ഇന്ത്യയുടെ ‘ആകാശ്’ മിസൈലിൽ കണ്ണുവെച്ച് ബ്രസീൽ; പ്രതിരോധ രംഗത്ത് സഹകരണത്തിന് സാധ്യത
ന്യൂഡൽഹി: ഇന്ത്യയുടെ പ്രതിരോധ സാങ്കേതികവിദ്യയിൽ അതീവ താൽപര്യം പ്രകടിപ്പിച്ച് ബ്രസീൽ. ഇന്ത്യ തദ്ദേശീയമായി വികസിപ്പിച്ച ആകാശ് വ്യോമ പ്രതിരോധ മിസൈൽ സംവിധാനം, പീരങ്കികൾ, ഓഫ്‌ഷോർ പട്രോളിംഗ് കപ്പലുകൾ എന്നിവ വാങ്ങാനാണ് ബ്രസീൽ സന്നദ്ധത അറിയിച്ചിരിക്കുന്നത്.
അടുത്ത മാസം പ്രധാനമന്ത്രി നരേന്ദ്ര മോദി ബ്രസീൽ സന്ദർശിക്കാനിരിക്കെ, ഇരു രാജ്യങ്ങളും തമ്മിലുള്ള പ്രതിരോധ സഹകരണത്തിൽ നിർണായകമായ മുന്നേറ്റമുണ്ടാകുമെന്നാണ് സൂചന.
കഴിഞ്ഞ ഒരു വർഷത്തിനിടെ ബ്രസീലിന്റെ മൂന്ന് ഫോർ-സ്റ്റാർ സൈനിക ഉദ്യോഗസ്ഥർ ഇന്ത്യ സന്ദർശിച്ചിരുന്നു. ഇത് ഇന്ത്യയുമായി ചേർന്ന് പ്രവർത്തിക്കാനുള്ള ബ്രസീലിന്റെ താൽപര്യമാണ് വ്യക്തമാക്കുന്നത്. പാകിസ്താനുമായുണ്ടായ നാലുദിവസത്തെ ‘ഓപ്പറേഷൻ സിന്ദൂർ’ സംഘർഷത്തിൽ ഏറെ വിജയകരമായിരുന്ന ആകാശ് മിസൈൽ സംവിധാനത്തിലും, സുരക്ഷിതമായ ആശയവിനിമയ ഉപകരണങ്ങളിലും ബ്രസീൽ പ്രത്യേക താൽപര്യം പ്രകടിപ്പിച്ചതായി വിദേശകാര്യ മന്ത്രാലയം സെക്രട്ടറി (ഈസ്റ്റ്) പി. കുമാരൻ പറഞ്ഞു.
അന്തർവാഹിനി മുതൽ വിമാനം വരെ
സഹകരണത്തിന് സാധ്യതയുള്ള ഒരു പ്രധാന മേഖല അന്തർവാഹിനികളാണ്. ഇന്ത്യയും ബ്രസീലും ഫ്രഞ്ച് നിർമ്മിത സ്കോർപീൻ അന്തർവാഹിനികളാണ് ഉപയോഗിക്കുന്നത്. അതിനാൽ, ഇവയുടെ അറ്റകുറ്റപ്പണികൾ, പരിശീലനം, നവീകരണം തുടങ്ങിയ കാര്യങ്ങളിൽ ഇരു നാവികസേനകൾക്കും ഒരുമിച്ച് പ്രവർത്തിക്കാൻ സാധിക്കും.
മറുവശത്ത്, ബ്രസീൽ അവരുടെ എംബ്രയർ വിമാനങ്ങൾ ഇന്ത്യക്ക് വാഗ്ദാനം ചെയ്യുന്നുണ്ട്. നിരീക്ഷണത്തിനും, ആകാശത്ത് വെച്ച് മുന്നറിയിപ്പ് നൽകുന്ന ‘ഐ-ഇൻ-ദി-സ്കൈ’ സംവിധാനങ്ങൾക്കുമായി ഈ വിമാനങ്ങൾ ഉപയോഗിക്കാമെന്നാണ് ബ്രസീലിന്റെ വാഗ്ദാനം.
നിലവിൽ വിവിഐപി യാത്രകൾക്കായി ഇന്ത്യ എംബ്രയർ വിമാനങ്ങൾ ഉപയോഗിക്കുന്നുണ്ട്. ആയുധങ്ങൾക്ക് പകരം വിമാനങ്ങൾ എന്ന രീതിയിലുള്ള ഒരു കൈമാറ്റക്കരാറിനും (സ്വാപ്) ബ്രസീൽ ശ്രമിക്കുന്നുണ്ട്. എന്നാൽ, ബ്രസീലിലെ ഒരു സ്വകാര്യ കമ്പനി നിർമ്മിക്കുന്ന വിമാനങ്ങളും ഇന്ത്യയിലെ പ്രതിരോധ പൊതുമേഖലാ സ്ഥാപനങ്ങൾ നിർമ്മിക്കുന്ന ആയുധങ്ങളും തമ്മിൽ മൂല്യം കണക്കാക്കി വെച്ചുമാറുന്നത് എളുപ്പമാവില്ലെന്ന് വിദഗ്ധർ ചൂണ്ടിക്കാട്ടുന്നു.
പ്രതിരോധ സംഭരണ കൗൺസിൽ യോഗം ജൂലൈ 3-ന്
അതേസമയം, രാജ്യരക്ഷാ മന്ത്രി രാജ്‌നാഥ് സിംഗിന്റെ നേതൃത്വത്തിലുള്ള ഡിഫൻസ് അക്വിസിഷൻ കൗൺസിൽ (DAC) യോഗം ജൂലൈ 3-ന് ചേരും. നാവികസേനയ്ക്ക് വേണ്ടി 40,000 കോടി രൂപ വിലമതിക്കുന്ന ഒരു ഡസൻ മൈൻസ്വീപ്പർ കപ്പലുകൾ, കരസേനയ്ക്ക് വേണ്ടി 30,000 കോടി രൂപയുടെ ക്വിക്ക് റിയാക്ഷൻ ഷോർട്ട് റേഞ്ച് മിസൈലുകൾ എന്നിവ വാങ്ങുന്ന കാര്യത്തിൽ ഈ യോഗം നിർണായക തീരുമാനമെടുത്തേക്കും.
