എടിഎമ്മിലൂടെ പിഎഫ് തുക: ഈ വർഷം പകുതിയോടെയെന്ന് കേന്ദ്രമന്ത്രി; ഒന്നുമറിയില്ലെന്ന് ഇപിഎഫ്ഒ

ഈ വർഷം മെയ്-ജൂൺ മാസത്തോടെ ഇപിഎഫ്ഒ വരിക്കാർക്ക് പുതിയ മൊബൈൽ ആപ്ലിക്കേഷനും ഡെബിറ്റ് കാർഡ് സൗകര്യവും നൽകുന്നതിനുള്ള ഒരുക്കങ്ങൾ നടക്കുന്നുണ്ടെന്ന് കേന്ദ്ര തൊഴിൽ- തൊഴിൽ മന്ത്രി മൻസുഖ് മാണ്ഡവ്യ അറിയിച്ചു.

മുഴുവൻ ഐടി സംവിധാനവും അപ്ഗ്രേഡ് ചെയ്യുന്ന ഇപിഎഫ്ഒ 2.0 പ്രവർത്തനങ്ങൾ നടന്നുവരികയാണ്. ജനുവരി അവസാനത്തോടെ ഇത് പൂർത്തിയാകുമെന്നാണ് പ്രതീക്ഷ. തുടർന്ന് മെയ്-ജൂൺ മാസത്തോടെ ഇപിഎഫ്ഒ 3.0 ആപ്പ് പുറത്തിറക്കും. ഇത് ഇപിഎഫ്ഒ വരിക്കാർക്ക് ബാങ്കിംഗ് സൗകര്യങ്ങൾ നൽകും. ഇത് മുഴുവൻ സംവിധാനത്തെയും കേന്ദ്രീകരിക്കുകയും ക്ലെയിം തീർപ്പാക്കൽ നടപടിക്രമം ലളിതമാക്കുകയും ചെയ്യും – മാണ്ഡവ്യ വ്യക്തമാക്കി.

്അതേസമയം, പ്രൊവിഡന്റ് ഫണ്ട് (പിഎഫ്) തുക എടിഎമ്മിലൂടെ പിൻവലിക്കാനുള്ള പദ്ധതി സംബന്ധിച്ച വിവരങ്ങളൊന്നും അറിയില്ലെന്ന് എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ (ഇപിഎഫ്ഒ). വിവരാവകാശ മറുപടിയിലാണ് ഇപിഎഫ്ഒ അറിവില്ലായ്മ വെളിപ്പെടുത്തിയിരിക്കുന്നത്. 2025 ജനുവരിയോടുകൂടി പിഎഫ് തുക എടിഎമ്മിലൂടെ പിൻവലിക്കാൻ സാധിക്കുന്ന പദ്ധതി നടപ്പാക്കുമെന്ന് തൊഴിൽ മന്ത്രാലയം സെക്രട്ടറി സുമതി ദാവ്‌റ വെളിപ്പെടുത്തിയിരുന്നു. ഇതിനായി എടിഎം കാർഡുകൾ വിതരണം ചെയ്യുമെന്നും പ്രഖ്യാപിച്ചെങ്കിലും മറ്റ് വിവരങ്ങളൊന്നും തന്നെ പുറത്തുവന്നിരുന്നില്ല. തുടർന്നാണ് വിവരവകാശ നിയമപ്രകാരം അന്വേഷിച്ചത്.

എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ (ഇപിഎഫ്ഒ) വരിക്കാർക്ക് എടിഎം കാർഡ് ലഭ്യമാക്കാൻ പദ്ധതിയുണ്ടോ ഉണ്ടെങ്കിൽ എന്നു ലഭ്യമാക്കും, പെൻഷൻകാർക്കും അല്ലാത്തവർക്കും എടിഎം കാർഡ് ലഭിക്കുമോ, ഇത്തരം കാർഡുകൾ ഏതൊക്കെ ബാങ്കുകളുടെ എടിഎമ്മിൽ ഉപയോഗിക്കാൻ കഴിയും, പണം പിൻവലിക്കുന്നതിനു പരിധിയുണ്ടോ തുടങ്ങിയ ചോദ്യങ്ങളാണു വിവരാവകാശപ്രകാരം ഉന്നയിച്ചത്.

വിവരങ്ങൾ വ്യാഖ്യാനിക്കാനോ സാങ്കൽപിക ചോദ്യങ്ങൾക്കു മറുപടി നൽകാനോ കഴിയില്ലെന്ന് ഇപിഎഫ്ഒ മറുപടി നൽകി. ഇപിഎഫ്ഒ സേവനങ്ങളെക്കുറിച്ച് അറിയാൻ വെബ്‌സൈറ്റ് സന്ദർശിക്കണമെന്നും സമൂഹമാധ്യമ അക്കൗണ്ടുകൾ നോക്കണമെന്നും മറുപടിയിലുണ്ട്.

റിസർവ് ബാങ്കുമായി ചർച്ച

ഇപിഎഫ്ഒ 3.0 വഴി ഇപിഎഫ്ഒ വരിക്കാർക്ക് ബാങ്കിംഗ് സൗകര്യങ്ങൾ നൽകുന്നതിനായി റിസർവ് ബാങ്ക് ഓഫ് ഇന്ത്യയും ധനകാര്യ മന്ത്രാലയവും തമ്മിലുള്ള ചർച്ചകൾ നടന്നുവരികയാണെന്നാണ് അറിയുന്നത്. എടിഎം കാർഡുകൾ ഉപയോഗിച്ച് എടിഎമ്മിൽ നിന്ന് ഇപിഎഫ്ഒ ഫണ്ട് പിൻവലിക്കാൻ അനുവദിക്കുന്നതിനുള്ള നീക്കത്തിന് ആർബിഐയുടെ നിലപാട് നിർണായകമാണ്.

പിൻവലിക്കൽ പരിധി എന്തായിരിക്കും?

എടിഎം കാർഡ് ലഭിക്കുന്നത് ഗുണഭോക്താക്കൾക്ക് തങ്ങളുടെ മുഴുവൻ സംഭാവന തുകയും പിൻവലിക്കാൻ അനുമതി നൽകുമെന്നല്ല. പിൻവലിക്കൽ പരിധി നിശ്ചയിക്കപ്പെടും. എന്നിരുന്നാലും, ഈ പരിധിക്കുള്ളിൽ പിൻവലിക്കലുകൾക്ക് മുമ്പ് ഇപിഎഫ്ഒയുടെ അനുമതി ആവശ്യമില്ലെന്നതാണ് ഗുണം. ഗവൺമെന്റിന്റെ ഈ നടപടി ഇപിഎഫ്ഒ ഗ്രാഹകർക്ക് വളരെയധികം ഗുണം ചെയ്യും, ബുദ്ധിമുട്ടുള്ള ഫോം പൂരിപ്പിക്കൽ ഭാരത്തിൽ നിന്ന് അവരെ മുക്തിപ്പെടുത്തുകയും ഓഫീസ് സന്ദർശനം ആവശ്യമില്ലാതാക്കുകയും ചെയ്യും.