വോട്ടർ പട്ടികയിൽ നിന്ന് പേര് നീക്കിയവരുടെ പട്ടിക കാരണം സഹിതം ഉടൻ പ്രസിദ്ധീകരിക്കണം; തെരഞ്ഞെടുപ്പ് കമ്മീഷന് സുപ്രീം കോടതിയുടെ നിർദേശം

ന്യൂഡൽഹി: ബീഹാറിലെ വോട്ടർ പട്ടിക പരിഷ്കരണത്തിൽ സുതാര്യത ഉറപ്പാക്കാൻ ലക്ഷ്യമിട്ട് നിർണായകമായ ഇടക്കാല ഉത്തരവുമായി സുപ്രീം കോടതി. വോട്ടർ പട്ടികയിൽ നിന്ന് ഒഴിവാക്കപ്പെട്ടവരുടെ പേരുകൾ, അതിനുള്ള കാരണം സഹിതം മൂന്ന് ദിവസത്തിനകം ഔദ്യോഗിക വെബ്സൈറ്റിൽ പ്രസിദ്ധീകരിക്കണമെന്ന് തെരഞ്ഞെടുപ്പ് കമ്മീഷന് കോടതി കർശന നിർദേശം നൽകി. ജസ്റ്റിസുമാരായ സൂര്യകാന്ത്, ജയ്മല്യ ബാഗ്ചി എന്നിവരടങ്ങിയ ബെഞ്ചാണ് സുപ്രധാനമായ ഈ ഉത്തരവ് പുറപ്പെടുവിച്ചത്.

തിരഞ്ഞെടുപ്പ് അടുത്തിരിക്കുന്ന ബീഹാറിൽ, വോട്ടർ പട്ടികയുടെ തീവ്ര പരിഷ്കരണം ചോദ്യം ചെയ്ത് വിവിധ പ്രതിപക്ഷ നേതാക്കളും, അസോസിയേഷൻ ഫോർ ഡെമോക്രാറ്റിക് റിഫോംസ് (എഡിആർ), പീപ്പിൾസ് യൂണിയൻ ഫോർ സിവിൽ ലിബർട്ടീസ് (പിയുസിഎൽ) തുടങ്ങിയ സംഘടനകളും സമർപ്പിച്ച ഹർജികൾ പരിഗണിക്കുകയായിരുന്നു കോടതി.

കോടതിയുടെ പ്രധാന നിർദ്ദേശങ്ങൾ:

• വോട്ടർ പട്ടികയിൽ നിന്ന് നീക്കം ചെയ്തവരുടെ പൂർണ്ണമായ ലിസ്റ്റ് മൂന്ന് ദിവസത്തിനകം വെബ്സൈറ്റിൽ പ്രസിദ്ധീകരിക്കണം.
• ഓരോ വ്യക്തിയെയും ഒഴിവാക്കാനുള്ള കാരണം വ്യക്തമാക്കണം.
• വോട്ടർ ഐഡി കാർഡ് നമ്പർ ഉപയോഗിച്ച് ഈ ലിസ്റ്റിൽ തിരയാനുള്ള സൗകര്യം ഒരുക്കണം.
• ലിസ്റ്റ് പ്രസിദ്ധീകരിച്ച വിവരം ബീഹാറിൽ ഏറ്റവും പ്രചാരമുള്ള പത്രങ്ങളിലും, ദൂരദർശനിലും, റേഡിയോയിലും നൽകി വ്യാപകമായ പ്രചാരണം ഉറപ്പാക്കണം.
• പരാതിയുള്ളവർക്ക് ആധാർ കാർഡ് സഹിതം ആക്ഷേപം ഉന്നയിക്കാമെന്ന് പൊതു അറിയിപ്പിൽ വ്യക്തമാക്കണം.

കമ്മീഷനോട് കടുത്ത ചോദ്യങ്ങൾ

വോട്ടർ പട്ടികയിൽ നിന്ന് ഒഴിവാക്കിയ 65 ലക്ഷം പേരിൽ 22 ലക്ഷം പേർ മരിച്ചവരാണെന്ന് കമ്മീഷൻ അറിയിച്ചപ്പോൾ, അവരുടെ പേരുവിവരങ്ങൾ എന്തുകൊണ്ട് പരസ്യപ്പെടുത്തിക്കൂടാ എന്ന് ജസ്റ്റിസ് സൂര്യകാന്ത് ചോദിച്ചു. ജീവിച്ചിരിക്കുന്നവരെ മരിച്ചെന്ന് കാട്ടി പട്ടികയിൽ നിന്ന് ഒഴിവാക്കിയെന്ന പരാതി അതീവ ഗൗരവമുള്ളതാണെന്നും, ഒരു കുടുംബാംഗം മരിച്ചാൽ അത് ബന്ധുക്കളാണ് അറിയിക്കേണ്ടതെന്നും കോടതി ചൂണ്ടിക്കാട്ടി. രാഷ്ട്രീയ പാർട്ടികളുടെ സഹായത്തോടെയാണ് മരിച്ചവരെ കണ്ടെത്തിയതെന്ന കമ്മീഷന്റെ മറുപടിയിലും കോടതി അതൃപ്തി രേഖപ്പെടുത്തി. കമ്മീഷന്റെ നടപടികൾ യുക്തിസഹമായിരിക്കണമെന്നും പൗരന്മാർക്ക് ബുദ്ധിമുട്ടുണ്ടാക്കരുതെന്നും കോടതി നിരീക്ഷിച്ചു.

ലക്ഷക്കണക്കിന് പൗരന്മാരുടെ വോട്ടവകാശം നഷ്ടപ്പെടാൻ ഈ പരിഷ്കരണം കാരണമാകുമെന്നായിരുന്നു ഹർജിക്കാരുടെ പ്രധാന വാദം. എന്നാൽ പട്ടികയിലെ പിഴവുകൾ തിരുത്താൻ പരിഷ്കരണം അത്യാവശ്യമാണെന്ന നിലപാടാണ് തെരഞ്ഞെടുപ്പ് കമ്മീഷൻ സ്വീകരിച്ചത്.