തിരുവനന്തപുരം: കേരളത്തിലെ പൊതുജനാരോഗ്യ രംഗം മികച്ചതാണെന്ന് സർക്കാർ അവകാശപ്പെടുമ്പോഴും, മുഖ്യമന്ത്രിയും മന്ത്രിമാരും സ്വന്തം ചികിത്സയ്ക്കും കുടുംബാംഗങ്ങളുടെ ചികിത്സയ്ക്കും ആശ്രയിക്കുന്നത് സംസ്ഥാനത്തിനകത്തും പുറത്തുമുള്ള സ്വകാര്യ ആശുപത്രികളെ. ഇതിനായി ലക്ഷങ്ങളും കോടികളുമാണ് സർക്കാർ ഖജനാവിൽ നിന്ന് ചെലവഴിക്കുന്നതെന്നും കണക്കുകൾ വ്യക്തമാക്കുന്നു.
പൊതുജനാരോഗ്യ സംവിധാനങ്ങളെക്കുറിച്ച് വാതോരാതെ സംസാരിക്കുന്ന ഭരണകർത്താക്കൾ തന്നെ, അസുഖം വരുമ്പോൾ സ്വകാര്യ ആശുപത്രികളിലേക്ക് പോകുന്നതിലെ വൈരുദ്ധ്യമാണ് ഇതോടെ ചർച്ചയാകുന്നത്.
വിദേശത്തും സ്വദേശത്തും സ്വകാര്യ ചികിത്സ
മുഖ്യമന്ത്രി പിണറായി വിജയൻ: സ്വന്തം ചികിത്സയ്ക്കായി അമേരിക്കയിലെ പ്രശസ്തമായ മയോ ക്ലിനിക്കിലാണ് മുഖ്യമന്ത്രി പോയത്. ഇതിനായി കോടികളാണ് ഖജനാവിൽ നിന്ന് ചെലവഴിച്ചത്. ഭാര്യ കമലയുടെ ഒൻപത് ദിവസത്തെ ചികിത്സയ്ക്കായി 2.69 ലക്ഷം രൂപയും സർക്കാർ അനുവദിച്ചിരുന്നു.
വി. ശിവൻകുട്ടി (വിദ്യാഭ്യാസ മന്ത്രി): സ്വന്തം ചികിത്സയ്ക്കും ഭാര്യ പാർവ്വതി ദേവിയുടെ ചികിത്സയ്ക്കുമായി 10 ലക്ഷത്തിലധികം രൂപയാണ് സർക്കാർ ഖജനാവിൽ നിന്ന് നൽകിയത്. തിരുവനന്തപുരത്ത് പ്രമുഖ സർക്കാർ ആശുപത്രികളുണ്ടായിട്ടും, കിംസ് ആശുപത്രി, ജ്യോതിദേവ്സ് ഡയബറ്റിസ് സെന്റർ തുടങ്ങിയ സ്വകാര്യ ആശുപത്രികളെയാണ് ഇവർ ആശ്രയിച്ചത്.
കെ. കൃഷ്ണൻകുട്ടി (വൈദ്യുത മന്ത്രി): കൊച്ചി ആസ്റ്റർ മെഡിസിറ്റി, ചെന്നൈ അപ്പോളോ, കോയമ്പത്തൂർ കോവൈ മെഡിക്കൽ സെന്റർ എന്നിവിടങ്ങളിലാണ് മന്ത്രി ചികിത്സ തേടിയത്. ഭാര്യ അമൃത, ലക്ഷ്മി ഹോസ്പിറ്റൽ തുടങ്ങിയ സ്വകാര്യ ആശുപത്രികളിലും ചികിത്സ നേടി.
എം.ബി. രാജേഷ് (തദ്ദേശ മന്ത്രി): മന്ത്രിയും ഭാര്യ നിനിത കണിച്ചേരിയും ചികിത്സ നേടിയത് എറണാകുളത്തെ ലിസി ആശുപത്രിയിലാണ്.
ആന്റണി രാജു (മുൻ ഗതാഗത മന്ത്രി): സ്വന്തം ചികിത്സയ്ക്കും ഭാര്യ, മകൾ, അമ്മ എന്നിവരുടെ ചികിത്സയ്ക്കുമായി പലതവണ സ്വകാര്യ ആശുപത്രികളെയാണ് ആശ്രയിച്ചത്.
ഡോ. ആർ. ബിന്ദു (ഉന്നത വിദ്യാഭ്യാസ മന്ത്രി): മകന്റെ ചികിത്സയ്ക്കായി എറണാകുളം ലിസി ആശുപത്രിയിലാണ് മന്ത്രി പോയത്.
സർക്കാർ ആശുപത്രികളിലെ മരുന്ന് ക്ഷാമവും സൗകര്യക്കുറവും കാരണം സാധാരണക്കാർ ബുദ്ധിമുട്ടുമ്പോഴാണ്, ജനങ്ങളുടെ നികുതിപ്പണം ഉപയോഗിച്ച് മന്ത്രിമാർ സ്വകാര്യ ആശുപത്രികളിൽ ചികിത്സ തേടുന്നതെന്ന വിമർശനമാണ് ഇതോടെ ശക്തമാകുന്നത്.
