മെഡിസെപ് പരാതിയുണ്ടോ? ഇനി നേരിട്ട് ഉപഭോക്തൃ കോടതിയെ സമീപിക്കാം; ഇൻഷുറൻസ് കമ്പനിയുടെ ഹർജി തള്ളി
എറണാകുളം: സംസ്ഥാന സർക്കാർ ജീവനക്കാരുടെയും പെൻഷൻകാരുടെയും ആരോഗ്യ ഇൻഷുറൻസ് പദ്ധതിയായ മെഡിസെപ്പുമായി ബന്ധപ്പെട്ട പരാതികളിൽ ഗുണഭോക്താക്കൾക്ക് ഇനി ഇൻഷുറൻസ് കമ്പനിയുടെ ആഭ്യന്തര പരാതി പരിഹാര സംവിധാനങ്ങളെ ആശ്രയിക്കാതെ നേരിട്ട് ഉപഭോക്തൃ കോടതിയെ സമീപിക്കാം. ഇൻഷുറൻസ് കമ്പനികളുടെ വാദം തള്ളിക്കൊണ്ട് സംസ്ഥാന ഉപഭോക്തൃ തർക്ക പരിഹാര കമ്മീഷനാണ് ഈ സുപ്രധാന വിധി പുറപ്പെടുവിച്ചത്.
എറണാകുളം ജില്ലാ ഉപഭോക്തൃ കമ്മീഷന്റെ ഉത്തരവിനെതിരെ ഓറിയന്റൽ ഇൻഷുറൻസ് കമ്പനി സമർപ്പിച്ച അപ്പീൽ തള്ളിക്കൊണ്ടാണ് സംസ്ഥാന കമ്മീഷന്റെ ഈ സുപ്രധാന ഉത്തരവ്. ഇതോടെ, ഇൻഷുറൻസ് ക്ലെയിം നിരസിക്കപ്പെട്ടാൽ, ത്രിതല പരാതി പരിഹാര സംവിധാനം വഴി പോകണമെന്ന നിബന്ധനയുടെ പേരിൽ ഉപഭോക്താക്കൾക്ക് നീതി വൈകില്ല.
വിധിക്ക് പിന്നിലെ കേസ്
എറണാകുളം കറുകപ്പിള്ളി സ്വദേശിയും വിരമിച്ച പ്രധാനാധ്യാപകനുമായ സി.ഡി. ജോയിക്ക് മെഡിസെപ്പ് പ്രകാരമുള്ള ഇൻഷുറൻസ് ക്ലെയിം നിഷേധിക്കപ്പെട്ടതിനെ തുടർന്നാണ് നിയമപോരാട്ടം ആരംഭിച്ചത്. അദ്ദേഹം എറണാകുളം ജില്ലാ ഉപഭോക്തൃ കമ്മീഷനിൽ പരാതി നൽകി. എന്നാൽ, സർക്കാരും ഇൻഷുറൻസ് കമ്പനിയും തമ്മിലുള്ള കരാർ പ്രകാരമുള്ള ആഭ്യന്തര പരാതി പരിഹാര സംവിധാനം ഉപയോഗിക്കാതെ നേരിട്ട് കോടതിയെ സമീപിക്കാനാവില്ലെന്ന് ഇൻഷുറൻസ് കമ്പനി വാദിച്ചു.
ഈ വാദം തള്ളിയ ജില്ലാ കമ്മീഷൻ, ഉപഭോക്താവിന് നേരിട്ട് കോടതിയെ സമീപിക്കാൻ അവകാശമുണ്ടെന്ന് വിധിച്ചു. ഈ ഉത്തരവിനെതിരെയാണ് ഓറിയന്റൽ ഇൻഷുറൻസ് കമ്പനി സംസ്ഥാന കമ്മീഷനിൽ അപ്പീൽ നൽകിയത്. എന്നാൽ, ജില്ലാ കമ്മീഷന്റെ ഉത്തരവ് ശരിവെച്ച സംസ്ഥാന കമ്മീഷൻ, ഇൻഷുറൻസ് കമ്പനിയുടെ ഹർജി തള്ളുകയായിരുന്നു.
2019-ലെ ഉപഭോക്തൃ സംരക്ഷണ നിയമത്തിലെ 100-ാം വകുപ്പ് പ്രകാരം, സേവനത്തിലെ ഏതൊരു ന്യൂനതയ്ക്കും അധാർമ്മികമായ വ്യാപാര രീതികൾക്കുമെതിരെ ഉപഭോക്താവിന് നേരിട്ട് ഉപഭോക്തൃ കോടതികളെ സമീപിക്കാൻ അവകാശമുണ്ടെന്ന് സംസ്ഥാന കമ്മീഷൻ പ്രസിഡണ്ട് ജസ്റ്റിസ് ബി. സുധീന്ദ്രകുമാർ, ജുഡീഷ്യൽ അംഗം ഡി. അജിത് കുമാർ എന്നിവരടങ്ങിയ ബെഞ്ച് ഉത്തരവിൽ വ്യക്തമാക്കി.
