കോവിഡ് കേസുകൾ ഉയരുന്നു; 24 മണിക്കൂറിനിടെ 300 പുതിയ കേസുകൾ, 2 മരണം കൂടി

ന്യൂഡൽഹി: രാജ്യത്ത് കോവിഡ്-19 കേസുകളിൽ വീണ്ടും വർധന. കഴിഞ്ഞ 24 മണിക്കൂറിനിടെ 300-നടുത്ത് പുതിയ കേസുകൾ റിപ്പോർട്ട് ചെയ്തു. ഇതോടെ രാജ്യത്തെ ആകെ സജീവ കോവിഡ് കേസുകളുടെ എണ്ണം 4302 ആയി ഉയർന്നതായി കേന്ദ്ര ആരോഗ്യ കുടുംബക്ഷേമ മന്ത്രാലയം ബുധനാഴ്ച പുറത്തുവിട്ട കണക്കുകൾ വ്യക്തമാക്കുന്നു. ഏറ്റവും കൂടുതൽ പുതിയ കേസുകൾ റിപ്പോർട്ട് ചെയ്യപ്പെട്ടിരിക്കുന്നത് കേരളത്തിലാണ്.

കഴിഞ്ഞ 24 മണിക്കൂറിനിടെ രണ്ട് കോവിഡ് മരണങ്ങൾ കൂടി രാജ്യത്ത് സ്ഥിരീകരിച്ചിട്ടുണ്ട്. ഇതോടെ ഈ വർഷത്തെ ആകെ കോവിഡ് മരണസംഖ്യ ഏഴായി.

വ്യാപനത്തിന് പിന്നിൽ പുതിയ വകഭേദങ്ങൾ

ഈ വർഷത്തെ കോവിഡ് കേസുകളിലെ വർധനയ്ക്ക് പിന്നിൽ LF.7, XFG, JN.1, NB.1.8.1 എന്നീ നാല് പുതിയ വൈറസ് വകഭേദങ്ങളാണെന്ന് വാർത്താ ഏജൻസിയായ പിടിഐ റിപ്പോർട്ട് ചെയ്യുന്നു. ഇതിൽ NB.1.8.1 ഇന്ത്യയിൽ പുതുതായി കണ്ടെത്തിയ ഉപവകഭേദമാണ്. ലോകാരോഗ്യ സംഘടനയുടെ സാങ്കേതിക ഉപദേശക സമിതി ഈ വകഭേദത്തെ ‘നിരീക്ഷണത്തിലുള്ള വകഭേദം’ (Variant Under Monitoring) എന്ന വിഭാഗത്തിൽപ്പെടുത്തിയിട്ടുണ്ട്. വൈറസിന്റെ സ്വഭാവത്തിൽ കാര്യമായ മാറ്റങ്ങളുണ്ടെങ്കിലും പകർച്ചവ്യാധി എന്ന നിലയിൽ ഇതിന്റെ പ്രത്യാഘാതങ്ങൾ വ്യക്തമല്ലാത്തതിനാലാണ് ഈ നടപടി.

കോവിഡ് കേസുകൾ ഉയരാൻ കാരണം

പല രാജ്യങ്ങളിലും കോവിഡ് കേസുകളിൽ പുതിയ വർധന രേഖപ്പെടുത്തുന്നുണ്ടെങ്കിലും മരണനിരക്ക് കുറവായി തുടരുന്നുവെന്നാണ് ആശ്വാസകരമായ വാർത്ത. കോവിഡ് പോസിറ്റീവാകുന്ന മിക്കവരിലും നേരിയ ലക്ഷണങ്ങൾ മാത്രമാണ് കാണപ്പെടുന്നത്. വാക്സിനേഷനിലൂടെയോ മുൻപുണ്ടായ രോഗബാധയിലൂടെയോ ലഭിച്ച പ്രതിരോധശേഷി കാലക്രമേണ കുറയുന്നതാണ് കേസുകൾ വീണ്ടും കൂടാനുള്ള ഒരു പ്രധാന കാരണം.

ഇത് വ്യക്തികളെ വീണ്ടും രോഗബാധിതരാകാൻ കൂടുതൽ സാധ്യതയുള്ളവരാക്കുന്നു. മറ്റ് വൈറസുകളെപ്പോലെ, SARS-CoV-2 വൈറസും നിരന്തരം ജനിതകമാറ്റത്തിന് വിധേയമായിക്കൊണ്ടിരിക്കുന്നു. ഈ പുതിയ വകഭേദങ്ങളിൽ ചിലത് കൂടുതൽ എളുപ്പത്തിൽ പടരാനോ പ്രതിരോധശേഷിയെ കൂടുതൽ മറികടക്കാനോ ശേഷിയുള്ളവയാകാം, ഇതാണ് പുതിയ രോഗവ്യാപനങ്ങൾക്ക് കാരണമാകുന്നത്.