ഇന്ത്യൻ ‘അസ്ത്ര’ മിസൈലുകൾ ഇനി അർമേനിയൻ യുദ്ധവിമാനങ്ങളിലും; ചർച്ചകൾ അന്തിമഘട്ടത്തിൽ

ന്യൂഡൽഹി: ഇന്ത്യയുടെ തദ്ദേശീയ പ്രതിരോധ കയറ്റുമതിക്ക് വലിയ ഉത്തേജനം നൽകി, അസ്ത്ര മാർക്ക് 1 (Astra Mk1) ബിയോണ്ട് വിഷ്വൽ റേഞ്ച് എയർ-ടു-എയർ മിസൈലുകൾ (BVRAAM) അർമേനിയൻ വ്യോമസേനയുടെ സുഖോയ്-30എസ്എം യുദ്ധവിമാനങ്ങളിൽ ഘടിപ്പിക്കാനുള്ള ചർച്ചകൾ അന്തിമഘട്ടത്തിൽ.

ഇന്ത്യയുടെ ഡിഫൻസ് റിസർച്ച് ആൻഡ് ഡെവലപ്‌മെന്റ് ഓർഗനൈസേഷൻ (ഡിആർഡിഒ) വികസിപ്പിച്ച ഈ അത്യാധുനിക മിസൈലുകൾ, അർമേനിയൻ വ്യോമസേനയുടെ പ്രഹരശേഷി ഗണ്യമായി വർധിപ്പിക്കും.

നിലവിൽ അർമേനിയ ഉപയോഗിക്കുന്ന റഷ്യൻ നിർമ്മിത ആർ-77 മിസൈലുകളെക്കാൾ (80 കി.മീ ദൂരപരിധി) പ്രഹരശേഷി കൂടിയതാണ് 110 കിലോമീറ്റർ ദൂരപരിധിയുള്ള അസ്ത്ര മാർക്ക് 1. ഈ നീക്കം യാഥാർത്ഥ്യമായാൽ, ഇന്ത്യൻ വ്യോമസേനയ്ക്ക് ശേഷം അസ്ത്ര മിസൈലുകൾ ഉപയോഗിക്കുന്ന രണ്ടാമത്തെ രാജ്യമായി അർമേനിയ മാറും.

സാങ്കേതിക വെല്ലുവിളികൾ

അർമേനിയയുടെ റഷ്യൻ നിർമ്മിത സുഖോയ്-30എസ്എം വിമാനങ്ങളിൽ ഇന്ത്യൻ മിസൈലുകൾ ഘടിപ്പിക്കുന്നതിന് ചില സാങ്കേതിക വെല്ലുവിളികളുണ്ട്. വിമാനത്തിലെ നിലവിലുള്ള റഷ്യൻ ഡിജിറ്റൽ ഫ്ലൈറ്റ് കൺട്രോൾ കമ്പ്യൂട്ടർ (DFCC) മാറ്റി, ഇന്ത്യയും റഷ്യയും സംയുക്തമായി വികസിപ്പിച്ച പുതിയ DFCC സ്ഥാപിക്കേണ്ടി വരും. ഇത് അർമേനിയക്ക് അധിക സാമ്പത്തിക ബാധ്യതയുണ്ടാക്കും.

ഇന്ത്യൻ വ്യോമസേനയുടെ സുഖോയ്-30എംകെഐ വിമാനങ്ങളിൽ ഈ ഇന്തോ-റഷ്യൻ DFCC ആണ് ഉപയോഗിക്കുന്നത്. ഇത് ബ്രഹ്മോസ് ഉൾപ്പെടെയുള്ള ഇന്ത്യൻ നിർമ്മിത ആയുധങ്ങൾ വിമാനവുമായി എളുപ്പത്തിൽ സംയോജിപ്പിക്കാൻ സഹായിക്കുന്നു.

അസ്ത്ര മാർക്ക് II-ലും കണ്ണ്

160 കിലോമീറ്റർ വരെ ദൂരപരിധിയുള്ള, വികസിപ്പിച്ചുകൊണ്ടിരിക്കുന്ന അസ്ത്ര മാർക്ക് II മിസൈലുകളിലും അർമേനിയ താൽപര്യം പ്രകടിപ്പിച്ചിട്ടുണ്ട്. എന്നാൽ, അടുത്ത വർഷം ഉത്പാദനം ആരംഭിക്കുമെന്ന് പ്രതീക്ഷിക്കുന്ന മാർക്ക് II-ന് വേണ്ടി കാത്തിരിക്കാതെ, നിലവിൽ യുദ്ധമുഖങ്ങളിൽ കഴിവ് തെളിയിച്ച മാർക്ക് I വാങ്ങാനാകും അർമേനിയ മുൻഗണന നൽകുക.

ഈ ഇടപാട് ഇന്ത്യയും അർമേനിയയും തമ്മിലുള്ള പ്രതിരോധ ബന്ധം കൂടുതൽ ശക്തമാക്കുന്നതിന്റെ സൂചനയാണ്. പ്രതിരോധ സാങ്കേതികവിദ്യയിൽ ഇന്ത്യയുടെ വളർന്നുവരുന്ന കഴിവിനും ആഗോളതലത്തിലുള്ള സ്വീകാര്യതയ്ക്കും ഇത് അടിവരയിടുന്നു.