ലണ്ടൻ: ഫുട്ബോൾ ലോകം ഒന്നടങ്കം ഉറ്റുനോക്കുന്ന ചോദ്യത്തിന് ഇപ്പോഴും ഉത്തരമായില്ല; അർജന്റീനയുടെ ഇതിഹാസ താരം ലയണൽ മെസ്സി 2026-ലെ ഫിഫ ലോകകപ്പിൽ കളിക്കുമോ? ഇക്കാര്യത്തിൽ മെസ്സി അന്തിമ തീരുമാനം എടുത്തിട്ടില്ലെന്ന് അദ്ദേഹത്തിന്റെ ഔദ്യോഗിക ജീവചരിത്രകാരനായ ഗീയം ബാലാഗെ ബിബിസി സ്പോർട്ടിനോട് വെളിപ്പെടുത്തി. ഇതോടെ, അടുത്ത ലോകകപ്പിലും മെസ്സിയുടെ മാന്ത്രിക പ്രകടനം കാണാനാകുമെന്ന പ്രതീക്ഷയിലാണ് ആരാധകർ.
“അടുത്ത ലോകകപ്പിൽ കളിക്കുമോയെന്ന് മെസ്സിക്ക് പോലും അറിയില്ല. അമേരിക്കയിൽ തുടരുകയാണെങ്കിൽ, ടൂർണമെന്റിനോട് അടുക്കുമ്പോൾ മാത്രമായിരിക്കും അദ്ദേഹം ഒരു തീരുമാനമെടുക്കുക. ഇപ്പോൾ ഓരോ നിമിഷവും ആസ്വദിച്ചാണ് അദ്ദേഹം കളിക്കുന്നത്. മെസ്സി വീണ്ടും അർജന്റീനയെ നയിക്കുമെന്ന് പലരും പ്രതീക്ഷിക്കുന്നു, പക്ഷെ അന്തിമ തീരുമാനം അദ്ദേഹത്തിന്റേത് മാത്രമായിരിക്കും,” ഗീയം ബാലാഗെ പറഞ്ഞു.
എട്ട് തവണ ബാലൺ ഡി ഓർ ജേതാവായ മെസ്സി, അമേരിക്ക, കാനഡ, മെക്സിക്കോ എന്നിവിടങ്ങളിലായി നടക്കുന്ന അടുത്ത ലോകകപ്പിൽ ഉണ്ടാകുമെന്ന് പ്രതീക്ഷിക്കപ്പെടുന്നുണ്ടെങ്കിലും, താരം ഇതേക്കുറിച്ച് വ്യക്തമായ ഒരു പ്രസ്താവന നടത്താൻ തയ്യാറായിട്ടില്ല. “ഓരോ മത്സരം വീതം” എന്ന രീതിയിലാണ് മെസ്സി മുന്നോട്ട് പോകുന്നതെന്നും ദീർഘകാല പദ്ധതികൾ തയ്യാറാക്കാറില്ലെന്നും ബാലാഗെ കൂട്ടിച്ചേർത്തു. ഇന്റർ മയാമിയിലെ അദ്ദേഹത്തിന്റെ കരാർ ദീർഘിപ്പിച്ചേക്കാം, എന്നാൽ അത് ലോകകപ്പ് പങ്കാളിത്തത്തിന് ഒരു ഉറപ്പല്ലെന്നും അദ്ദേഹം വ്യക്തമാക്കി.
