പ്രളയ് മിസൈലിന് ഇനി ആകാശച്ചിറകുകൾ; എയർ-ലോഞ്ച് പതിപ്പ് വികസിപ്പിക്കാൻ DRDO
ന്യൂഡൽഹി: ഇന്ത്യൻ പ്രതിരോധ ഗവേഷണ രംഗത്ത് നിർണ്ണായക ചുവടുവെപ്പുമായി ഡിഫൻസ് റിസർച്ച് ആൻഡ് ഡെവലപ്‌മെന്റ് ഓർഗനൈസേഷൻ (DRDO). ഇന്ത്യയുടെ തദ്ദേശീയ ടാക്റ്റിക്കൽ ബാലിസ്റ്റിക് മിസൈലായ ‘പ്രളയ്’ന്റെ എയർ-ലോഞ്ച് (വിമാനത്തിൽ നിന്ന് വിക്ഷേപിക്കാവുന്ന) പതിപ്പ് വികസിപ്പിക്കുന്നതിനുള്ള പ്രവർത്തനങ്ങൾ ആരംഭിച്ചു. പദ്ധതി വിജയിച്ചാൽ, ഇന്ത്യൻ വ്യോമസേനയുടെ പ്രഹരശേഷിയിൽ വൻ കുതിച്ചുചാട്ടമുണ്ടാകും.
കരയിൽ നിന്ന് വിക്ഷേപിക്കുന്ന പ്രളയ് മിസൈലുകൾ ഇതിനകം തന്നെ ഇന്ത്യൻ സൈന്യത്തിന്റെ ഭാഗമാണ്. ഇതിന്റെ വ്യോമ പതിപ്പ് കൂടി വരുന്നതോടെ ശത്രുലക്ഷ്യങ്ങളെ കൂടുതൽ കൃത്യതയോടെയും വേഗത്തിലും ആകാശത്തുനിന്ന് നേരിടാൻ ഇന്ത്യക്ക് സാധിക്കും.
പദ്ധതിക്ക് മുന്നിലുള്ള ഏറ്റവും വലിയ വെല്ലുവിളി മിസൈലിന്റെ ഭാരമാണ്. നിലവിൽ പ്രളയ് മിസൈലിന് 5 ടണ്ണിലധികം ഭാരമുണ്ട്. എന്നാൽ, ഇന്ത്യൻ വ്യോമസേനയുടെ പ്രധാന യുദ്ധവിമാനമായ സുഖോയ്-30 എംകെഐക്ക് വഹിക്കാൻ കഴിയുന്ന പരമാവധി ഭാരം ഏകദേശം 2.5 ടൺ മാത്രമാണ്. അതിനാൽ, മിസൈലിന്റെ ഭാരം പകുതിയോളം കുറയ്ക്കുക എന്ന ശ്രമകരമായ ദൗത്യമാണ് ഡിആർഡിഒയ്ക്ക് മുന്നിലുള്ളത്. ബ്രഹ്മോസ് മിസൈലിനേക്കാൾ നീളം കുറവാണ് പ്രളയ് മിസൈലിന് എന്നത് രൂപകൽപ്പനയിൽ സഹായകമായേക്കും.
വിജയകരമായി വികസിപ്പിച്ചാൽ, പുതിയ മിസൈൽ ഖര ഇന്ധനം ഉപയോഗിച്ചായിരിക്കും പ്രവർത്തിക്കുക. ഹൈപ്പർസോണിക് വേഗതയിൽ സഞ്ചരിക്കുന്ന മിസൈലിന്, ലക്ഷ്യസ്ഥാനത്ത് എത്തുന്നതിന് തൊട്ടുമുൻപ് ഗതിമാറാൻ (terminal maneuvers) സാധിക്കും. ഇത് ശത്രുക്കളുടെ എയർ ഡിഫൻസ് സിസ്റ്റങ്ങളെ കബളിപ്പിച്ച് ലക്ഷ്യം ഭേദിക്കാൻ മിസൈലിനെ സഹായിക്കും.
തദ്ദേശീയ പ്രതിരോധ സാങ്കേതികവിദ്യയിൽ ഇന്ത്യ കൈവരിക്കുന്ന മുന്നേറ്റത്തിന്റെ ഏറ്റവും പുതിയ ഉദാഹരണമാണ് ഈ പദ്ധതി. ഭാരം കുറയ്ക്കുന്നതിലുള്ള സാങ്കേതിക വെല്ലുവിളികൾ മറികടക്കുന്നതോടെ, പ്രളയ് മിസൈലിന്റെ വ്യോമ പതിപ്പ് ഇന്ത്യൻ പ്രതിരോധ സേനയ്ക്ക് വലിയ മുതൽക്കൂട്ടാകും.
