രത്തിലെ യുവത്വം നിറഞ്ഞ കഥാപാത്രത്തിന് വേണ്ടിയാണ് ചിമ്പുവിന്റെ ഈ കഠിനമായ തയ്യാറെടുപ്പ്. സിനിമയുടെ ടീസർ ഇതിനോടകം ചിത്രീകരിച്ച് കഴിഞ്ഞുവെന്നും, ഉടൻ പുറത്തിറങ്ങുമെന്നും അണിയറപ്രവർത്തകർ അറിയിച്ചു.

അതേസമയം, ഈ ചിത്രം വെട്രിമാരന്റെ സൂപ്പർഹിറ്റ് ചിത്രമായ ‘വട ചെന്നൈ’യുടെ രണ്ടാം ഭാഗമാണെന്ന അഭ്യൂഹങ്ങൾ സംവിധായകൻ തന്നെ തള്ളിക്കളഞ്ഞു.

‘വട ചെന്നൈ’യുടെ ലോകത്ത് പുതിയ കഥ

പുതിയ ചിത്രം ‘വട ചെന്നൈ 2’ അല്ലെന്നും, എന്നാൽ ‘വട ചെന്നൈ’യുടെ അതേ പശ്ചാത്തലത്തിൽ നടക്കുന്ന മറ്റൊരു കഥയാണെന്നും വെട്രിമാരൻ വ്യക്തമാക്കി. “‘വട ചെന്നൈ’ എന്ന സിനിമയുടെ പകർപ്പവകാശം ധനുഷിനാണ്. അതുകൊണ്ട് തന്നെ ചിമ്പുവിനെ വെച്ചെടുക്കുന്നത് രണ്ടാം ഭാഗമല്ല. മറിച്ച്, ‘വട ചെന്നൈ’യുടെ ലോകത്ത് നടക്കുന്ന ഒരു പുതിയ സിനിമയാണ്,” എന്ന് വെട്രിമാരൻ മുൻപ് പറഞ്ഞിരുന്നു.

‘വട ചെന്നൈ’യിലേതുപോലെ, റിയലിസ്റ്റിക്കും തീവ്രവുമായ ഒരു കഥാപാത്രത്തെയായിരിക്കും ചിമ്പു ഈ ചിത്രത്തിൽ അവതരിപ്പിക്കുകയെന്നാണ് സൂചനകൾ. ‘തഗ് ലൈഫ്’ എന്ന ചിത്രത്തിന് ശേഷം ചിമ്പു അഭിനയിക്കുന്ന ഈ സിനിമയ്ക്കായി ആരാധകർ വലിയ പ്രതീക്ഷയോടെയാണ് കാത്തിരിക്കുന്നത്.