ഭിന്നശേഷിക്കാരായ കുട്ടികളുള്ള സർക്കാർ ജീവനക്കാർക്ക് അവധിക്ക് പുതിയ മെഡിക്കൽ സർട്ടിഫിക്കറ്റ് ആവശ്യമില്ല

ശാരീരിക മാനസിക വെല്ലുവിളി നേരിടുന്ന കുട്ടികളുടെ സർക്കാർ ജീവനക്കാരായ മാതാപിതാക്കൾക്ക് അനുവദിക്കുന്ന പ്രത്യേക ആകസ്മിക അവധിക്ക് ഓരോ തവണയും മെഡിക്കൽ സർട്ടിഫിക്കറ്റ് ഹാജരാക്കണം എന്ന വ്യവസ്ഥയിൽ ഇളവ് വരുത്തിക്കൊണ്ട് സർക്കാർ ഗസറ്റ് വിജ്ഞാപനം പുറത്തിറക്കി.

ഇതുപ്രകാരം ശാരീരികമോ മാനസികമോ ആയ വൈകല്യമുള്ള കുട്ടികളുള്ള സർക്കാർ ജീവനക്കാർ ഇനി മുതൽ സ്പെഷ്യൽ കാഷ്വൽ ലീവിന് അപേക്ഷിക്കുമ്പോഴെല്ലാം പുതിയ മെഡിക്കൽ സർട്ടിഫിക്കറ്റ് ഹാജരാക്കേണ്ടതില്ല. കേരള സർവീസ് ചട്ടങ്ങളിൽ ധനവകുപ്പ് ഭേദഗതി വരുത്തി.

സ്‌പെഷ്യൽ കാഷ്വൽ ലീവ് കൈകാര്യം ചെയ്യുന്ന വിഭാഗത്തിൽ, ചട്ടം 20 പ്രകാരം, ‘ഓരോ അവസരങ്ങളിലും ലീവ്’ എന്ന വരി പകരം ‘ലീവ് ആവശ്യമുള്ളപ്പോൾ ജീവനക്കാരൻ അത്തരം സർട്ടിഫിക്കറ്റ് ഹാജരാക്കണം, അതിന്റെ പകർപ്പ് ഇതിനായി ഉപയോഗിക്കാം.’. ശാരീരികമോ മാനസികമോ ആയ വൈകല്യമുള്ള കുട്ടികളുള്ള ജീവനക്കാർക്ക് ഒരു കലണ്ടർ വർഷത്തിൽ പരമാവധി 15 ദിവസത്തേക്ക് പ്രത്യേക കാഷ്വൽ ലീവ് അനുവദിക്കാൻ ചട്ടം 20 വിഭാവനം ചെയ്യുന്നുണ്ട്, അവധിയുടെ ഓരോ അവസരത്തിലും കുട്ടിക്ക് ശാരീരികമോ മാനസികമോ ആയ വൈകല്യങ്ങൾ ആണെന്ന് കാണിക്കുന്ന മെഡിക്കൽ ഓഫീസറുടെ സർട്ടിഫിക്കറ്റ് ഹാജരാക്കേണ്ടതുണ്ടായിരുന്നതാണ് ഇപ്പോൾ മാറ്റം വന്നിരിക്കുന്നത്.

ഓരോ അവസരത്തിലും പുതിയ സർട്ടിഫിക്കറ്റുകൾ ഹാജരാക്കുന്നത് ജീവനക്കാർക്ക് അനാവശ്യ ബുദ്ധിമുട്ടുകൾ സൃഷ്ടിക്കുന്നു. നടപടിക്രമങ്ങൾ ലഘൂകരിക്കുന്നതിനായി കേരള സർവീസ് ചട്ടങ്ങളിൽ ഉചിതമായ ഭേദഗതികൾ വരുത്താൻ സർക്കാർ തീരുമാനിച്ചതായി ധനവകുപ്പ് അഡീഷണൽ ചീഫ് സെക്രട്ടറി എ ജയതിലക് പുറത്തിറക്കിയ വിജ്ഞാപനത്തിൽ പറയുന്നു.