ബിഗ് ബോസ് ചരിത്രത്തിലെ എല്ലാ റെക്കോർഡുകളും തകർത്ത സീസണായിരുന്നു കഴിഞ്ഞ തവണത്തേത്‌. റേറ്റിങ്ങിലും എല്ലാം മുന്നിൽ നിന്ന ബിഗ് ബോസ് പല വിവാദങ്ങൾക്കും കാരണമായി. എന്നാൽ ബിഗ് ബോസ് മലയാളം സീസൺ സിക്സ് അവസാനിച്ച് ഇത്രയേറെ മാസങ്ങളായിട്ടും ബിഗ് ബോസ് താരങ്ങൾ തന്നെയാണ് സോഷ്യൽ മീഡിയയിലെ ചർച്ച വിഷയം. ഷോയിൽ ഏറെ വിമർശങ്ങൾ കേൾക്കേണ്ടി വന്ന വ്യക്തികളാണ് ജാസ്മിനും ഗബ്രിയും. എന്നാൽ പുറത്തിറങ്ങിയാൽ ഇരുവരും അടിച്ചു പിരിയുമെന്ന് പറഞ്ഞവരുടെ അണ്ണാക്കിൽ മറുപടി നൽകിക്കൊണ്ടാണ് ഇരുവരും തങ്ങളുടെ വിശേഷങ്ങൾ പങ്കുവയ്ക്കുന്നത്.
അത്തരത്തിൽ ജാസ്മിന്റെയും ഗബ്രിയുടെയും പുതിയ ഫോട്ടോഷൂട്ട് വിശേഷങ്ങളാണ് വൈറലാകുന്നത്. ബിഗ് ബോസിൽ നിന്നും ഇറങ്ങിയശേഷം ഇരുവരും ആദ്യമായി ഒരുമിച്ച് ചെയ്യുന്ന പ്രൊഫഷണൽ ഫോട്ടോഷൂട്ട് കൂടിയാണിത്. സേവ് ദി ഡേറ്റിന് സമാനമായ രീതിയിൽ ഫെയറിടെയ്ലെന്ന് നിസംശയം വിശേഷിപ്പിക്കാൻ കഴിയുന്ന തരത്തിലുള്ളതാണ് ഇരുവരുടെയും ഫോട്ടോഷൂട്ട്. വെളുത്ത നിറത്തിലുള്ള മിനി ഗൗണാണ് ജാസ്മിൻ ധരിച്ചിരിക്കുന്നത്. വസ്ത്രത്തിന് ഇണങ്ങുന്ന തരത്തിൽ മിനിമൽ മേക്കപ്പും ആഭരണങ്ങളും ജാസ്മിൻ ധരിച്ചിട്ടുണ്ട്.
അതേസമയം, വെളുത്ത നിറത്തിലുള്ള പാന്റും ഷർട്ടും നിയോൺ ഗ്രീൻ നിറത്തിലുള്ള ടൈയ്യുമാണ് ഗബ്രിയുടെ വേഷം. പൂക്കളാൽ നിറഞ്ഞ പശ്ചാത്തലത്തിൽ ഇരുവരും പ്രണയാർ‌ദ്രരായി ഇരിക്കുന്ന ചിത്രങ്ങളാണ് ഏറെയും. ഒപ്പം ബോളിവുഡ് ഹിറ്റ് ചിത്രം ഏക് വില്ലനിലെ ഗാനത്തിനൊപ്പമുള്ള ഒരു റൊമാന്റിക്ക് റീലും ഇരുവരും പങ്കുവെച്ചിട്ടുണ്ട്. പതിവ് പോലെ പ്രശംസിച്ചും പരിഹസിച്ചുമുള്ള കമന്റുകളാണ് റീലിന് ഏറെയും ലഭിച്ചത്.
മെയ്ഡ് ഇൻ ഹെവൻ. ഈ നൂറ്റാണ്ടിലെ റോമിയോയേയും ജൂലിയറ്റിനേയും കാണുന്ന പ്രതീതി, രണ്ടുപേരും മാലാഖമാരെപ്പോലെ എന്നിങ്ങനെയെല്ലാം കമന്റുകളുണ്ട്. അതേസമയം, ബിഗ് ബോസ് മലയാളം സീസൺ ആറിൽ മത്സരാർത്ഥികളായി എത്തി അടുത്ത സൗഹൃദത്തിലായവരാണ് നടനായ ഗബ്രി ജോസും സോഷ്യൽമീഡിയ ഇൻഫ്ലൂവൻസറായ ജാസ്മിൻ ജാഫറും. ജാസ്മിനുമായി ഗബ്രി അടുത്തപ്പോൾ ഇരുവരും ഹൗസിൽ നിലനിൽക്കാൻ വേണ്ടി ലവ് കോമ്പോ കളിക്കുകയാണെന്നും ആക്ഷേപമുണ്ടായിരുന്നു.
ആദ്യത്തെ ഒരാഴ്ച ഇരുവരും ഇന്റിവിജ്വലായാണ് മത്സരിച്ചിരുന്നത്. പിന്നീട് സൗഹൃദം രൂപ്പപെട്ടതോടെയാണ് ഇരുവരും ഗെയിംസിൽ അടക്കം ഒരുമിച്ച് കളിക്കാൻ തുടങ്ങിയത്. ജാസ്മിനുമായുള്ള സൗഹൃദത്തിന്റെ പേരിലാണ് ശക്തനായ മത്സരാർത്ഥിയായിരുന്നിട്ടും അമ്പത് ദിവസം പിന്നിട്ടപ്പോഴേക്കും ഗബ്രിക്ക് പുറത്ത് പോകേണ്ടി വന്നത്. ജാസ്മിനുമായുള്ള സൗഹൃദം പ്രേക്ഷകർ സ്വീകരിച്ചിട്ടില്ലെന്നും നെഗറ്റീവാണ് കൂടുതലെന്ന് മനസിലാക്കിയിട്ടും ഇപ്പോഴും ജാസ്മിനുമായുള്ള സൗഹൃദം ഗബ്രി ഉപേക്ഷിച്ചിട്ടില്ല.
ജാസ്മിനെ സൈബർ ആക്രമണത്തിന് വിട്ടുകൊടുക്കാതെ ഏറ്റവും നല്ല സുഹൃത്തായി ഗബ്രി ഹൗസിൽ ഉള്ളതുപോലെ തന്നെയാണ് പുറത്തും. ബിഗ് ബോസിനുശേഷം വർക്കിനും മറ്റുള്ള സൗകര്യാർത്ഥം സ്വന്തം നാടായ കൊല്ലം വിട്ട് കൊച്ചിയിലാണ് ജാസ്മിന്റെ താമസം. ഗബ്രിയും ഇപ്പോൾ ജാസ്മിനെപ്പോലെ വ്ലോഗിങിലേക്ക് തിരിഞ്ഞിട്ടുണ്ട്. ചാനൽ തുടങ്ങി ആഴ്ചകൾക്കുള്ളിൽ തന്നെ ഒരു ലക്ഷത്തിന് മുകളിൽ സബ്സ്ക്രൈബേഴ്സിനെയാണ് ഗബ്രിക്ക് ലഭിച്ചത്. ജാസ്മിൻ തന്നെയാണ് യുട്യൂബ് ചാനലുമായി ബന്ധപ്പെട്ട കാര്യങ്ങളിൽ ഗബ്രിക്ക് ഗൈഡൻസ് നൽകുന്നത്. മാത്രമല്ല ഗബ്രിക്കൊപ്പം നിരന്തരമായി യാത്രകളും ജാസ്മിൻ നടത്തുന്നുണ്ട്.
