ബിക്കാനീർ (രാജസ്ഥാൻ): ഇന്ത്യൻ വ്യോമാതിർത്തിയിൽ ആറ് പതിറ്റാണ്ടിലേറെക്കാലം കാവൽക്കാരനായിരുന്ന മിഗ്-21 യുദ്ധവിമാനങ്ങൾ ചരിത്രത്തിലേക്ക് വിടവാങ്ങുന്നു. 62 വർഷത്തെ സ്തുത്യർഹമായ സേവനത്തിന് ശേഷം, ഇന്ത്യൻ വ്യോമസേനയുടെ ആദ്യത്തെ സൂപ്പർസോണിക് പോർവിമാനമായ മിഗ്-21 വിമാനങ്ങളെ ഔദ്യോഗികമായി ഡീകമ്മീഷൻ ചെയ്യുന്നു. ഇതിന്റെ ഭാഗമായുള്ള വിടവാങ്ങൽ ചടങ്ങ് സെപ്റ്റംബർ 26-ന് രാജസ്ഥാനിലെ ബിക്കാനീറിലുള്ള നാൽ വ്യോമസേനാ താവളത്തിൽ നടക്കും.
പ്രതിരോധ മന്ത്രി രാജ്‌നാഥ് സിംഗ് ചടങ്ങിൽ മുഖ്യാതിഥിയാകും. രാജ്യത്തെ നാല് സ്ക്വാഡ്രണുകളിലായി അവശേഷിക്കുന്ന 36 മിഗ്-21 വിമാനങ്ങൾ അണിനിരക്കുന്ന ഗംഭീരമായ ഫ്ലൈപാസ്റ്റോടെയായിരിക്കും ഇന്ത്യൻ വ്യോമസേന തങ്ങളുടെ ഈ ഐതിഹാസിക പോരാളിക്ക് വിട നൽകുക.
യുദ്ധമുഖത്തെ വീരനായകൻ
1960-കളിൽ ഇന്ത്യൻ വ്യോമസേനയുടെ ഭാഗമായ മിഗ്-21, നിരവധി യുദ്ധമുഖങ്ങളിൽ നിർണായക പങ്കുവഹിച്ചിട്ടുണ്ട്. 1965, 1971 വർഷങ്ങളിലെ ഇന്ത്യ-പാക് യുദ്ധങ്ങളിൽ പാകിസ്ഥാന്റെ അമേരിക്കൻ നിർമ്മിത സേബർ ജെറ്റുകളെ തകർത്തുകൊണ്ട് മിഗ്-21 ആകാശത്ത് ആധിപത്യം സ്ഥാപിച്ചു. 1999-ലെ കാർഗിൽ യുദ്ധത്തിലും, 2019-ൽ ബാലാക്കോട്ട് വ്യോമാക്രമണത്തിന് പിന്നാലെ പാകിസ്ഥാന്റെ എഫ്-16 വിമാനം വെടിവെച്ചിട്ടപ്പോഴും മിഗ്-21 അതിന്റെ പോരാട്ടവീര്യം തെളിയിച്ചു.
അവസാനമായി മിഗ്-21 പറത്തിയ സ്ക്വാഡ്രൺ ലീഡർ പി.വി. ശശി, “അതിവേഗതയും മികച്ച ആയുധശേഷിയുമായിരുന്നു മിഗിന്റെ കരുത്ത്” എന്ന് ഓർമ്മിക്കുന്നു. കാലപ്പഴക്കവും നിരവധി അപകടങ്ങളും കാരണം ‘പറക്കും ശവപ്പെട്ടി’ എന്ന് വിമർശകർ വിളിച്ചിരുന്നെങ്കിലും, ഇന്ത്യൻ വ്യോമസേനയുടെ ചരിത്രത്തിലെ ഒഴിവാക്കാനാവാത്ത അധ്യായമാണ് മിഗ്-21. മിഗ് വിരമിക്കുന്നതോടെ, സുഖോയ്-30 എംകെഐ, റഫാൽ, തദ്ദേശീയമായി നിർമ്മിച്ച തേജസ് എന്നീ വിമാനങ്ങളായിരിക്കും വ്യോമസേനയുടെ പുതിയ കുന്തമുനകൾ.
