ഫ്ലാറ്റ് കൈമാറാൻ 5 വർഷം വൈകി, അധിക പണവും വാങ്ങി; DLF ലക്ഷങ്ങൾ നഷ്ടപരിഹാരം നൽകണമെന്ന് ഉപഭോക്തൃ കമ്മീഷൻ
കൊച്ചി: ഫ്ലാറ്റ് നിർമ്മിച്ച് നൽകാമെന്ന കരാറിൽ നിന്ന് വ്യതിചലിച്ച്, കൈമാറാൻ നാല് വർഷത്തിലേറെ വൈകുകയും ഉപഭോക്താക്കളിൽ നിന്ന് ലക്ഷങ്ങൾ അധികമായി ഈടാക്കുകയും ചെയ്തെന്ന പരാതിയിൽ പ്രമുഖ റിയൽ എസ്റ്റേറ്റ് നിർമ്മാതാക്കളായ ഡിഎൽഎഫിന് (DLF) കനത്ത തിരിച്ചടി. പരാതിക്കാർക്ക് ലക്ഷക്കണക്കിന് രൂപ നഷ്ടപരിഹാരം നൽകാൻ എറണാകുളം ജില്ലാ ഉപഭോക്തൃ തർക്ക പരിഹാര കമ്മീഷൻ ഉത്തരവിട്ടു.
കാക്കനാട് ഡിഎൽഎഫ് ന്യൂ ടൗൺ ഹൈറ്റ്സ് പ്രോജക്റ്റുമായി ബന്ധപ്പെട്ട് സീനാ സൂസൻ കുരുവിളയും മകൻ മിഥുൻ കുരുവിളയും നൽകിയ പരാതിയിലാണ് കമ്മീഷൻ അധ്യക്ഷൻ ഡി.ബി. ബിനു, അംഗങ്ങളായ വി. രാമചന്ദ്രൻ, ടി.എൻ. ശ്രീവിദ്യ എന്നിവരടങ്ങിയ ബെഞ്ചിന്റെ സുപ്രധാന വിധി.
2010 മെയ് മാസത്തിലാണ് പരാതിക്കാർ ₹34,29,880 രൂപയ്ക്ക് ഡിഎൽഎഫിന്റെ കാക്കനാട്ടെ പ്രോജക്റ്റിൽ അപ്പാർട്ട്മെന്റ് ബുക്ക് ചെയ്തത്. കരാർ പ്രകാരം 2013 ജനുവരി 19-നകം ഫ്ലാറ്റ് കൈമാറേണ്ടിയിരുന്നു. എന്നാൽ, 95% തുകയും മുൻകൂറായി അടച്ചിട്ടും, ഏകദേശം അഞ്ച് വർഷത്തോളം വൈകി 2017 സെപ്റ്റംബറിലാണ് നിർമ്മാതാക്കൾ ഫ്ലാറ്റ് കൈമാറിയത്.
ഇതിനിടയിൽ, പല കാരണങ്ങൾ പറഞ്ഞ് ₹10,22,063 രൂപ അധികമായി ആവശ്യപ്പെട്ടു. നിർമ്മാണ കാലയളവിൽ ഫ്ലാറ്റിന്റെ വിസ്തീർണ്ണം വർധിച്ചു എന്ന പേരിൽ മാത്രം ₹2,74,480 രൂപ അധികമായി ഈടാക്കി. എന്നാൽ, കൈമാറിക്കിട്ടിയ ഫ്ലാറ്റിൽ മതിയായ ജലവിതരണ സൗകര്യമോ, ശരിയായ ഇലക്ട്രിക്കൽ ജോലികളോ ചെയ്തിരുന്നില്ലെന്നും നിലവാരം തീരെ കുറവായിരുന്നുവെന്നും പരാതിയിൽ പറയുന്നു.
കമ്മീഷന്റെ രൂക്ഷവിമർശനം
കരാർ പ്രകാരമുള്ള സമയത്ത് ഫ്ലാറ്റ് കൈമാറുന്നതിൽ പരാജയപ്പെടുന്നത് സേവനത്തിലെ ഗുരുതരമായ വീഴ്ചയാണെന്ന് സുപ്രീം കോടതി വിധികൾ ഉദ്ധരിച്ചുകൊണ്ട് കമ്മീഷൻ നിരീക്ഷിച്ചു. ഫ്ലാറ്റ് ലഭിക്കാൻ ഉപഭോക്താവിനെ അനന്തമായി കാത്തിരിക്കാൻ നിർബന്ധിക്കാനാവില്ല. ഡിഎൽഎഫിന്റെ ഭാഗത്തുനിന്ന് സേവനത്തിൽ ഗുരുതരമായ വീഴ്ചയും അനുചിതമായ വ്യാപാര രീതിയും ഉണ്ടായതായി കമ്മീഷൻ കണ്ടെത്തി.
നൽകേണ്ട നഷ്ടപരിഹാരം
- പലിശ: ഫ്ലാറ്റ് കൈമാറുന്നതിലെ കാലതാമസത്തിന്, വാഗ്ദാനം ചെയ്ത തീയതി മുതൽ യഥാർത്ഥത്തിൽ കൈമാറിയ തീയതി വരെയുള്ള കാലയളവിന്, ഫ്ലാറ്റിന്റെ വിലയായ ₹34,29,880 രൂപയുടെ 12% വാർഷിക പലിശ നൽകണം.
- വാടക: കാലതാമസം കാരണം പരാതിക്കാർക്ക് വാടകയിനത്തിൽ ചിലവായ ₹5,76,000 രൂപ തിരികെ നൽകണം.
- നഷ്ടപരിഹാരം: പരാതിക്കാർക്കുണ്ടായ മാനസിക വിഷമത്തിനും കോടതിച്ചെലവിനുമായി ₹1,10,000 രൂപ നൽകണം.
ഈ തുകകളെല്ലാം 45 ദിവസത്തിനകം നൽകണമെന്നും കമ്മീഷൻ ഉത്തരവിട്ടു. പരാതിക്കാർക്ക് വേണ്ടി അഡ്വക്കേറ്റ് ബിനു മാത്യു ഹാജരായി.
