തിരുവനന്തപുരം: തദ്ദേശ സ്വയംഭരണ തിരഞ്ഞെടുപ്പിൽ ശക്തമായ മുന്നേറ്റം ലക്ഷ്യമിട്ട് കേരള പ്രദേശ് കോൺഗ്രസ് കമ്മിറ്റി (കെപിസിസി) യുടെ പുതിയ ഫണ്ട് ശേഖരണ പദ്ധതി. 2024 ജൂലൈയിൽ വയനാട്ടിൽ നടന്ന ക്യാമ്പിലാണ് ഈ പുതിയ തന്ത്രത്തിന് രൂപം നൽകിയത്. നാളെ മുതൽ അഞ്ച് ദിവസത്തേക്ക് നേതാക്കൾ വീടുകൾ കയറി ഇറങ്ങി പാർട്ടിക്ക് വേണ്ടി ഫണ്ട് ശേഖരിക്കും.
പ്രാദേശിക തലത്തിൽ പാർട്ടിയുടെ സാമ്പത്തിക അടിത്തറ ശക്തമാക്കുക എന്നതാണ് ഈ പദ്ധതിയുടെ പ്രധാന ലക്ഷ്യം. ഫണ്ട് ലഭിക്കാത്തതിനാൽ പോസ്റ്ററുകൾ അച്ചടിക്കുന്നതുൾപ്പെടെയുള്ള പ്രചാരണ പ്രവർത്തനങ്ങൾ പലപ്പോഴും തടസ്സപ്പെടാറുണ്ടെന്ന് പാർട്ടി വിലയിരുത്തുന്നു. മുൻകാലങ്ങളിൽ നിന്ന് വ്യത്യസ്തമായി, ഇത്തവണ ശേഖരിക്കുന്ന പണം കെപിസിസിക്കോ ഡിസിസികൾക്കോ ലഭിക്കില്ല എന്നതാണ് ഏറ്റവും ശ്രദ്ധേയമായ മാറ്റം. പകരം, ഈ ഫണ്ട് നേരിട്ട് വാർഡ്, മണ്ഡലം കമ്മിറ്റികൾക്ക് കൈമാറും. ഓരോ വാർഡിലും വാർഡ് പ്രസിഡന്റ്, മണ്ഡലം പ്രസിഡന്റ്, ഒരംഗം എന്നിവരുടെ പേരിൽ സംയുക്ത അക്കൗണ്ടുകൾ തുറന്ന് പണം കൈകാര്യം ചെയ്യാനാണ് തീരുമാനം.
അതേസമയം, കോൺഗ്രസ് നേതാവായ രാഹുൽ മാങ്കൂട്ടത്തിനെതിരെയുള്ള ലൈംഗിക ആരോപണങ്ങൾ സംബന്ധിച്ച് പൊതുജനങ്ങളിൽ നിന്ന് ചോദ്യങ്ങൾ നേരിടേണ്ടി വരുമെന്ന് നേതാക്കൾക്ക് ആശങ്കയുണ്ട്. എന്നാൽ ഈ വിഷയത്തിൽ ജനങ്ങൾക്ക് നൽകാനുള്ള മറുപടി പാർട്ടി തയ്യാറാക്കിയിട്ടുണ്ട്. യൂത്ത് കോൺഗ്രസ് പ്രസിഡന്റ് സ്ഥാനത്ത് നിന്ന് അദ്ദേഹത്തെ നീക്കിയതും സസ്പെൻഡ് ചെയ്തതുമായ കാര്യങ്ങൾ ജനങ്ങളോട് വിശദീകരിക്കാൻ നേതാക്കൾക്ക് നിർദ്ദേശം നൽകിയിട്ടുണ്ട്.
കേന്ദ്ര-സംസ്ഥാന സർക്കാരുകൾക്കെതിരെയുള്ള 47 വിഷയങ്ങൾ അക്കമിട്ട് നിരത്തുന്ന “ജനങ്ങളുടെ കുറ്റപത്രം” എന്ന ലഘുലേഖയും ഈ വീടുകൾ തോറുമുള്ള സന്ദർശനത്തിൽ വിതരണം ചെയ്യും. മുൻപ് നടന്ന ഉപതിരഞ്ഞെടുപ്പുകളിൽ വിജയം കൈവരിച്ച പ്രചാരണ തന്ത്രങ്ങളുടെ മാതൃകയാണ് തദ്ദേശ തെരഞ്ഞെടുപ്പിലും സ്വീകരിക്കുക.
