കാന്റീനും കോഫി ഹൗസും പൂട്ടി; പണിമുടക്ക് ദിനത്തിൽ സെക്രട്ടേറിയറ്റില്‍ ജോലിക്കെത്തിയ ജീവനക്കാർക്ക് ‘പട്ടിണി’
തിരുവനന്തപുരം: ദേശീയ പണിമുടക്ക് ദിനത്തിൽ സർക്കാർ പ്രഖ്യാപിച്ച ഡയസ്നോൺ ഭയന്ന് ജോലിക്കെത്തിയ സെക്രട്ടേറിയറ്റ് ജീവനക്കാർക്ക് ഭക്ഷണവും കുടിവെള്ളവും നിഷേധിച്ചതായി പരാതി.
പണിമുടക്കിനെത്തുടർന്ന് നഗരത്തിലെ ഹോട്ടലുകൾ അടഞ്ഞുകിടന്നപ്പോൾ, ജീവനക്കാർക്ക് ആശ്രയമാകേണ്ടിയിരുന്ന സെക്രട്ടേറിയറ്റ് വളപ്പിലെ കാന്റീനും കോഫി ഹൗസും പ്രവർത്തിച്ചില്ല. ഇത് ജോലിക്കെത്തിയവരോടുള്ള പ്രതികാര നടപടിയാണെന്ന് ആരോപിച്ച് കേരള ഫൈനാൻസ് സെക്രട്ടേറിയറ്റ് അസോസിയേഷൻ ചീഫ് സെക്രട്ടറിക്ക് പരാതി നൽകി.
ബുധനാഴ്ച നടന്ന ദേശീയ പണിമുടക്കിൽ സർക്കാർ ജീവനക്കാർ പങ്കെടുക്കുന്നത് തടയാൻ സർക്കാർ ‘ഡയസ്നോൺ’ (No Work, No Pay) പ്രഖ്യാപിച്ചിരുന്നു. ഇതേത്തുടർന്ന് ഒരു വിഭാഗം ജീവനക്കാർ ജോലിക്ക് ഹാജരായിരുന്നു. എന്നാൽ, പണിമുടക്ക് കാരണം നഗരത്തിൽ കടകളെല്ലാം അടഞ്ഞുകിടന്നതിനാൽ, ഇവർക്ക് ചായയോ ഭക്ഷണമോ കുടിവെള്ളം പോലുമോ ലഭിക്കാത്ത സാഹചര്യമുണ്ടായി.
ഈ അവസരത്തിൽ ജീവനക്കാർക്ക് ഏക ആശ്രയമായിരുന്ന സെക്രട്ടേറിയറ്റ് വളപ്പിലെ കാന്റീനും കോഫി ഹൗസും തുറന്നുപ്രവർത്തിക്കാതിരുന്നത് മനഃപൂർവ്വമാണെന്നാണ് സംഘടനയുടെ ആരോപണം.
പണിമുടക്കിൽ പങ്കെടുക്കാതെ ജോലിക്കെത്തിയ ജീവനക്കാരോടുള്ള വെല്ലുവിളിയാണിതെന്നും, കാന്റീനുകൾ പ്രവർത്തിക്കുന്നത് തടഞ്ഞവർക്കെതിരെ കർശന നടപടി സ്വീകരിക്കണമെന്നും കേരള ഫൈനാൻസ് സെക്രട്ടേറിയറ്റ് അസോസിയേഷൻ പ്രസിഡന്റ് പ്രദീപ് കുമാർ എസ്. നൽകിയ പരാതിയിൽ ആവശ്യപ്പെട്ടു. മുൻപൊരിക്കലും ഉണ്ടാകാത്ത തരത്തിലുള്ള ഈ നടപടിയിൽ ജീവനക്കാർക്കിടയിൽ ശക്തമായ പ്രതിഷേധം ഉയർന്നിട്ടുണ്ട്.
