ഗ്രാറ്റുവിറ്റിയിൽ നിന്ന് കുടിശ്ശിക ഈടാക്കാൻ ഇ-സമ്മതത്തിന് സർക്കാർ അനുമതി

സർക്കാർ ജീവനക്കാരുടെയോ പെൻഷൻകാരുടെയോ ഗ്രാറ്റുവിറ്റിയിൽ നിന്ന് സർക്കാർ സ്ഥാപനങ്ങൾക്കും സഹകരണ സംഘങ്ങൾക്കും തദ്ദേശ സ്ഥാപനങ്ങൾക്കും നൽകേണ്ട തുകകൾ ഇനി ഇലക്ട്രോണിക് സമ്മതം (ഡിജിറ്റൽ ഒപ്പ്) അടിസ്ഥാനമാക്കി ഈടാക്കാൻ സർക്കാർ അനുമതി നൽകി. കെ.എസ്.ആർ.എസ്. ഭാഗം III, റൂൾ 3-ൽ ഭേദഗതി വരുത്തി ധനകാര്യ വകുപ്പ് 2025 ഫെബ്രുവരി 1-ന് ഉത്തരവ് പുറപ്പെടുവിച്ചു.

പുതിയ ഭേദഗതിയനുസരിച്ച്, ജീവനക്കാരൻ വിരമിക്കുമ്പോൾ ഡ്രോയിംഗ് ആൻഡ് ഡിസ്‌ബേഴ്‌സിംഗ് ഓഫീസർക്ക് രേഖാമൂലമുള്ള സമ്മതം (ഡിജിറ്റൽ ഒപ്പോടുകൂടിയ ഇ-സമ്മതം ഉൾപ്പെടെ) നൽകിയാൽ മാത്രമേ ഗ്രാറ്റുവിറ്റിയിൽ നിന്ന് തുക ഈടാക്കാൻ കഴിയൂ. വായ്പയ്ക്ക് അപേക്ഷിക്കുന്ന സമയത്ത് നൽകിയ സമ്മതം ഇനി മുതൽ അംഗീകരിക്കില്ല.

2019-ലെ സർക്കാർ ഉത്തരവും 2021-ലെ ഹൈക്കോടതി വിധികളും അടിസ്ഥാനമാക്കിയാണ് ഈ മാറ്റം വരുത്തിയത്. പുതിയ തീരുമാനം സർക്കാർ ജീവനക്കാരുടെ ഗ്രാറ്റുവിറ്റി ഫണ്ടിൽ നിന്ന് നിയമാനുസൃതമായി കുടിശ്ശിക ഈടാക്കൽ കൂടുതൽ സുതാര്യവും സുരക്ഷിതവുമാക്കുമെന്ന് സർക്കാർ ഉത്തരവ്.