ന്യൂഡൽഹി: ഇന്ത്യക്കെതിരെ പ്രകോപനപരമായ ഉള്ളടക്കങ്ങൾ പ്രചരിപ്പിച്ചതിനും ഇന്ത്യയെയും ഇന്ത്യൻ സൈന്യത്തെയും സുരക്ഷാ ഏജൻസികളെയും കുറിച്ച് തെറ്റായ വിവരങ്ങൾ നൽകിയതിനും 16 പാകിസ്താനി യൂട്യൂബ് ചാനലുകൾക്ക് തിങ്കളാഴ്ച കേന്ദ്ര സർക്കാർ നിരോധനം ഏർപ്പെടുത്തി. ആഭ്യന്തര മന്ത്രാലയത്തിന്റെ ശുപാർശ അനുസരിച്ചാണ് കേന്ദ്രത്തിന്റെ നടപടി.
അതിനിടെ, ജമ്മു കശ്മീരിലെ പൂഞ്ച്, കുപ്വാര ജില്ലകളിൽ പാകിസ്താൻ സൈന്യം പ്രകോപനമില്ലാതെ വെടിയുതിർത്ത് വെടിനിർത്തൽ കരാർ ലംഘനം തുടർന്നതായി സൈനിക ഉദ്യോഗസ്ഥർ അറിയിച്ചു. ഇത് തുടർച്ചയായ നാലാം രാത്രിയാണ് അതിർത്തി നിയന്ത്രണ രേഖയിൽ (എൽഒസി) വെടിനിർത്തൽ ലംഘനം നടക്കുന്നത്. ഇത് പഹൽഗാം ഭീകരാക്രമണത്തിന് പിന്നാലെ ഇരു രാജ്യങ്ങളും തമ്മിലുള്ള സംഘർഷം കൂടുതൽ വർദ്ധിപ്പിച്ചിട്ടുണ്ട്.
പഹൽഗാം ഭീകരർക്കുവേണ്ടിയുള്ള തിരച്ചിൽ തുടരുന്നു
പഹൽഗാം ഭീകരാക്രമണം നടത്തിയവരെ കഴിഞ്ഞ അഞ്ച് ദിവസത്തിനിടെ കുറഞ്ഞത് നാല് തവണയെങ്കിലും വിവിധ സ്ഥലങ്ങളിൽ സുരക്ഷാ സേന കണ്ടെത്തിയതായി ദേശീയ മാധ്യമങ്ങൾ റിപ്പോർട്ട് ചെയ്യുന്നു. ദക്ഷിണ കശ്മീരിലെ വനമേഖലകളിൽ അവരെ വളയാൻ വളരെ അടുത്തെത്തിയെന്നും, ഒരു ഘട്ടത്തിൽ സുരക്ഷാ സേനയും ഭീകരരും തമ്മിൽ വെടിവെപ്പ് നടന്നെന്നും റിപ്പോർട്ടിൽ പറയുന്നു. പ്രാദേശിക താമസക്കാരിൽ നിന്നുള്ള വിവരങ്ങൾ, രഹസ്യാന്വേഷണ റിപ്പോർട്ടുകൾ, കോമ്പിംഗ് ഓപ്പറേഷനുകൾ എന്നിവ വഴിയാണ് ഭീകരരെ കണ്ടെത്തിയതെന്ന് വൃത്തങ്ങൾ അറിയിച്ചു.
പാക് പൗരന്മാർ മടങ്ങി
മെഡിക്കൽ വിസ, നയതന്ത്ര വിസ, ദീർഘകാല വിസ എന്നിവയിലുള്ളവരൊഴികെ, ഇന്ത്യയിലുള്ള പാകിസ്താൻ പൗരന്മാർക്ക് രാജ്യം വിടാനുള്ള സമയപരിധി ഞായറാഴ്ച (ഏപ്രിൽ 27, 2025) അവസാനിച്ചു. ഭൂരിഭാഗം പേരും രാജ്യം വിട്ടതായും കൂടുതൽ പരിശോധനകൾ നടന്നുവരികയാണെന്നും ഒരു മുതിർന്ന ആഭ്യന്തര മന്ത്രാലയ ഉദ്യോഗസ്ഥൻ വ്യക്തമാക്കി.
റഷ്യയുടെയും ചൈനയുടെയും പങ്കാളിത്തം വേണമെന്ന് പാകിസ്താൻ
പഹൽഗാം ഭീകരാക്രമണത്തെക്കുറിച്ച് അന്വേഷിക്കാൻ റഷ്യയുടെയും ചൈനയുടെയും പങ്കാളിത്തം വേണമെന്ന് പാകിസ്ഥാൻ ആവശ്യപ്പെട്ടു. റഷ്യൻ സർക്കാർ ഉടമസ്ഥതയിലുള്ള ‘ആർഐഎ നോവോസ്റ്റി’ വാർത്താ ഏജൻസിക്ക് അടുത്തിടെ നൽകിയ അഭിമുഖത്തിൽ പാകിസ്ഥാൻ പ്രതിരോധ മന്ത്രി ഖവാജ ആസിഫ് ഇക്കാര്യം പറഞ്ഞു. “ഈ പ്രതിസന്ധിയിൽ റഷ്യയോ ചൈനയോ അല്ലെങ്കിൽ പാശ്ചാത്യ രാജ്യങ്ങളോ പോലും വളരെ ക്രിയാത്മകമായ പങ്ക് വഹിക്കാൻ കഴിയും. ഇന്ത്യയോ മോദിയോ കളവ് പറയുകയാണോ സത്യം പറയുകയാണോ എന്ന് അന്വേഷിക്കാൻ ഒരു അന്വേഷണ സംഘത്തെ പോലും അവർക്ക് രൂപീകരിക്കാൻ കഴിയും. ഒരു അന്താരാഷ്ട്ര സംഘം അത് കണ്ടെത്തട്ടെ,” അദ്ദേഹം പറഞ്ഞു. നിലവിലെ സംഘർഷ സാഹചര്യത്തിൽ പാകിസ്ഥാന്റെ ഈ ആവശ്യം ഏറെ ശ്രദ്ധേയമാണ്.
