അവധിയിൽ പ്രവേശിക്കും മുൻപ് എൻപിഎസ് രജിസ്ട്രേഷൻ നിർബന്ധം; വീഴ്ച വരുത്തിയാൽ ആശ്രിതർക്ക് ആനുകൂല്യം ലഭിക്കില്ല, കർശന നിർദ്ദേശവുമായി സർക്കാർ

തിരുവനന്തപുരം: സർക്കാർ സർവീസിൽ പ്രവേശിച്ച ഉടൻ ശൂന്യവേതനാവധിയിൽ പ്രവേശിക്കുന്ന ജീവനക്കാർക്ക് ദേശീയ പെൻഷൻ പദ്ധതി (NPS) രജിസ്ട്രേഷൻ നിർബന്ധമാക്കി സർക്കാർ. എൻപിഎസ് രജിസ്ട്രേഷൻ പൂർത്തിയാക്കാതെ ജീവനക്കാർ ദീർഘകാല അവധിയിൽ പ്രവേശിക്കുകയും, ഈ കാലയളവിൽ മരണപ്പെട്ടാൽ ആശ്രിതർക്ക് മരണാനന്തര ആനുകൂല്യങ്ങൾ ലഭിക്കാതെ വരുന്ന സാഹചര്യങ്ങൾ ശ്രദ്ധയിൽപ്പെട്ടതിനെ തുടർന്നാണ് ഈ കർശന നിർദ്ദേശം.

ധനകാര്യ (എൻപിഎസ് സെൽ) വകുപ്പ് 2025 ജൂൺ 25-ന് പുറത്തിറക്കിയ പുതിയ പരിപത്രം (നം. 51/2025/ധന) പ്രകാരം, ശൂന്യവേതനാവധിയിൽ പ്രവേശിക്കുന്നതിന് മുൻപ് തന്നെ ജീവനക്കാർ പ്രാൺ (PRAN – Permanent Retirement Account Number) രജിസ്ട്രേഷൻ നടപടികൾ പൂർത്തിയാക്കി സ്പാർക്കിൽ അപ്ഡേറ്റ് ചെയ്യേണ്ടതാണ്.

പുതിയ നിർദ്ദേശങ്ങൾ ഇവയാണ്:

1. രജിസ്ട്രേഷൻ നിർബന്ധം: ദേശീയ പെൻഷൻ പദ്ധതി ബാധകമായ ജീവനക്കാർ, സർവീസിൽ പ്രവേശിച്ച ഉടൻ തന്നെ ശൂന്യവേതനാവധിയിൽ (KSR ഭാഗം I, അനുബന്ധം XII A, XII B, XII C പ്രകാരം) പ്രവേശിക്കുകയാണെങ്കിൽ, അവധിയിൽ പ്രവേശിക്കുന്നതിന് മുൻപ് നിർബന്ധമായും പ്രാൺ രജിസ്ട്രേഷൻ പൂർത്തിയാക്കണം.
2. പ്രാൺ ഡി-ആക്ടിവേറ്റ് ചെയ്യണം: ശൂന്യവേതനാവധി, സസ്പെൻഷൻ, അനധികൃത ഹാജരില്ലായ്മ എന്നിവയിൽ പ്രവേശിക്കുന്ന ജീവനക്കാരുടെ പ്രാൺ അക്കൗണ്ട്, കാലതാമസം കൂടാതെ ഡി-ആക്ടിവേറ്റ് ചെയ്യുന്നതിനായി ബന്ധപ്പെട്ട ഡിഡിഒ (DDO) ട്രഷറിയിൽ അപേക്ഷ സമർപ്പിക്കണം.
3. പ്രാൺ റീ-ആക്ടിവേറ്റ് ചെയ്യണം: അവധി കഴിഞ്ഞ് ജീവനക്കാരൻ തിരികെ ജോലിയിൽ പ്രവേശിച്ച ഉടൻ തന്നെ, ഡിഡിഒ മുൻകൈയെടുത്ത് പ്രാൺ അക്കൗണ്ട് റീ-ആക്ടിവേറ്റ് ചെയ്യാനുള്ള അപേക്ഷ ട്രഷറിയിൽ നൽകണം.
4. വിഹിതം ഉറപ്പാക്കണം: പ്രാൺ റീ-ആക്ടിവേറ്റ് ചെയ്തതിന് ശേഷം, ജോലിയിൽ തിരികെ പ്രവേശിച്ച തീയതി മുതലുള്ള എൻപിഎസ് വിഹിതം കുറച്ചുകൊണ്ട് മാത്രമേ ജീവനക്കാരന്റെ ശമ്പള ബിൽ പ്രോസസ്സ് ചെയ്യാൻ പാടുള്ളൂ.

ജീവനക്കാർ എൻപിഎസ് രജിസ്ട്രേഷൻ നടത്താതെ അവധിയിൽ പ്രവേശിക്കുന്നത്, മരണാനന്തര ആനുകൂല്യങ്ങൾ ആശ്രിതർക്ക് ലഭിക്കുന്നതിന് വലിയ തടസ്സങ്ങൾ സൃഷ്ടിക്കുന്നതായി സർക്കാരിന്റെ ശ്രദ്ധയിൽപ്പെട്ടിരുന്നു. ഈ പ്രശ്നം ഒഴിവാക്കുന്നതിനാണ് ഇപ്പോൾ പെരുമാറ്റച്ചട്ടങ്ങൾ കർശനമാക്കിയത്.