മെഡിറ്ററേനിയനിൽ കരുത്ത് കാട്ടി ഇന്ത്യ; ഗ്രീസിലെ നാറ്റോ താവളത്തിൽ സന്ദർശനം പൂർത്തിയാക്കി ഐഎൻഎസ് തമൽ
ന്യൂഡൽഹി: ഇന്ത്യയും ഗ്രീസും തമ്മിലുള്ള പ്രതിരോധ സഹകരണം ശക്തമാക്കുന്നതിന്റെ ഭാഗമായി, ഇന്ത്യൻ നാവികസേനയുടെ ഏറ്റവും പുതിയ സ്റ്റെൽത്ത് ഫ്രിഗേറ്റായ ഐഎൻഎസ് തമൽ ഗ്രീസിലെ സൗദ ബേയിൽ സന്ദർശനം പൂർത്തിയാക്കി. ഓഗസ്റ്റ് 19 മുതൽ 22 വരെ നീണ്ടുനിന്ന സന്ദർശന വേളയിൽ, കപ്പലിലെ ഉദ്യോഗസ്ഥർ ഗ്രീക്ക് (ഹെല്ലനിക്) നാവികസേനയുമായും നാറ്റോ ഉദ്യോഗസ്ഥരുമായും ഉന്നതതല ചർച്ചകൾ നടത്തി.
നാവിക സേനയുടെ തന്ത്രപ്രധാനമായ സൗദ ബേ താവളത്തിൽ വെച്ച് കപ്പലിന്റെ കമാൻഡിംഗ് ഓഫീസർ, ബേസ് കമാൻഡർ കൊമോഡോർ ഡയോനിസിയോസ് മന്റഡാകിസ്, നാറ്റോയുടെ മാരിടൈം ഇന്റർഡിക്ഷൻ ഓപ്പറേഷണൽ ട്രെയ്നിംഗ് സെന്റർ (NMIOTC) മേധാവി ക്യാപ്റ്റൻ കൗപ്ലാക്കിസ് ഇലിയാസ്, യുഎസ് നേവിയുടെ നേവൽ സപ്പോർട്ട് ആക്ടിവിറ്റി കമാൻഡിംഗ് ഓഫീസർ ക്യാപ്റ്റൻ സ്റ്റീഫൻ സ്റ്റീസി എന്നിവരുമായി കൂടിക്കാഴ്ച നടത്തി. സമുദ്ര സുരക്ഷയും പ്രവർത്തനപരമായ സഹകരണവുമായിരുന്നു ചർച്ചകളിലെ പ്രധാന വിഷയങ്ങൾ. സൗദ ബേയിൽ നങ്കൂരമിട്ടിരുന്ന ഇറ്റാലിയൻ നാവികസേനയുടെ ലാൻഡിംഗ് ഹെലികോപ്റ്റർ ഡോക്ക് ആയ ഐടിഎസ് ട്രിസ്റ്റെ എന്ന കപ്പലിൽ ഐഎൻഎസ് തമലിലെ ജീവനക്കാർക്ക് സന്ദർശനത്തിനും അവസരമൊരുക്കി.
ഗ്രീസിലെ ഇന്ത്യൻ അംബാസഡർ രുദ്രേന്ദ്ര ടണ്ടൻ ഓഗസ്റ്റ് 20-ന് കപ്പൽ സന്ദർശിക്കുകയും ജീവനക്കാരുമായി സംവദിക്കുകയും ചെയ്തു. സന്ദർശനത്തിന്റെ ഭാഗമായി, ഇന്ത്യൻ നാവികർ സൗദ നേവൽ ബേസ്, നാറ്റോയുടെ പരിശീലന കേന്ദ്രം, പ്രാദേശിക മാരിടൈം മ്യൂസിയം എന്നിവിടങ്ങളിൽ സന്ദർശനം നടത്തി. ക്രീറ്റിലെ രണ്ടാം ലോക മഹായുദ്ധ സ്മൃതി കുടീരത്തിൽ അവർ ആദരാഞ്ജലികൾ അർപ്പിക്കുകയും ചെയ്തു.
ഗ്രീക്ക് നാവികസേനയുമായി സംയുക്ത അഭ്യാസം
ഓഗസ്റ്റ് 22-ന് സൗദ ബേയിൽ നിന്ന് യാത്ര തിരിച്ച ഐഎൻഎസ് തമൽ, ഗ്രീക്ക് നാവികസേനയുടെ റൂസൻ ക്ലാസ് പട്രോളിംഗ് ബോട്ടായ എച്ച്എസ് റിറ്റ്സോസുമായി ചേർന്ന് സംയുക്ത നാവിക അഭ്യാസത്തിലും (പാസേജ് എക്സർസൈസ്) പങ്കെടുത്തു. ഇരു നാവികസേനകളും തമ്മിലുള്ള പ്രവർത്തനങ്ങൾ ഏകോപിപ്പിക്കുന്നതിനും പരസ്പരം മനസ്സിലാക്കുന്നതിനും വേണ്ടിയായിരുന്നു ഈ അഭ്യാസം.
ഇന്ത്യ-ഗ്രീസ് ബന്ധത്തിനും പ്രതിരോധ സഹകരണത്തിനും ഇന്ത്യ നൽകുന്ന പ്രാധാന്യത്തിന്റെ തെളിവാണ് ഐഎൻഎസ് തമലിന്റെ ഈ സന്ദർശനം. ഇന്ത്യയിലെ താവളത്തിലേക്ക് മടങ്ങുന്ന കപ്പൽ, ഏഷ്യയിലെ മറ്റ് സൗഹൃദ രാജ്യങ്ങളിലെ തുറമുഖങ്ങളിലും സന്ദർശനം നടത്തും.
