തിരുവനന്തപുരം: സിപിഎമ്മിലെ രണ്ട് പാർട്ടി പ്രവർത്തകർ തമ്മിലുള്ള വ്യക്തിപരമായ കുടിപ്പക, പാർട്ടിയെയും സർക്കാരിനെയും ഒരുപോലെ പ്രതിരോധത്തിലാക്കുന്ന വലിയ രാഷ്ട്രീയ പ്രതിസന്ധിയിലേക്ക് നീങ്ങുന്നു. പാർട്ടിയിലെ ‘അവതാരങ്ങൾ’ എന്ന് വിശേഷിപ്പിക്കപ്പെടുന്ന രാജേഷ് കൃഷ്ണയും മുഹമ്മദ് ഷർഷാദും തമ്മിലുള്ള പോരാണ് ഇപ്പോൾ സിപിഎമ്മിന്റെ ഉറക്കം കെടുത്തുന്നത്. സർക്കാരിനെയും പാർട്ടിയെയും സംബന്ധിക്കുന്ന അതീവ ഗുരുതരമായ സാമ്പത്തിക ആരോപണങ്ങൾ അടങ്ങിയ ഒരു പരാതി കോടതി രേഖകളുടെ ഭാഗമായതോടെ, വ്യാജരേഖയെന്ന് പറഞ്ഞ് കൈകഴുകാനാവാത്ത സ്ഥിതിയിലാണ് പാർട്ടി നേതൃത്വം.
വിദേശ പ്രതിനിധിയായി രാജേഷ് കൃഷ്ണയെ തിരഞ്ഞെടുത്തതിനെതിരെ മുഹമ്മദ് ഷർഷാദ് പൊളിറ്റ്ബ്യൂറോയ്ക്ക് നൽകിയ പരാതിയാണ് വിവാദങ്ങളുടെയെല്ലാം കേന്ദ്രബിന്ദു. എന്നാൽ, ഈ പരാതി ഇപ്പോൾ പുറത്തുചാടിയത് രാജേഷ് കൃഷ്ണ തന്നെ നൽകിയ ഒരു മാനനഷ്ടക്കേസിലൂടെയാണെന്നത് സിപിഎമ്മിനെ ഞെട്ടിച്ചിരിക്കുകയാണ്. ഷർഷാദിന്റെ പരാതി, രാജേഷ് കൃഷ്ണ തന്നെ കോടതിയിൽ സമർപ്പിച്ചതോടെ അതിലെ ആരോപണങ്ങൾക്ക് പാർട്ടിക്ക് മറുപടി പറയേണ്ടിവരും. ഈ പരാതിയിലെ ആരോപണങ്ങൾ നേരത്തെ ചർച്ച ചെയ്താണ് മധുര പാർട്ടി കോൺഗ്രസിൽ നിന്ന് രാജേഷിനെ മാറ്റിനിർത്തിയത്. അതായത്, കത്തിലെ ആരോപണങ്ങളിൽ കഴമ്പുണ്ടെന്ന് പാർട്ടിക്ക് മുൻപേ ബോധ്യമുണ്ടായിരുന്നു എന്ന് വ്യക്തം.
സംസ്ഥാന സെക്രട്ടറി എം.വി. ഗോവിന്ദനാണ് ഈ വിവാദത്തിൽ ഏറ്റവും കൂടുതൽ പ്രതിരോധത്തിലായിരിക്കുന്നത്. പൊളിറ്റ്ബ്യൂറോയ്ക്ക് നൽകിയ കത്ത് ചോർത്തിയത് എം.വി. ഗോവിന്ദന്റെ മകനാണെന്ന് ഷർഷാദ് പരസ്യമായി ആരോപിക്കുകയും പുതിയ ജനറൽ സെക്രട്ടറി എം.എ. ബേബിക്ക് രേഖാമൂലം പരാതി നൽകുകയും ചെയ്തിട്ടുണ്ട്. പാർട്ടി സംസ്ഥാന സെക്രട്ടറിയായി തിരഞ്ഞെടുക്കപ്പെട്ട ശേഷം ഗോവിന്ദൻ നേരിടുന്ന ഏറ്റവും വലിയ വ്യക്തിപരമായ പ്രതിസന്ധിയാണിത്. രാജേഷ് കൃഷ്ണയ്ക്ക് ഗോവിന്ദനുമായും മകനുമായുമുള്ള അടുപ്പം പരസ്യമായ രഹസ്യമായതിനാൽ, ഈ വിഷയത്തിൽ ഗോവിന്ദന് പാർട്ടിക്കകത്തും പുറത്തും വ്യക്തമായ നിലപാട് എടുക്കേണ്ടി വരും.
ഷർഷാദിന് പിന്നിൽ ആരൊക്കെയുണ്ടെന്ന ചോദ്യവും പാർട്ടിയിൽ സജീവമാണ്. ഇ.പി. ജയരാജന്റെ പങ്ക് പലരും സംശയിക്കുന്നുണ്ടെങ്കിലും, പിബിക്ക് നൽകിയ കത്ത് ഷർഷാദ് ആർക്കും ചോർത്തി നൽകിയിട്ടില്ലെന്നാണ് വിവരം. കോടതി നടപടികളുടെ ഭാഗമായി രേഖകൾ ലഭിച്ചപ്പോഴാണ് കത്തിലെ വിവരങ്ങൾ പുറത്തുവന്നത്. കണ്ണൂരിലെ പാർട്ടിയിലെ വിഭാഗീയ സമവാക്യങ്ങൾ ഒട്ടും ഭദ്രമല്ലാത്ത സാഹചര്യത്തിൽ, കൂടുതൽ പരാതികൾ കേരളത്തിൽ നിന്ന് പിബിക്ക് മുന്നിലെത്തിയിട്ടുണ്ടെന്നും സൂചനയുണ്ട്.
‘അവതാരങ്ങൾക്കെതിരെ’ പലതവണ മുന്നറിയിപ്പ് നൽകിയിട്ടുള്ള മുഖ്യമന്ത്രി പിണറായി വിജയൻ ഈ വിഷയത്തിൽ എന്ത് നിലപാട് എടുക്കുമെന്നത് നിർണായകമാണ്. അദ്ദേഹത്തിന്റെ തീരുമാനം എം.വി. ഗോവിന്ദന്റെയും പാർട്ടിയിലെ അദ്ദേഹത്തിന്റെ എതിരാളികളുടെയും രാഷ്ട്രീയ ഭാവി നിർണ്ണയിക്കും. പൊളിറ്റ്ബ്യൂറോ യോഗം ഡൽഹിയിൽ ചേരാനിരിക്കെയാണ് ഈ സംഭവവികാസങ്ങൾ എന്നതും പാർട്ടിയുടെ ആശങ്ക വർധിപ്പിക്കുന്നു.
