‘നവകേരള സദസി’ന്റെ പരാജയത്തിന് പിന്നാലെ ‘വികസന സദസ്’; ചെലവ് തദ്ദേശ സ്ഥാപനങ്ങളുടെ തലയിൽ കെട്ടിവച്ച് സർക്കാർ, പണം പിരിക്കാൻ നിർദേശം

തിരുവനന്തപുരം: ലോക്‌സഭ തിരഞ്ഞെടുപ്പിൽ പരീക്ഷിച്ച് പരാജയപ്പെട്ട നവകേരള സദസിന് പിന്നാലെ തദ്ദേശ തിരഞ്ഞെടുപ്പ് മുന്നിൽ കണ്ട് ‘വികസന സദസ്’ എന്ന പുതിയ പരിപാടിയുമായി സംസ്ഥാന സർക്കാർ. സെപ്റ്റംബർ 20 മുതൽ ഒക്ടോബർ 20 വരെയാണ് വികസന സദസ് സംഘടിപ്പിക്കുന്നത്. ഇതിന്റെ ചെലവ് സർക്കാർ നേരിട്ട് വഹിക്കില്ലെന്നും, അതത് തദ്ദേശ സ്ഥാപനങ്ങൾ സ്വന്തം ഫണ്ടിൽ നിന്ന് പണം കണ്ടെത്തണമെന്നും സർക്കാർ പുറത്തിറക്കിയ ഉത്തരവിൽ പറയുന്നു.

​സെപ്റ്റംബർ 20-ന് ഒരു തദ്ദേശ സ്ഥാപനത്തിൽ മുഖ്യമന്ത്രി വികസന സദസ് ഉദ്ഘാടനം ചെയ്യും. തുടർന്ന് നടക്കുന്ന 20 മിനിറ്റ് വീഡിയോ പ്രസന്റേഷനിൽ സംസ്ഥാന സർക്കാരിന്റെ വികസന നേട്ടങ്ങൾ അവതരിപ്പിക്കും. എന്നാൽ, കടുത്ത സാമ്പത്തിക പ്രതിസന്ധിയിൽ ഖജനാവ് കാലിയായ സാഹചര്യത്തിലാണ് പരിപാടിയുടെ മുഴുവൻ സാമ്പത്തിക ബാധ്യതയും തദ്ദേശ സ്ഥാപനങ്ങളുടെ തലയിൽ വെച്ചുകെട്ടുന്നത്.

​സർക്കാർ നിർദേശമനുസരിച്ച് ഗ്രാമപഞ്ചായത്തുകൾ 2 ലക്ഷം രൂപയും, മുനിസിപ്പാലിറ്റികൾ 4 ലക്ഷം രൂപയും, കോർപ്പറേഷനുകൾ 6 ലക്ഷം രൂപയും പരിപാടിക്കായി മുടക്കണം. തദ്ദേശ സ്ഥാപനങ്ങളുടെ പ്ലാൻ ഫണ്ടോ അല്ലെങ്കിൽ തനത് ഫണ്ടോ ഇതിനായി ഉപയോഗിക്കാം. ഈ തുക തികയാതെ വന്നാൽ ആവശ്യമെങ്കിൽ സ്പോൺസർഷിപ്പ് വഴി പണം കണ്ടെത്താമെന്നും ഉത്തരവിൽ വ്യക്തമാക്കുന്നു.

​നേരത്തെ ‘കേരളീയം’ പരിപാടിക്കും ‘നവകേരള സദസി’നും ഫണ്ട് കണ്ടെത്തിയത് സ്പോൺസർഷിപ്പ് വഴിയായിരുന്നു. ഇത് വ്യാപകമായ പണപ്പിരിവാണെന്ന ആരോപണത്തിന് വഴിവെച്ചിരുന്നു. എന്നാൽ, ഈ പരിപാടികൾക്ക് ആരാണ് സ്പോൺസർമാരായതെന്ന് സർക്കാർ നാളിതുവരെയായിട്ടും വെളിപ്പെടുത്തിയിട്ടില്ല. ഇതേ മാതൃകയിൽ തദ്ദേശ സ്ഥാപനങ്ങളെ ഉപയോഗിച്ച് വലിയ തോതിലുള്ള ഫണ്ട് പിരിവിന് സർക്കാർ കളമൊരുക്കുകയാണെന്ന് പ്രതിപക്ഷം ആരോപിക്കുന്നു. ലോക്‌സഭ തിരഞ്ഞെടുപ്പിൽ നവകേരള സദസ് ജനങ്ങൾക്കിടയിൽ വലിയ ചലനമുണ്ടാക്കാത്ത സാഹചര്യത്തിൽ, വരാനിരിക്കുന്ന തദ്ദേശ തിരഞ്ഞെടുപ്പിൽ ഇത് തിരിച്ചടിയാകുമോ എന്ന ആശങ്കയും ഭരണപക്ഷത്തിനുണ്ട്.